ສປປ ລາວ ເຂົ້າຮ່ວມກອງປະຊຸມ ລັດຖະມົນຕີສະມາຄົມການປ່ອຍອາຍພິດເປັນສູນແຫ່ງອາຊີ
ຄະນະຜູ້ແທນຂອງ ສປປ ລາວ ນໍາໂດຍ ທ່ານ ສີນາວາ ສຸພານຸວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມລັດຖະມົນຕີສະມາຄົມການປ່ອຍອາຍພິດເປັນສູນແຫ່ງອາຊີ (Asia Zero Emission Community (AZEC) Ministerial Meeting) ລະຫວ່າງວັນທີ 3-4 ມີນາ 2023 ຜ່ານມານີ້, ໂດຍການເປັນເຈົ້າພາບຈັດຂຶ້ນຂອງ ກະຊວງເສດຖະກິດ, ການຄ້າ ແລະ ອຸດສາຫະກຳຢີ່ປຸ່ນ (METI). ແລະ ມີບັນດາລັດຖະມົນຕີ, ຮອງລັດຖະມົນຕີ ຈາກປະເທດສະມາຊິກເຂົ້າຮ່ວມ.
ເພື່ອແລກປ່ຽນຄຳຄິດຄຳເຫັນສຳລັບການຫັນປ່ຽນພະລັງງານໂດຍການຫລຸດຜ່ອນກາກບອນ, ຫລຸດຜ່ອນການປ່ອຍອາຍພິດ ລວມທັງການແນ່ໃສ່ແນວຄິດ ແລະ ພາລະບົດບາດການຈັດຕັ້ງປະຕິບັດວຽກງານຂອງປະຊາຄົມ AZEC. ເຊິ່ງບັນດາປະເທດທີ່ເຂົ້າຮ່ວມສ່ວນຫລາຍຕ່າງກໍມີຄວາມຄິດໄປໃນທິດທາງດຽວກັນຄື ແນວຄິດຂອງປະຊາຄົມ AZEC ເປັນແນວທາງທີ່ດີ, ແຕ່ຫາກວ່າຄວນມີໂຄງຮ່າງແບບແຜນການດໍາເນີນຢ່າງລະອຽດ ເຊິ່ງແຕ່ລະປະເທດກໍເຫັນດີເປັນເອກະພາບວ່າ ຈະພິຈາລະນາການເຂົ້າຮ່ວມປະຊາຄົມຄືນໃໝ່ ພາຍຫລັງໄດ້ຮັບຂໍ້ມູນຢ່າງຄົບຖ້ວນກ່ຽວກັບປະຊາຄົມ AZEC.
