ທ່ານ ສີຈິ້ນຜິງ ດໍາລົງຕໍາແໜ່ງປະທານປະເທດຈີນຕໍ່ເປັນສະໄໝທີ 3 ຫລັງສະພາປະຊາຊົນລົງຄະແນນຮັບຮອງເປັນເອກະພາບ

ວັນທີ 10 ມີນາ, ກອງປະຊຸມສະພາປະຊາຊົນແຫ່ງຊາດຈີນ (NPC) ລົງມະຕິເປັນເອກະພາບຮັບຮອງໃຫ້ທ່ານ ສີຈິ້ນຜິງ ຂຶ້ນດໍາລົງຕໍາແໜ່ງປະທານປະເທດສະໄໝທີ 3 ຢ່າງເປັນທາງການ ສົ່ງຜົນໃຫ້ທ່ານກາຍເປັນຜູ້ນໍາຈີນສະໄໝໃໝ່ທີ່ດໍາລົງຕໍາແໜ່ງຍາວນານທີ່ສຸດ ແລະ ມີອໍານາດສູງສຸດນັບແຕ່ຍຸກຂອງທ່ານ ເໝົາເຈີຕຸງ ນັກປະຕິວັດຄົນສໍາຄັນ ແລະ ເປັນຜູ້ນໍາສູງສຸດຄົນທໍາອິດຂອງ ສປ ຈີນ.

ທ່ານ ສີຈິ້ນຜິງ ເກີດໃນວັນທີ 15 ມິຖຸນາ 1953 ຢູ່ນະຄອນຫລວງປັກກິ່ງ ເປັນລູກຊາຍຂອງທ່ານ ສີຈົງຊຸນ ທະຫານ ແລະ ວິລະບູລຸດນັກປະຕິວັດ ເຊິ່ງເປັນໜຶ່ງໃນຜູ້ນໍາຍຸກບຸກເບີກຂອງພັກຄອມມູນິດ ແລະ ຄັ້ງໜຶ່ງເຄີຍເປັນຮອງນາຍົກລັດຖະມົນຕີທີ່ມີອໍານາດຮອງຈາກອະດີດນາຍົກລັດຖະມົນຕີ ໂຈເອິນໄຫລ.

ທ່ານ ສີຈິ້ນຜິງ ໄດ້ຮັບການຍອມຮັບໃຫ້ເຂົ້າຮ່ວມເປັນສະມາຊິກພັກກອມມູນິດໃນປີ 1974 ແລະ ເຮັດວຽກຢ່າງໜັກເພື່ອກ້າວເຂົ້າສູ່ເສັ້ນທາງການເມືອງ ໂດຍເລີ່ມຈາກຕໍາແໜ່ງຫົວໜ້າສາຂາຂອງພັກໃນໝູ່ບ້ານແຫ່ງໜຶ່ງ ຈົນຂຶ້ນມາສູ່ຕໍາແໜ່ງເຈົ້າຄອງມົນທົນຝູຈ້ຽນ ໃນປີ 1999 ກ່ອນຈະກາຍເປັນຫົວໜ້າສາຂາຂອງພັກປະຈໍາມົນທົນເຈີຈຽງໃນປີ 2002 ແລະ ຫົວໜ້າສາຂາພັກປະຈໍາຊຽງໄຮ້ ສູນກາງທາງການເງິນ ແລະ ນະຄອນໃຫຍ່ອັນດັບ 2 ຂອງຈີນ. ຜົນງານຂອງທ່ານ ສີຈິ້ນຜິງ ພາຍໃນພັກກອມມູນິດເພີ່ມຂຶ້ນຢ່າງຕໍ່ເນື່ອງ ຈົນກາຍເປັນແຮງຊຸກຍູ້ໃຫ້ທ່ານກ້າວເຂົ້າສູ່ການເປັນຄະນະກໍາມະການປະຈໍາກົມການເມືອງ (Standing Committee of the Politluro) ເຊິ່ງເປັນໜ່ວຍງານທີ່ມີໜ້າທີ່ຕັດສິນໃຈໃນລະດັບສູງສຸດ ຈົນຮອດປີ 2012 ທ່ານຈຶ່ງໄດ້ຮັບເລືອກໃຫ້ກາຍເປັນປະທານປະເທດຄົນທີ 7 ຂອງຈີນ ແທນປະທານປະເທດ ຫູຈິນເທົາ.

ອ້າງອີງ:

https://www.reuters.com/…/chinas-parliament-elects-xi…/