ສຸດເສົ້າ!! ເດັກນ້ອຍອິນເດຍຖືກໝາຈອນຈັດກັດ ເສຍຊີວິດ 2 ຄົນ ໃນເວລາ 2 ວັນ

ສຳນັກຂ່າວຕ່າງປະເທດລາຍງານ ວັນທີ 15 ມີນາ 2023 ນີ້ວ່າ:  ເກີດເຫດສະເທືອນໃຈໃນປະເທດອິນເດຍ ຫລັງຈາກຄອບຄົວໜຶ່ງທີ່ອາໄສຢູ່ເຂດຊຸມຊົນແອອັດໃນນະຄອນຫລວງນິວເດລີ ຕ້ອງສູນເສຍລູກຊາຍ ຍ້ອນຖືກໝາຈອນຈັດກັດ, ຜ່ານໄປບໍ່ເທົ່າໃດມື້ລູກຊາຍອີກຄົນກໍປະສົບຊະຕາກຳດຽວກັນ ແລະ ເສຍຊີວິດຈົນໃນທີ່ສຸດ.

ລາຍງານລະບຸຕື່ມວ່າ: ຄອບຄົວຜູ້ກ່ຽວໄດ້ແຈ້ງໄປຄວາມວ່າລູກຊາຍຍ່າງອອກຈາກເຮືອນ ໃນຕອນບ່າຍວັນທີ 10 ມີນາ 2023 ຜ່ານມາ ແລະ ບໍ່ຮອດຊົ່ວໂມງກໍພົບຮ່າງຂອງລູກຊາຍໃນສະພາບບາດແຜເຕັມໂຕ, ເຄື່ອງນຸ່ງເປື້ອນເລືອດ ລວມທັງມີຮອຍກັດຂອງໝາຢູ່ຫລັງ, ສະໂພກ, ຕີນ, ຄໍ ແລະ ຫົວ.

ຕໍ່ມາ ວັນທີ 12 ມີນາ 2023 ຄອບຄົວໄດ້ຮັບຂ່າວຮ້າຍອີກ ເມື່ອນ້ອງຊາຍຂອງຜູ້ຖືກເຄາະຮ້າຍຖືກໝາຈອນຈັດລຸມກັດ ໃນຂະນະທີ່ຍ່າງອອກໄປໜ້າເຮືອນ ເຮັດໃຫ້ບາດເຈັບສາຫັດ ແລະ ເສຍຊີວິດໃນເວລາຕໍ່ມາ.

ການເສຍຊີວິດຂອງສອງອ້າຍນ້ອງ ເຮັດໃຫ້ປະຊາຊົນບໍ່ພໍໃຈເປັນຢ່າງຍິ່ງ ເພາະເຄີຍຮ້ອງຮຽນໃຫ້ທາງການແກ້ໄຂບັນຫາ ໝາຈອນຈັດ ທີ່ເພີ່ມຂຶ້ນໃນຊຸມຊົນ ແຕ່ບໍ່ໄດ້ຮັບການແກ້ໄຂ, ນອກຈາກນັ້ນ ໝາຈອນຈັດດັ່ງກ່າວຍັງມາກັດໝູ, ແພະ ແລະ ສັດລ້ຽງອື່ນໆຂອງປະຊາຊົນ.