ກົມຕໍາຫລວດສິ່ງແວດລ້ອມ ຢຶດອາຫານ ຊິ້ນສ່ວນສັດປີກ ຜະລິດຕະພັນອາຫານທະເລແຊ່ແຂງ ທີ່ນໍາເຂົ້າຜິດກົດໝາຍ ທັງໝົດ 28.338 ກິໂລກຣາມ

ວັນທີ 17 ມີນາ 2023 ກົມຕໍາຫລວດສິ່ງແວດລ້ອມ ກົມໃຫຍ່ຕໍາຫລວດ ກະຊວງ ປກສ ສະຫລຸບຜົນງານການເຄື່ອນໄຫວວຽກງານວິຊາສະເພາະ ປະຈໍາປີ 2022 ແລະ ທິດທາງແຜນການປີ 2023, ໂດຍການເປັນປະທານຂອງ ທ່ານ ພັອ ວັນເຮືອງ ຈັນທະພອນ ຫົວໜ້າກົມຕໍາຫລວດສິ່ງແວດລ້ອມ, ມີຄະນະພັັກ-ຄະນະບັນຊາ ແລະ ພະນັກງານ-ນັກຮົບ ເຂົ້າຮ່ວມ.

ທ່ານ ພັທ ວົງພະຈັນ ຜອງສົມບັດ ຮອງຫົວໜ້າກົມຕໍາຫຼວດສິ່ງແວດ ກ່າວວ່າ: ໃນ 1 ປີຜ່ານມາ, ຄະນະພັກ-ຄະນະກົມ ໄດ້ເອົາໃຈໃສ່ຄົ້ນຄວ້າ, ເຊື່ອມຊຶມມະຕິ, ຄໍາສັ່ງ, ຂໍ້ກໍານົດກົດລະບຽບ ແລະ ບັນດາເນື້ອໃນເອກະສານຕ່າງໆ ເພື່ອໃຫ້ສະມາຊິກພັກ, ພະນັກງານ-ນັກຮົບ ມີແນວຄິດຫລັກໜັ້ນຄຸນທາດການເມືອງໜັກແໜ້ນ ຕໍ່ແນວທາງນະໂຍບາຍຂອງພັກ-ລະບຽບກົດໜາຍຂອງລັດ, ຍຶດໝັ້ນຕໍ່ການຊີ້ນຳ-ນຳພາອັນສະຫລາດສ່ອງໃສຂອງ ພັກປະຊາຊົນປະຕິວັດລາວ ແລະ ມີສະຕິຕໍ່ການຈັດຕັ້ງ, ສາມາດຈຳແນກໄດ້ມິດ ແລະ ສັດຕູຢ່າງຈະແຈ້ງ, ມີຄວາມສາມັກຄີພາຍໃນ-ພາຍນອກດີ, ຫ້າວຫັນຕໍ່ໜ້າທີ່ວຽກງານວິຊາສະເພາະທີ່ຂັ້ນເທິງມອບໝາຍໃຫ້ເປັນຢ່າງດີ ເຊິ່ງສະແດງອອກໃນ 1 ປີ ຜ່ານມາ ຄື:ໄດ້ຮັບສ່ອງແສງລາຍງານສະພາບຈາກ ພະແນກສິ່ງແວດລ້ອມ ຂອງບັດດາແຂວງ 17 ແຂວງ ແລະ 1 ນະຄອນຫລວງວຽງຈັນ, ມີຄະດີເກີດຂຶ້ນຈໍານວນ 3 ເລື່ອງ ໃນຂໍ່້ກ່າວຫາການລັກລອບນຳເຂົ້າຢາສູບຈີນຜິດກົດໝາຍ, ການລັກລອບນຳເຂົ້າອາຫານ, ຊິ້ນສ່ວນສັດປີກ, ຜະລິດຕະພັນອາຫານທະເລແຊ່ແຂງ ທີ່ນໍາເຂົ້າຜິດກົດໝາຍ ຢຶດໄດ້ຈຳນວນທັງໝົດ 28.338 ກິໂລກຼາມ.

ພ້ອມນີ້, ຍັງໄດ້ດຳເນີນຄະດີ ທ້າວ ກາສີພັດ ທະນານີກອນ ແລະ ນາງ ຢົງແພງ ລັກລອບນຳເຂົ້າຊື້-ຂາຍຊິ້ນສ່ວນສັດປີກ ແລະ ອາຫານທະເລແຊ່ແຂງ; ຄະດີການຄັດແຍ່ງ ລະຫວ່າງ ບໍລິສັດ CNEM ກັບ ບໍລິສັດ ຮຸ້ຍຟາ ແລະ ຄຳຮ້ອງຟ້ອງ ມີ 2 ເລື່ອງ ຄື: ນາງ ເກສອນ ຮ້ອງຟ້ອງ ທ້າວ ກາເລມັງ ຊະນະນີກອນ ກ່ຽວກັບການສໍ້ໂກງ ແລະ ທ້າວ ເພັດກອງແກ້ວ ຮ້ອງຟ້ອງ ນາງ ມະໄລພອນ ພູເບ້ຍການຄ້າ.

ຄຽງຄູ່ດຽວກັນ, ຍັງໄດ້ປະສານສົມທົບກັບ ພະແນກຕຳຫລວດສິ່ງແວດລ້ອມ ແຂວງໄຊສົມບູນ ແລະ ແຂວງບໍລິຄຳໄຊ ເພື່ອຕິດຕາມການແກ້ໄຂກ່ຽວກັບ ຜົນກະທົບຕໍ່ສິ່ງແວດລ້ອມ ແລະ ການດຳລົງຊີວິດລຽບຕາມສາຍນໍ້າຍາມ ແລະ ນໍ້າຊັນຂອງບໍລິສັດ ທະວີຊັບສຳຫຼວດ-ຂຸດຄົ້ນບໍ່ແຮ່.

ລົງຕິດຕາມ, ກວດກາ, ເກັບກຳຂໍ້ມູນບັນດາບໍລິສັດ, ໂຮງງານບົດຢາງ-ຕົ້ມຢາງປຣາສະຕິກ, ໂຮງງານຕົ້ມກັ່ນນໍ້າມັນເປື້ອນ, ໂຮງງານຫົວອາຫານສັດ ຢູ່ບ້ານນາຜາສຸກ ເມືອງໄຊທານີ ແລະ ອື່ນໆຈໍານວນ 5 ຄັ້ງ.

ລົງເກັບກໍາຂໍ້ມູນການລັກລອບ-ການຂຸດຄົ້ນດິນດຳ-ດິນແດງ, ຂຸດຄົ້ນຄໍາ, ຫີນແຮ່-ຊາຍຕາມລຳແມ່ນໍ້າຂອງ, ຫີນພູ ແລະ ແຮ່ທາດ, ແຮ່ເຫລັກ ຈໍານວນ 8 ຄັ້ງ; ເກັບກຳຂໍ້ມູນການລັກລອບຂຸດຄົ້ນແຮ່ເຫຼັກ ຢູ່ບ້ານສຳພັນໄຊ ເມືອງຄຳ ແຂວງຊຽງຂວາງ 1 ຄັ້ງ; ເກັບກຳຂໍ້ມູນກ່ຽວກັບ ການເຄື່ອນໄຫວດໍາເນີນການຂຸດຄົ້ນແຮ່ຄຳ ຢູ່ເຂດບ້ານນໍ້າຍອນ ເມືອງແມດ ແຂວງວຽງຈັນ 1 ຄັ້ງ.

ລົງສົມທົບກັບ ອຳນາດການປົກຄອງບ້ານດົງສະຫວາດ ເມືອງສີສັດຕະນາກ ນະຄອນຫຼວງວຽງຈັນ ເພື່ອເອົາຂໍ້ມູນການພັກເຊົາຂອງ ນາງ ຍົງແພງ ແກ້ວຄໍາລຽງ 1 ຄັ້ງ.

ລົງຕິດຕາມຄົນຕ່າງປະເທດ (ສັນຊາດໄທ) ຢູ່ບ້ານທາດຫຼວງໃຕ້ ເມືອງໄຊເສດຖາ ນະຄອນຫຼວງວຽງຈັນ ທີ່ສືບຕໍ່ຈໍາໜ່າຍຊື້-ຂາຍຊິ້ນສ່ວນສັດປີກ, ອາຫານທະເລເເຊ່ແຂງ ຢູ່ທີ່ຕະຫຼາດໂນນຄໍ້, ຕະຫຼາດບຶງທາດຫຼວງ ແລະ ຕະຫຼາດອື່ນໆ ເຂດເມືອງໄຊທານີ.

ພ້ອມທັງກັກສິນຄ້າອາຫານທະເລແຊ່ແຂງ ໄດ້ຈຳນວນ 571 ກິໂລກຼາມ ແລະ ໄດ້ກັກຄົນໄທຈໍານວນ 2 ຄົນ ມາດຳເນີນຄະດີຕາມລະບຽບກົດໝາຍ ຈຳນວນ 15 ຄັ້ງ. ສ່ວນທາງດ້ານວຽກງານອື່ນໆ ກໍເຫັນວ່າ ໄດ້ຈັດຕັ້ງປະຕິບັດຢ່າງຕັ້ງໜ້າ ແລະ ມີຜົນສໍາເລັດຕາມລະດັບຄາດໝາຍທີ່ວາງໄວ້.