ແບນຊິກກຽມເປັນປະເທດທີສອງໃນ EU ຮັບຮອງສາສະໜາພຸດຢ່າງເປັນທາງການ

ລັດຖະບານແບນຊິກອະນຸມັດຮ່າງກົດໝາຍ ຮັບຮອງສາສະໜາພຸດ ປູທາງສູ່ການໄດ້ຮັບການຄຸ້ມຄອງຢ່າງເປັນທາງການ ໂດຍຈະເປັນສະມາຊິກສະຫະພາບເອີຣົບປະເທດທີສອງ ເຊິ່ງບັນຍັດກົດໝາຍດັ່ງກ່າວ.

ວັນທີ 18 ມີນາ, ສໍານັກຂ່າວຕ່າງປະເທດລາຍງານວ່າ: ສໍານັກເລຂາທິການຄະນະລັດຖະບານແບນຊິກ ອອກຖະແຫລງການໃນວັນທີ 17 ມີນາ ກ່ຽວກັບການເຫັນພ້ອມຮ່າງກົດໝາຍ ຮັບຮອງພະພຸດທະສາສະໜາ ໃຫ້ເປັນ “ອົງກອນທາງປັດຊະຍາທີ່ບໍ່ແມ່ນນິກາຍ” ໝາຍເຖິງການຮັບຮອງໃຫ້ມີສະຖານະເປັນ “ສາສະໜາ” ຢ່າງເປັນທາງການ ຖືເປັນສະມາຊິກສະຫະພາບເອີຣົບ (EU) ປະເທດທີສອງຕໍ່ຈາກໂອຕຣິດ ທີ່ໃຫ້ການຮັບຮອງດັ່ງກ່າວ.

ທັງນີ້, ເມື່ອຮ່າງກົດໝາຍຜ່ານການລົງມະຕິຂອງສະພາ, ອົງກອນ, ສະຖາບັນ ແລະ ສາສະໜາກ່ຽວກັບພະພຸດທະສາສະໜາ ຈະໄດ້ຮັບງົບປະມານສະໜັບສະໜູນຈາກລັດຖະບານກາງ ເພື່ອດໍາເນີນງານທີ່ກ່ຽວຂ້ອງ ເຊິ່ງລວມທັງການສ້າງຕັ້ງໂຮງຮຽນເຜີຍແພ່ພະພຸດທະສາສະໜາ ທີ່ຈະໄດ້ຮັບການຮັບຮອງຕາມກົດໝາຍ.

ແບນຊິກມີສູນເຜີຍແພ່ພຸດທະສາສະໜາແຫ່ງທໍາອິດໃນປີ 1960 ຫລັງຈາກນັ້ນ ຈໍານວນຊາວແບນຊິກທີ່ໃຫ້ຄວາມສົນໃຈ ແລະ ມີຄວາມສັດທາຕໍ່ພຸດທະສາສະໜາເພີ່ມຈໍານວນຢ່າງຕໍ່ເນື່ອງ ຈົນສະຫະພາບພຸດທະສາສະໜານິກະຊົນແຫ່ງແບນຊິກ ຍື່ນຄໍາຮ້ອງຕໍ່ລັດຖະບານໃນປີ 1997 ເພື່ອຂໍໃຫ້ມີການຍອມຮັບສາສະໜາພຸດຢ່າງເປັນທາງການ.

ປັດຈຸບັນ ມີການປະເມີນແບບບໍ່ເປັນທາງການວ່າ: ຈໍານວນຜູ້ນັບຖືສາສະໜາພຸດໃນແບນຊິກມີປະມານ 150.000 ຄົນ ຈາກຈໍານວນປະຊາກອນທົ່ວປະເທດປະມານ 11,7 ລ້ານຄົນ.