ເກີດເຫດກວາດຍິງຢູ່ໂບດໃນເຢຍລະມັນ ມີຜູ້ເສຍຊີວິດຢ່າງໜ້ອຍ 6 ຄົນ ບາດເຈັບ 7 ຄົນ

ເກີດເຫດກວາດຍິງຂຶ້ນຢູ່ໂບດພະຍານພະຍະໂຮວາໃນເມືອງຮໍາບູກຂອງເຢຍລະມັນໃນວັນທີ 9 ມີນາ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 6 ຄົນ ແລະ ບາດເຈັບອີກ 7 ຄົນ ໂດຍປັດຈຸບັນຍັງບໍ່ຮູ້ແຮງຈູງໃຈຂອງການກໍ່ເຫດ.

ເຈົ້າໜ້າທີ່ຕໍາຫລວດເປີດເຜີຍວ່າ: ປັດຈຸບັນຍັງບໍ່ມີສັນຍານບົ່ງບອກວ່າຜູ້ກະທໍາຄວາມຜິດກໍາລັງຫລົບໜີ, ແຕ່ຍັງບໍ່ແນ່ນອນວ່າຜູ້ກໍ່ເຫດຈະເປັນໜຶ່ງໃນຜູ້ເສຍຊີວິດນໍາ ຫລື ບໍ່, ສ່ວນຜູ້ບາດເຈັບຫລາຍຄົນໄດ້ຮັບບາດເຈັບສາຫັດ.

ໂຄສົກສໍາສໍານັກງານຕໍາຫລວດເປີດເຜີຍວ່າ: ເຈົ້າໜ້າທີ່ໄດ້ຮັບສາຍແຈ້ງເຫດຮ້າຍເມື່ອເວລາປະມານ 21:00 ໂມງ ຕາມເວລາທ້ອງຖິ່ນ ແລະ ຟ້າວເດີນທາງໄປສະຖານທີ່ເກີດເຫດທັນທີ ໂດຍພົບວ່າມີຜູ້ບາດເຈັບ ແລະ ເສຍຊີວິດຈໍານວນຫລາຍຢູ່ບໍລິເວນຊັ້ນລຸ່ມຂອງອາຄານ ເຊິ່ງໃນເວລານັ້ນເຈົ້າໜ້າທີ່ຍັງໄດ້ຍິນສຽງປືນດັງຂຶ້ນ 1 ນັດຢູ່ບໍລິເວນຊັ້ນເທິງຂອງໂບດ ກ່ອນຈະແລ່ນຂຶ້ນໄປ ແລະ ພົບວ່າມີຜູ້ເສຍຊີວິດເພີ່ມອີກ.

ສໍານັກຂ່າວ DPA ຂອງເຢຍລະມັນ ລາຍງານໂດຍອ້າງຄໍາກ່າວຂອງນັກຂ່າວທີ່ຢູ່ໃນຈຸດເກີດເຫດ ໂດຍລະບຸວ່າປະຊາຊົນໃນເຂດອັລສເຕີດອບ ທາງຕອນເໜືອຂອງເມືອງຮໍາບູກໄດ້ຮັບຄໍາເຕືອນທາງໂທລະສັບເຖິງ “ສະຖານະການທີ່ອັນຕະລາຍເຖິງຊີວິດ” ແລະ ຖະໜົນຫລາຍເສັ້ນໃນບໍລິເວນດັ່ງກ່າວຖືກປິດ, ພະຍານຜູ້ເຫັນເຫດການເລົ່າວ່າ: ລາວໄດ້ຍິນສຽງປືນດັງຕໍ່ເນື່ອງປະມານ 12 ລູກ.

ອ້າງອີງ:

https://www.reuters.com/…/least-six-dead-after…/

https://edition.cnn.com/…/hamburg-germany…/index.html