ຈໍານວນຜູ້ເສຍຊີວິດຈາກພາຍຸເຟຣດດີເພີ່ມຂຶ້ນຫລາຍກວ່າ 500 ຄົນ ເນື່ອງຈາກການປ່ຽນແປງຂອງສະພາບອາກາດໂລກ ຈຶ່ງເຮັດໃຫ້ພາຍຸຮຸນແຮງຂຶ້ນ
ລາຍງານຈາກມາລາວີ, ໂມຊໍາບິກ ແລະ ມາດາກັດສະກາ ລະບຸວ່າ: ຈໍານວນຜູ້ເສຍຊີວິດຈາກພາຍຸເຟຣດດີລວມ 3 ປະເທດ ເພີ່ມຂຶ້ນເຖິງ 522 ຄົນແລ້ວ.
ສໍາລັບມາລາວີເຊິ່ງເປັນປະເທດທີ່ໄດ້ຮັບຜົນກະທົບໜັກສຸດ ຈໍານວນຜູ້ເສຍຊີວິດທີ່ມີການລາຍງານໃນວັນທີ 18 ມີນາ ມີທັງໝົດ 438 ຄົນ ໂດຍທາງການໄດ້ປະກາດໄວ້ອາໄລທົ່ວປະເທດເປັນເວລາ 14 ວັນ ນັບແຕ່ວັນທີ 16 ມີນາ ແລະ ໄດ້ຈັດຕັ້ງສູນອົບພະຍົບຫລາຍຮ້ອຍແຫ່ງທົ່ວປະເທດເພື່ອຊ່ວຍເຫລືອຜູ້ປະສົບໄພນັບໝື່ນຄົນ ເຊິ່ງຕອນນີ້ບໍ່ມີບ່ອນຢູ່ອາໄສ ລວມທັງປະຊາຊົນອີກປະມານ 345.000 ຄົນທີ່ໄດ້ຮັບຜົນກະທົບຈາກຝົນຕົກໜັກ, ນໍ້າຖ້ວມ ແລະ ດິນເຈື່ອນ.
ສໍາລັບຢູ່ໂມຊໍາບິກ ມີປະຊາຊົນຢ່າງໜ້ອຍ 67 ຄົນເສຍຊີວິດ, ສ່ວນຜູ້ບໍ່ມີບ່ອນຢູ່ອາໄສມີປະມານ 50.000 ຄົນ. ເຖິງຢ່າງໃດກໍຕາມ, ຄາດວ່າຈໍານວນຜູ້ເສຍຊີວິດຢູ່ທັງສອງປະເທດຈະເພີ່ມຂຶ້ນອີກ, ສ່ວນຈໍານວນຜູ້ເສຍຊີວິດຢູ່ມາດາກັດສະກາມີຢ່າງໜ້ອຍ 17 ຄົນ.
ພາຍຸເຟຣດດີພັດຂຶ້ນຝັ່ງຄັ້ງທໍາອິດໃນວັນທີ 21 ກຸມພາ ຢູ່ມາດາກັດສະກາ ກ່ອນຈະເຄື່ອນທີ່ພັດຖະຫລົ່ມໂມຊໍາບິກ ແລະ ຢ້ອນກັບລົງມະຫາສະໝຸດອິນເດຍ ຈາກນັ້ນໃນວັນທີ 11 ມີນາ ພາຍຸເຟຣດດີໄດ້ພັດເຂົ້າໂມຊໍາບິກເປັນຄັ້ງທີ 2 ກ່ອນຈະເຄື່ອນທີ່ເຂົ້າມາລາວີໃນອາທິດຜ່ານມາຈົນສ້າງຄວາມເສຍຫາຍຢ່າງໜັກ ລະດັບນໍ້າຖ້ວມສູງຂຶ້ນຢ່າງວ່ອງໄວ, ເສັ້ນທາງສັນຈອນ ແລະ ຂົວຫລາຍຈຸດເປ່ເພເສຍຫາຍ, ເກີດສະພາບດິນເຈື່ອນ ສົ່ງຜົນໃຫ້ການປະຕິບັດພາລະກິດຊ່ວຍເຫລືອຜູ້ປະສົບໄພເປັນໄປດ້ວຍຄວາມຍາກລໍາບາກຂຶ້ນ.
ທັງນີ້, ນັກວິທະຍາສາດລະບຸວ່າ: ສະພາບໂລກປັ່ວປ່ວນມີສ່ວນເຮັດໃຫ້ພາຍຸທະວີຄວາມຮຸນແຮງຂຶ້ນກວ່າປົກກະຕິ ເນື່ອງຈາກການປ່ຽນແປງຂອງສະພາບອາກາດໂລກ ເຮັດໃຫ້ພາຍຸດູດຮັບຄວາມຊຸ່ມຫລາຍຂຶ້ນ, ເກີດລົມພັດແຮງຂຶ້ນ ສົ່ງຜົນໃຫ້ມີຄວາມຮຸນແຮງເພີ່ມຂຶ້ນ.
ອ້າງອີງ:
https://www.aljazeera.com/…/they-dont-respect-us…
