BBC ສັ່ງລົບ TikTok ອອກຈາກອຸປະກອນຂອງບໍລິສັດ ຕາມຮອຍລັດຖະບານຕາເວັນຕົກ
ສໍານັກຂ່າວ BBC ຂອງອັງກິດ ສັ່ງໃຫ້ພະນັກງານລົບແອັບ TikTok ອອກຈາກອຸປະກອນຂອງບໍລິສັດ ຕາມທິດທາງດຽວກັບລັດຖະບານຂອງຫລາຍປະເທດຕາເວັນຕົກທີ່ພາກັນຫ້າມນຳຊ້ແອັບດັ່ງກ່າວເມື່ອມໍ່ໆມານີ້.
ວັນທີ 19 ມີນາ, ສໍານັກຂ່າວ BBC ໄດ້ອອກໜັງສືເຖິງພະນັກງານ ໂດຍມີເນື້ອໃນວ່າ: “ພວກເຮົາບໍ່ແນະນໍາໃຫ້ຕິດຕັ້ງແອັບ TikTok ໃນອຸປະກອນຂອງບໍລິສັດ, ຍົກເວັ້ນແຕ່ຈະມີເຫດຜົນຈໍາເປັນທາງທຸລະກິດ ຖ້າທ່ານບໍ່ຈໍາເປັນຕ້ອງໃຊ້ TikTok ເພື່ອເຫດຜົນດັ່ງກ່າວ ຄວນລົບອອກຈາກອຸປະກອນເຫລົ່ານັ້ນ”.
ການເຄື່ອນໄຫວດັ່ງກ່າວມີຂຶ້ນ ຫລັງວັນທີ 16 ມີນາຜ່ານມາ, ອັງກິດຫາກໍປະກາດຫ້າມນໍາໃຊ້ TikTok ໃນອຸປະກອນຂອງລັດ ແລະ ມີຜົນບັງຄັບໃຊ້ທັນທີ ໂດຍອັງກິດເປີດເຜີຍວ່າ: ເຖິງວ່າເຈົ້າໜ້າທີ່ຂອງລັດຈະບໍ່ໄດ້ນຳໃຊ້ແອັບດັ່ງກ່າວຢ່າງແພ່ຫລາຍເມື່ອທຽບໃສ່ປະເທດອື່ນໆ, ແຕ່ການຕັດສິນໃຈຄັ້ງນີ້ມີຂຶ້ນໂດຍຄໍານຶງເຖິງຄວາມສ່ຽງທີ່ມີຕໍ່ອຸປະກອນຂອງພາກລັດ.
ທັງນີ້, BBC ໃຫ້ເຫດຜົນວ່າ: ການຕັດສິນໃຈດັ່ງກ່າວມີຂຶ້ນຕາມການພິຈາລະນາຂອງໜ່ວຍງານລັດຖະບານທົ່ວໂລກກ່ຽວກັບການເປັນສ່ວນຕົວ ແລະ ຄວາມປອດໄພຂອງຂໍ້ມູນຜູ້ໃຊ້. ສໍາລັບພະນັກງານທີ່ມີ TikTok ຢູ່ໃນໂທລະສັບສ່ວນຕົວ ແຕ່ຈໍາເປັນຕ້ອງໃຊ້ໂທລະສັບດັ່ງກ່າວເພື່ອຕິດຕໍ່ປະສານງານກັບ BBC ຈະຂໍໃຫ້ພະນັກງານເຫລົ່ານັ້ນຕິດຕໍ່ກັບທີມຄວາມໝັ້ນຄົງທາງຂໍ້ມູນຂອງບໍລິສັດ ເພື່ອຫາລືເຖິງແນວທາງທີ່ເໝາະສົມຕໍ່ໄປ.
ອ້າງອີງ:
https://www.theguardian.com/…/bbc-urges-staff-to-delete…
https://www.independent.co.uk/…/bbc-delete-tiktok-ban…
