ມື້ນີ້ສະພາບອາກາດທົ່ວທຸກພາກຂອງປະເທດລາວ ຈະເຢັນລົງ ແລະ ມີຝົນຕົກຟ້າຮ້ອງຟ້າເຫລື້ອມ

ກົມອຸຕຸນິຍົມ ແລະ ອຸທົກກະສາດ ລາຍງານວ່າ: ສະພາບອາກາດປະຈໍາວັນທີ 12 ມີນາ 2023, ມວນອາກາດໜາວເຢັນຈາກປະເທດຈີນໄດ້ແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວດ້ວຍກຳລັງອ່ອນຫາປານກາງ ສົມທົບກັບກະແສລົມຕາເວັນອອກສ່ຽງເໜືອພັດປົກຄຸມ, ເຊິ່ງຈະເຮັດໃຫ້ອາກາດເຢັນລົງໃນແຕ່ລະພາກ ແລະ ມີຝົນຕົກຟ້າຮ້ອງຟ້າເຫລື້ອມໃນລະດັບຄ່ອຍ ພ້ອມມີລົມພັດແຮງຢູ່ບາງທ້ອງຖິ່ນ ໂດຍສະເພາະບັນດາແຂວງພາກເໜືອ ແລະ ພາກກາງ.

ພາກເໜືອຕາເວັນອອກ: ອາກາດເຢັນລົງຕື່ມ ພ້ອມມີຝົນຕົກໃນລະດັບຄ່ອຍ ຫລື ເນື້ອທີ່ປົກຫຸ້ມຂອງຝົນເທົ່າກັບ 40% ຂອງພາກ ອຸນຫະພູມໃນລະຫວ່າງ 11-24 ອົງສາ.

ພາກເໜືອຕາເວັນຕົກ: ອາກາດເຢັນ ຫາ ໜາວເຢັນລົງຕື່ມອີກ ພ້ອມມີຝົນຕົກ ຟ້າຮ້ອງຟ້າເຫລື້ອມໃນລະດັບຄ່ອຍ ແລະ ມີລົມພັດແຮງໃນໄລຍະທ້າຍຕອນບ່າຍ ຫາ ກາງຄືນ ຫລື ເນື້ອທີ່ການປົກຫຸ້ມຂອງຝົນເທົ່າກັບ 60% ຂອງທຸກພາກ ອຸນຫະພູມ ໃນລະຫວ່າງ 13-33 ອົງສາ.

ນະຄອນຫລວງວຽງຈັນ ອາກາດເຢັນລົງຕື່ມອີກ ແລະ ຈະມີຝົນຕົກຟ້າຮ້ອງຟ້າເຫລື້ອມໃນລະດັບຄ່ອຍ ພ້ອມມີລົມພັດແຮງຢູ່ບາງບໍລິເວນ ໃນໄລຍະຕອນກາງຄືນ. ອຸນຫະພູມໃນລະຫວ່າງ 21 – 32 ອົງສາ.

ພາກກາງ: ອາກາດເຢັນລົງຕື່ມອີກ ແລະ ມີຝົນຕົກຟ້າຮ້ອງຟ້າເຫລື້ອມໃນລະດັບຄ່ອຍຢູ່ບາງທ້ອງຖິ່ນ ພ້ອມມມີລົມພັດແຮງເປັນບາງ ໄລຍະ ຫລື ເນື້ອທີ່ປົກຫຸ້ມຂອງຝົນເທົ່າກັບ 30% ຂອງພາກ. ອຸນຫະພູມໃນລະຫວ່າງ 10–33 ອົງສາ.

ແຂວງໄຊສົມບູນ: ອາກາດໜາວເຢັນລົງຕື່ມອີກ ແລະ ມີຝົນຕົກໃນລະດັບຄ່ອຍ ຢູ່ບາງບໍລິເວນ. ອຸນຫະພູມໃນລະຫວ່າງ 12-27 ອົງສາ.

ພາກໃຕ້: ອາກາດຮ້ອນ ແລະ ພ້ອມມີລົມພັດແຮງເປັນບາງໂອກາດຢູ່ບາງທ້ອງຖິ່ນ. ອຸນຫະ ພູມໃນລະຫວ່າງ 21 – 36 ອົງສາ.

ສໍາລັບ ເຂດພູພຽງບໍລະເວນ:ອາກາດໜາວເຢັນ ແລະ ຍັງຈະມີຝົນຕົກໃນລະດັບຄ່ອຍຢູ່ເຂດເມືອງດາກຈຶງ ພ້ອມມີລົມພັດແຮງເປັນບາງໂອກາດ. ອຸນຫະພູມໃນລະຫວ່າງ 9–27 ອົງສາ.