ແມນຢູ ເໝົາສາມ! ເດ ເກອາ, ເທນຮາກ, ແຣສຟອດ ໄດ້ລາງວັນດີເດັ່ນ ປະຈຳເດືອນກຸມພາຂອງພຣີເມຍລີກ

ເດ ເກອາ, ເທນຮາກ, ແຣສຟອດ ຈາກທັບຜີສາດແດງ ຄວ້າລາງວັນນັກເຕະດີເດັ່ນ, ຜູ້ຈັດການທີມດີເດັ່ນ, ລູກປ້ອງກັນປະຕູດີເດັ່ນ ຂອງພຣີເມຍລີກ ປະຈໍາເດືອນກຸມພາ.

ກອງໜ້າຊາວອັງ​ກິດ​ ສະແດງຟອມໄດ້ຢ່າງຮ້ອນແຮງດ້ວຍການຍິງ 5 ປະຕູຈາກການລົງຫລິ້ນໃນ 4 ເກມຂອງພຣີເມຍລີກໃນເດືອນທີ່ຜ່ານມານີ້. ເຮັດໃຫ້ໄດ້ຮັບລາງວັນນັກເຕະດີເດັ່ນຂອງ ພຣີເມຍລີກ ເປັນເດືອນທີສອງຕິດຕໍ່ກັນ.

ນອກຈາກນີ້ຍັງຖືເປັນການຄວ້າລາງວັນນັກເຕະດີເດັ່ນຂອງ ພຣີເມຍລີກ ຄັ້ງທີ່ສາມແລ້ວໃນລະດູການນີ້. ຫລັງຈາກໄດ້ຮັບຄັ້ງທໍາອິດໃນເດືອນກັນຍາ ຈົນກາຍເປັນນັກເຕະຄົນທີ 2 ທີ່ຄວ້າລາງວັນນັກເຕະດີເດັ່ນໄດ້ເຖິງສາມຄັ້ງໃນລະດູການດຽວ ຕໍ່ຈາກ ໂມຮາເໝັດ ຊາລາ ທີ່ເຮັດໄດ້ໃນລະດູການ 2017-18.

ເຈົ້ານາຍໃຫຍ່ຊາວໂຮນລັງ ພາລູກທີມ ຜີສາດແດງ ເຮັດຜົນງານໄດ້ຢ່າງດີເດັ່ນ ເມື່ອນໍາທີມບໍ່ເສຍໃນລີກ ສີ່ເກມ ໃນເດືອນກຸມພາ ໂດຍຊະນະ 3 ເກມ ແລະ ສະເໝີ 1 ເກມ ເຮັດໃຫ້ລາງວັນນີ້ເປັນຄັ້ງທີ 2 ຫລັງຈາກໄດ້ຮັບເປັນຄັ້ງທຳອິດໃນເດືອນກັນຍາ.