ລິເວີພູລ ກຽມແບນແຟນບານອາຍຸ 16 ປີ ທີ່ແລ່ນລົງສະໜາມມາໝື່ນລົ້ນໃສ່ນັກເຕະ ຈົນເກືອບເຮັດໃຫ້ບາດເຈັບໜັກ
ແຟນບານເຍົາວະຊົນຄົນໜຶ່ງຂອງລິເວີພູລ ມີສິດຖືກຫ້າມບໍ່ໃຫ້ເຂົ້າຮ່ວມເກມທີ່ສະຫນາມກິລາອີກຕະຫລອດຊີວິດ ຫລັງຈາກທີ່ພະຍາຍາມແລ່ນລົງໄປສະຫລອງດີໃຈທີ່ສະຫນາມໃນເກມແດງເດືອດຈົນເກືອບເຮັດໃຫ້ ແອນດູ ໂຣເບີສັນ ບາດເຈັບໜັກ.
ເຫດການເກີດຂຶ້ນຫລັງຈາກ ໂຣແບໂຕ ຟີມິໂນ ຍິງປະຕູທີ່ 7 ໃສ່ ແມນເຊັສເຕີ ຢູໄນເຕັດ ບັນດານັກເຕະກໍ່ແລ່ນເຂົ້າຫາກັນເພື່ອສະຫລອງ. ແຕ່ວ່າມີແຟນບານເຈົ້າຖິ່ນທີ່ແລ່ນມາຈາກອີກດ້ານໜຶ່ງເພື່ອມາຮ່ວມດີໃຈກັບພວກເຂົາ.
ຈັງຫວະທີ່ແຟນບານແລ່ນມາລາວໄດ້ໝື່ນລົ້ມໄປຖືກໃສ່ຂໍ້ຕີນຂອງ ແອນດູ ໂຣເບີສັນ ກອງຫລັງຝັ່ງຊ້າຍຂອງທີມຈົນຕົນເອງຕ້ອງເອົາມືຈັບທີ່ຂໍ້ຕີນ. ເຊິ່ງຫລັງຈາກນັ້ນແຟນບານດັ່ງກ່າວໄດ້ຖືກຕໍາຫລວດຈັບໄປ ແລະ ຍັງຖືກຮ້ອງດ່າຈາກ ເຈເກນ ຄຣັອບ ອີກຕ່າງຫາກ.
ຫລັງຈາກນັ້ນ, ທາງຕໍາຫລວດກໍ່ໄດ້ປະກາດວ່າພວກເຂົາໄດ້ກັກຕົວແຟນບານເຕະຫນຸ່ມຄົນນີ້ແລ້ວ ເປັນເດັກນ້ອຍພຽງອາຍຸ 16 ປີ ຖືກກ່າວຫາວ່າແລ່ນລົງໄປໃນສະໜາມກິລາບານເຕະໂດຍບໍ່ໄດ້ຮັບອະນຸຍາດ. ກ່ອນທີ່ຈະຖືກປ່ອຍຕົວໃຫ້ກັບຄືນບ້ານ ແລະ ນັດມາໃຫ້ຂໍ້ມູນຫລັກຖານຕໍ່ເຈົ້າໜ້າທີ່ໃນພາຍຫລັງ.
ສ່ວນທາງຝ່າຍ ລິເວີພູລ ໄດ້ອອກຖະແຫລງການວ່າ ພຶດຕິກຳຂອງຊາຍໜຸ່ມຄົນນີ້ເປັນສິ່ງທີ່ບໍ່ຄວນເກີດຂຶ້ນ. ພວກເຂົາເຈົ້າຈະສືບສວນ ແລະ ຊອກຫາທີ່ມາວ່າເດັກນ້ອຍຄົນນີ້ແລ່ນລົງມາໄດ້ແນວໃດ. ເຊິ່ງມີສິດຖືກຫ້າມບໍ່ໃຫ້ມາເຊຍທີມຢູ່ ແອນຟິວ ຕະຫລອດຊີວິດ ພ້ອມກັບມີປະຫວັດຄະດີອາຊະຍາກຳຕິດໂຕນຳອີກດ້ວຍ.
