ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມພ້ອມດ້ວຍຄະນະ ຢ້ຽມຢາມ ແລະ ເຮັດວຽກຢູ່ ແຂວງລາຍເຈົາ

ໂອກາດນີ້ສະຫາຍ ສະຫາຍ ເຈີ່ນ ຕ່ຽນ ຢູ່ງ ກໍໄດ້ລາຍງານກ່ຽວກັບຄວາມເປັນມາ ຂອງແຂວງ ຊຶ່ງແຂວງລາຍເຈົາໄດ້ຮັບການສ້າງຕັ້ງ ແລະ ແຍກຕົວອອກເປັນທາງ ການນັບແຕ່ປີ 2004 ເປັນຕົົ້ນມາ (ກ່ອນໜ້ານີ້ແຂວງລາຍເຈົາ ແລະ ແຂວງດຽນບຽນ ເປັນແຂວງດຽວມີຊື່ວ່າແຂວງລາຍເຈົາທີ່ມີສຳນັກຕັ້ງຢູ່ເມືອງໄລ ທີ່ຂຶ້ນກັບແຂວງດຽນບຽນໃນປັດຈຸບັນ) ລວມທັງແຈ້ງໂດຍຫຍໍ້ກ່ຽວກັບສະພາບລວມຂອງແຂວງນັບທັງສະພາບການພັດທະນາເສດຖະກິດສັງຄົມຂອງແຂວງໃນໄລຍະຜ່ານມາ ກໍຄືໝາກຜົນການພົວພັນ ຮ່ວມ ມືກັບ ສປປ ລາວ, ໂດຍສະເພາະແຂວງລາຍເຈົາໄດ້ແຮກສຽວກັບ 3 ແຂວງພາກເໜືອຄື: ແຂວງອຸດົມໄຊ, ແຂວງຫຼວງພະບາງ ແລະ ແຂວງຜົ້ງສາລີ. ພ້ອມທັງແຈ້ງໃຫ້ຊາບກ່ຽວກັບການສ້າງຊັບພະຍາກອນມະນຸດໃຫ້ແກ່ 3 ແຂວງດັ່ງກ່າວໃນໄລຍະຜ່ານມາ. ແຂວງລາຍເຈົາປະກອບດ້ວຍ 3 ເຜົາໃຫຍ່ຄື: ເຜົ່າໄຕກວມ 38%, ເຜົ່າມົ້ງ 32%, ເຜົ່າກິງ 30 % ສະຫາຍເຈົ້າແຂວງຍັງໃຫ້ຄວາມເຊື່ອໝັ້ນວ່າໃນໄລຍະທີ່ສະຫາຍເອກອັກຄະລັດຖະທູດມາດຳລົງຕຳແໜງຢູ່ ສສ ຫວຽດນາມຈະເປັນຂົວຕໍ່ໃນການປະສານງານລະຫວ່າງສອງປະ ເທດເວົ້າລວມ, ເວົ້າສະເພາະແມ່ນແຂວງລາຍເຈົາ ແລະ ບັນດາແຂວງພາກເໜືອຂອງລາວ.

ສະຫາຍ ແສງເພັດ ຮຸ່ງບຸນຍວງ ກໍໄດ້ສະແດງຄວາມຂອບໃຈໃນການຕ້ອນຮັບອັນອົບອຸ່ນ ແລະ ເປັນກັນເອງໃນຖານສະຫາຍອ້າຍນ້ອງ ພ້ອມທັງສະແດງຄວາມຊົມເຊີຍໝາກຜົນການພັດທະນາເສດຖະກິດ-ສັງຄົມໃນ ໄລຍະຜ່ານມາຂອງແຂວງ ຊຶ່ງບັນດາຜົນສຳເລັດດັ່ງກ່າວກໍໄດ້ສະແດງໃຫ້ເຫັນເຖິງການວາງແນວທາງທີ່ຖືກຕ້ອງ, ຄວາມ ສາມາດໃນການຊີ້ນຳ-ນຳພາຂອງອົງຄະນະພັກ, ອຳນາດການປົກຄອງ ແລະ ການເປັນຈິດໜຶ່ງໃຈດຽວ ຂອງ ປະຊາຊົນແຂວງລາຍເຈົາ. ພ້ອມທັງຕີລາຄາສູງການພົວພັນຮ່ວມມືລະຫວ່າງສອງປະເທດ ກໍຄືການຮ່ວມມືລະ ຫວ່າງ ແຂວງລາຍເຈົາ ກັບ ບັນດາແຂວງພາກເໜືອຂອງລາວໂດຍສະເພາະແມ່ນການຊ່ວຍເຫຼືອສ້າງຊັບພະຍາ ກອນມະນຸດໃຫ້ແກ່ ແຂວງອຸດົມໄຊ, ແຂວງຫຼວງພະບາງ ແລະ ແຂວງຜົ້ງສາລີ.

ໃນວັນດຽວກັນ, ສະຫາຍເອກອັກຄະລັດຖະທູດພ້ອມດ້ວຍຄະນະຍັງໄດ້ໄປຢ້ຽມຢາມ ແລະ ພົບປະຄູອາຈານ ແລະ ນັກສຶກສາລາວທີ່ວິທະຍາໄລຊຸມຊົນແຂວງລາຍເຈົາ, ໂດຍການຕ້ອນຮັບ ຂອງ ສະຫາຍນາງ ເລືອງ ຈິຕວ໋ຽນ, ອຳນວຍ ການພ້ອມດ້ວຍຄະນະອຳນວຍການ ຄູ – ອາຈານ ແລະ ນ້ອງນັກ ສຶກສາລາວ.

ສະຫາຍນາງ ເລືອງ ຈິ ຕວ໋ຽນ ກໍໄດ້ລາຍ ງານປະຫວັດຄວາມເປັນມາຂອງໂຮງຮຽນພ້ອມທັງສະພາບການສ້າງຊັບພະຍາກອນມະນຸດໃຫ້ແກ່ 3 ແຂວງພາກເໜືອຂອງລາວ ເລີ່ມແຕ່ປີ 2014 ມາໄດ້ມີນັກສຶກສາລາວມາສຶກສາຢູ່ໂຮງຮຽນແຫ່ງນີ້ທັງໝົດ 90 ຄົນ ໃນນັ້ນຈົບການສຶກສາກັບຄືນປດເທດເປັນຈຳ ນວນຫຼາຍ, ປັດຈຸບັນຍັງມີນັກສຶກສາຈຳນວນ 14ຄົນ ມາຈາກແຂວງອຸດົມໄຊ, ຮຽນສອງຂະແໜງຄື: ອະນຸບານຊັ້ນສູງ 05 ຄົນ ແລະ ການແພດຊັ້ນສູງ 09 ຄົນ, ສະຫາຍຍັງໄດ້ລາຍງານຕື່ມວ່າທາງໂຮງ ຮຽນໄດ້ ສ້າງເງື່ອນໄຂອຳນວຍຄວາມສະດວກທາງດ້ານທີ່ພັກ, ມີໂຮງອາຫານ ແລະ ມີເບ້ຍລ້ຽງໃຫ້, ສິ່ງທີ່ທ້າທາຍແລະ ເປັນບັນຫາອຸປະສັກຂອງນັກສຶກສາສ່ວນໃຫຍ່ແມ່ນພາສາຫວຽດ ນາມເປັນຫຼັກ.

ໂອກາດນີ້, ສະຫາຍ ເອກອັກຄະລັດຖະ ທູດ ແສງເພັດ ຮຸ່ງບຸນຍວງ ໄດ້ສະແດງຄວາມຂອບໃຈ ພ້ອມຕີລາຄາສູງຕໍ່ການຊ່ວຍເຫຼືອຂອງລັດຖະບານຫວຽດນາມກໍຄືການນຳແຂວງລາຍເຈົາທີ່ໄດ້ໃຫ້ທຶນຊ່ວຍເຫຼືອບັນດາແຂວງພາກເໜືອຂອງລາວສະຫາຍໄດ້ຝາກຄວາມເປັນຫວງເປັນໄຍຈາກລັດຖະບານກໍຄືການນຳຂັ້ນສູງຂອງສອງປະເທດຕໍ່ກັບຄຸນນະພາບການສຶກສາຂອງນັກສຶກສາລາວທີ່ ສສ ຫວຽດນາມ, ພ້ອມນັ້ນທ່ານຍັງຮຽກຮ້ອງໃຫ້ຄູ-ອາຈານເອົາໃຈໃສ່ບໍ່ໃຫ້ມີຄະແນນນະໂຍບາຍໃນເວລາສອບເສັ່ງ,ພ້ອມນັ້ນ ທ່ານຍັງໄດ້ປຸກລະ ດົມໃຫ້ກຳລັງໃຈນ້ອງໆນັກສຶກສາໃຫ້ພ້ອມກັນສຶກສາຄົ້ນຄວ້າຮ່ຳຮຽນ ແລະ ພ້ອມກັນຍາດແຍ່ງເອົາຄວາມຮູ້ ເພື່ອນຳ ເມືອພັດທະນາປະເທດຊາດກໍຄືພັດທະນາແຂວງຂອງຕົນ.

ຂ່າວ,ພາບ: ສະຖານທູດລາວທີ່ຮ່າໂນ້ຍ