ຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ເຂົ້າອວຍພອນ ທູດ ສປປ ລາວ ໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີ
March 19, 2023 - 12:31 PM
ວັນທີ 17 ມີນາ 2023 ທີ່ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳຫວຽດນາມ, ຄະນະພົວພັນຕ່າງປະເທດສູນກາງພັກກອມມູນິດຫວຽດນາມ, ນຳໂດຍ ສະຫາຍ ນາງ ຫງວຽນ ທິ ຮ່ວາງ ເວີນ (Nguyễn Thị Hoàng Vân) ຮອງຫົວໜ້າຜູ້ປະຈໍາການຄະນະພົວພັນຕ່າງປະເທດສູນກາງພັກກອມມູນິດຫວຽດນາມພ້ອມຄະນະ ໄດ້ເຂົ້າອວຍພອນ ສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ພ້ອມດ້ວຍຄະນະ.
ສະຫາຍນາງ ຫງວຽນ ທິ ຮ່ວາງ ເວີນ ໄດ້ກ່າວສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານອັນໃຫຍ່ຫຼວງ, ຮອບດ້ານ, ເລິກເຊິ່ງຕະຫຼອດໄລຍະ 68 ປີ ຜ່ານມາພາຍໃຕ້ການຊີ້ນໍາ-ນຳພາຂອງພັກປະຊາຊົນ ປະຕິວັດລາວ ທີ່ຕໍ່ສູ້ຢ່າງພິລະອາດຫານຕ້ານການຮຸກຮານຂອງພວກລ່າເມືອງຂຶ້ນ ແບບເກົ່າ ແລະ ແບບໃໝ່ ຈົນໄດ້ຮັບໄຊຊະນະ ສະຖາປະນາ ສປປ ລາວ ໃນປີ 1975 ຢ່າງສະຫງ່າອົງອາດ, ສືບຕໍ່ນຳພາປະຊາຊົນທັງຊາດ ດຳເນີນສອງໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາ ພັດທະນາປະເທດຊາດ. ພິເສດບັນດາໝາກຜົນທີ່ຍາດມາ ຕະຫຼອດໄລຍະກວ່າສາມທົດສະວັດ ພາຍຫຼັງການປະຕິບັດການປ່ຽນແປງໃໝ່. ພ້ອມນັ້ນ, ສະຫາຍນາງ ຫງວຽນ ທິ ຮ່ວາງ ເວີນ ຍັງໄດ້ສະແດງຄວາມເອກອ້າງທະນົງໃຈທີ່ເຫັນວ່າສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ທີ່ປະທານ ໂຮ່ຈິມິນ, ປະທານ ໄກສອນ ພົມວິຫານ, ປະທານ ສຸພານຸວົງ ທີ່ແສນເຄົາລົບຮັກ ຂອງປະຊາຊົນຫວຽດນາມ ແລະ ລາວ ກໍຄືບັນດາຮຸ່ນການນຳຕ່າງໆຂອງ ສອງພັກ, ສອງລັດ ແລະ ປະຊາຊົນສອງປະເທດ ໄດ້ເພີ່ມພູນຄູນສ້າງ ແລະ ຮັກສາໄວ້ໃຫ້ຮຸ່ນຄົນຕໍ່ໄປສືບຕໍ່ຖະນຸຖະໜອມ ໃຫ້ນັບມື້ຈົ່ງຂຽວສົດງົດງາມໝັ້ນຄົງຂະໜົງແກ່ນຕະຫຼອດໄປ.
ໃນໂອກາດນີ້ ສະຫາຍ ແສງເພັດ ຮຸ່ງບຸນຍວງ ໄດ້ສະແດງຄວາມຂອບໃຈຢ່າງຈິງໃຈມາຍັງ ສະຫາຍນາງ ຫງວຽນ ທິ ຮ່ວາງ ເວີນ ທີ່ໄດ້ນຳພາຄະນະມາອວຍພອນ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີ ເປັນການເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ – ຫວຽດນາມ, ຫວຽດນາມ – ລາວ. ສະຫາຍ ແສງເພັດ ຮຸ່ງບຸນຍວງ ໄດ້ຕາງໜ້າໃຫ້ແກ່ພັກ, ລັດ ແລະ ປະຊາຊົນລາວບັນດາເຜົ່າ ສະແດງຄວາມຂອບໃຈຢ່າງຈິງໃຈໄປຍັງພັກ, ລັດ ແລະ ປະຊາຊົນຫວຽດນາມອ້າຍນ້ອງທີ່ຍາມໃດກໍໃຫ້ການສະໜັບສະໜູນ, ຊ່ວຍເຫຼືອອັນລໍ້າຄ່າແກ່ ສປປ ລາວ ຕະຫຼອດມາ ບໍ່ວ່າຈະຢູ່ສະໄໝຕໍ່ສູ້ຍາດເອົາເອກະລາດ ກໍຄືໃນໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະໃນໄລຍະທີ່ມີການແຜ່ລະບາດຂອງເຊື້ອພະຍາດໂຄວິດ-19 ກໍຄືໃນໄລຍະທີ່ ສປປ ລາວ ພົບຄວາມຫຍຸ້ງຍາກທາງດ້ານເສດຖະກິດການເງິນ ຊຶ່ງບັນດາໝາກຜົນທີ່ ສປປ ລາວ ຍາດມາໄດ້ນັ້ນບໍ່ສາມາດຕັດແຍກການສະໜັບສະໜູນ ແລະ ຊ່ວຍເຫຼືອຂອງພັກ, ລັດ ແລະ ປະຊາຊົນຫວຽດນາມ. ສະຫາຍ ແສງເພັດ ຮຸ່ງບຸນຍວງ ຍັງໄດ້ໃຫ້ຄໍາໝັ້ນສັນຍາວ່າ ຈະເຮັດສຸດຄວາມສາມາດຂອງຕົນໃນການເປັນຂົວຕໍ່ ແລະ ປະສານສົມທົບກັບຄະນະພົວພັນຕ່າງປະເທດສູນກາງພັກ ກໍຄືກະຊວງການຕ່າງປະເທດຫວຽດນາມໃນການເພີ່ມພູນຄູນສ້າງສາຍພົວພັນມິມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງລາວ – ຫວຽດນາມ, ຫວຽດນາມ – ລາວ ໃຫ້ຈະເລີນງອກງາມຂຶ້ນໄປເລື້ອຍໆ. ໂດຍສະເພາະການປະສານສົມທົບເພື່ອຈັດຕັ້ງຜັນຂະຫຍາຍບັນດາຂໍ້ຕົກລົງຕ່າງໆກ່ຽວກັບການຮ່ວມມືຂອງສອງພັກ, ສອງລັດໃຫ້ມີປະສິດທິຜົນ ເພື່ອນຳເອົາຜົນປະໂຫຍດທີ່ແທ້ຈິງສູ່ປະຊາຊົນສອງຊາດລາວ-ຫວຽດນາມ.
ນອກຈາກນີ້, ສອງຝ່າຍໄດ້ສະແດງຄວາມເພິ່ງພໍໃຈ ແລະ ຕີລາຄາສູງ ຕໍ່ການພົວພັນຮ່ວມມືລະຫວ່າງສອງປະເທດ ໄລຍະທີ່ຜ່ານມາ ພິເສດໃນປີ 2022, ສອງຝ່າຍໄດ້ຮ່ວມກັນຈັດກິດຈະກໍາຕ່າງໆ ເພື່ອພ້ອມກັນສະເຫຼີມສະຫຼອງສອງປະຫວັດສາດ ຄື: ວັນສ້າງຕັ້ງສາຍພົວພັນການທູດ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ທີ່ເຕັມໄປດ້ວຍບັນຍາກາດ ແລະ ເນື້ອໃນອຸດົມສົມບູນ.
ຂ່າວ, ພາບ: ສະຖານທູດລາວທີ່ຮ່າໂນ້ຍ
