ປະຊາຊົນ ສ.ເກົາຫຼີ ປະທ້ວງລັດຖະບານ ຕິດຕັ້ງຖານຍິງລູກສອນໄຟເພີ່ມອີກ
ຜູ້ປະທ້ວງ ສ.ເກົາຫຼີ ຈຳນວນຫລາຍປະທະຢ່າງດຸເດືອດກັບຕຳຫຼວດປາບຈະລາຈົນ ເພື່ອພະຍາຍາມຂັດຂວາງບໍ່ໃຫ້ເຈົ້າໜ້າທີ່ນຳເອົາຊິ້ນສ່ວນລະບົບປ້ອງກັນລູກສອນໄຟ “ທາດ” ທີ່ເຫຼືອຢູ່ເຂົ້າໄປຕິດຕັ້ງໃນພື້ນທີ່.
ສຳນັກຂ່າວຕ່າງປະເທດລາຍງານຈາກນະຄອນຫຼວງເຊອຸນ ປະເທດ ສ.ເກົາຫຼີ ໃນວັນທີ 7 ກັນຍາວ່າ: ປະຊາຊົນຢູ່ເມືອງຊອງຈູ ແຂວງກາຍອງຊັງເໜືອ ທາງຕາເວັນອອກຂອງ ສ.ເກົາຫຼີ ຊຸມນຸມປະທ້ວງຢ່າງໜັກຈົນເຕັມຖະໜົນໂຊຊອງ ເຊິ່ງເປັນເສັ້ນທາງສັນຈອນເສັ້ນຫລັກພຽງເສັ້ນດຽວເທົ່ານັ້ນ ທີ່ສາມາດເຂົ້າສູ່ສະໜາມກ໊ອຟຂອງບໍລິສັດລອດເຕ ເພື່ອຂັດຂວາງບໍ່ໃຫ້ເຈົ້າໜ້າທີ່ຂອງ ສ.ເກົາຫຼີ ແລະ ອາເມລິກາ ນຳເອົາຊິ້ນສ່ວນຂອງຖານຍິງລະບົບປ້ອງກັນລູກສອນໄຟເພດານບິນສູງ “ທາດ” ເຂົ້າໄປຕິດຕັ້ງພາຍໃນສະໜາມກ໊ອຟໄດ້ ໂດຍບັນຍາກາດມີຄວາມຮຸນແຮງເຖິງຂັ້ນມີການປະທະກັນເປັນໄລຍະ ລະຫວ່າງປະຊາຊົນກັບຕຳຫຼວດປາບຈະລາຈົນຫຼາຍກວ່າ 8.000 ຄົນ. ມີລາຍງານຜູ້ໄດ້ຮັບບາດເຈັບປະມານ 40 ຄົນ.
ຂະນະທີ່ກະຊວງປ້ອງກັນປະເທດໃນນະຄອນຫຼວງເຊອຸນອອກຖະແຫຼງການວ່າ: ການຕິດຕັ້ງລະບົບທາດເປັນສິ່ງຈຳເປັນຕໍ່ຄວາມໝັ້ນຄົງຂອງ ສ.ເກົາຫຼີ ໃນການປ້ອງກັນອະທິປະໄຕຂອງປະເທດຈາກການຂົ່ມຂູ່ຄຸກຄາມຂອງ ສປປ ເກົາຫຼີ ທີ່ຍິງລູກສອນໄຟໄປແລ້ວເກືອບ 20 ຄັ້ງ ນັບແຕ່ຕົ້ນປີນີ້ ແລະ ທົດລອງລະເບີດນິວເຄຼຍຄັ້ງທີ 6 ໃນວັນທີ 3 ກັນຍາ ໂດຍການຕິດຕັ້ງຖານຍິງເພີ່ມອີກ 4 ຖານ ຈະເພີ່ມຈຳນວນຖານຍິງລະບົບລູກສອນໄຟພາຍໃນສະໜາມກ໊ອຟແຫ່ງນີ້ເປັນຢ່າງໜ້ອຍ 6 ຖານແລ້ວ.
ໃນເວລາດຽວກັນ, ສປປ ເກົາຫຼີ ຈັດງານສະເຫຼີມສະຫຼອງຜົນສຳເລັດຂອງການທົດລອງລະເບີດນິວເຄຼຍຄັ້ງຫຼ້າສຸດ ຢູ່ສະໜາມກິມ ອິນຊຸງ ໃນນະຄອນຫຼວງພຽງຢາງ, ສ່ວນທຳນຽບຂາວລາຍງານການສົນທະນາທາງໂທລະສັບເປັນເວລາ 45 ນາທີ ລະຫວ່າງປະທານາທິບໍດີ ໂດນັນ ທຣຳ ກັບປະທານປະເທດ ສີຈິ້ນຜິງ ເຊິ່ງຜູ້ນຳອາເມລິກາກ່າວສະແດງຄວາມໝັ້ນໃຈວ່າຈະໄດ້ຮັບການສະໜັບສະໜູນຈາກຜູ້ນຳຈີນ ໃນການເພີ່ມຄວາມເຂັ້ມງວດຂອງມາດຕະການຂວ້ຳບາດ ສປປ ເກົາຫຼີ ຄັ້ງໃໝ່ ທີ່ມີລາຍງານຈະເປັນການມຸ່ງເນັ້ນການຈຳກັດການຂາຍນ້ຳມັນດິບ ແລະ ຜະລິດຕະພັນທີ່ກ່ຽວຂ້ອງໃຫ້ແກ່ ສປປ ເກົາຫຼີ ແລະ ການອາຍັດຊັບສິນຂອງທ່ານ ກິມ ຈອງອິນ ຜູ້ນຳສູງສຸດຄົນປັດຈຸບັນ.
ເຖິງຢ່າງໃດກໍຕາມ, ຈີນ ແລະ ຣັດເຊຍ ເປັນຜູ້ສະໜັບສະໜູນສຳຄັນໃນການສົ່ງອອກນ້ຳມັນດິບ ແລະ ສິນຄ້າປິໂຕຣລຽມໄປ ສປປ ເກົາຫຼີ ແລະ ທັງສອງປະເທດຍັງສະຫງວນທ່າທີໃນບັນຫານີ້, ແຕ່ທ່ານ ສະຕີບ ມານູຊິນ ລັດຖະມົນຕີກະຊວງການເງິນອາເມລິກາ ກ່າວວ່າ: ໃນກໍລະນີທີ່ຮ່າງມະຕິຂວ້ຳບາດບໍ່ຜ່ານສະພາຄວາມໝັ້ນຄົງແຫ່ງສະຫະປະຊາຊາດ (UN), ກະຊວງການເງິນອາເມລິກາໄດ້ກຽມເອກະສານຄຳສັ່ງຝ່າຍບໍລິຫານໃຫ້ທ່ານ ທຣຳ ລົງນາມ ເພື່ອຂວ້ຳບາດປະເທດໃດກໍຕາມທີ່ຄ້າຂາຍກັບ ສປປ ເກົາຫຼີ.
