ປະທານສານປະຊາຊົນສູງສຸດ ເນັ້ນພະນັກງານສານແຂວງບໍ່ແກ້ວ ເອົາໃຈໃສ່ປະຕິບັດວຽກງານໃຫ້ເຂັ້ມງວດ ເພື່ອຫລຸດຜ່ອນປາກົດການຫຍໍ້ທໍ້ທີ່ອາດຈະເກີດຂຶ້ນໃນຕໍ່ໜ້າ

ໃນໂອກາດທີ່ ທ່ານ ສຈ ປອ ນາງ ວຽງທອງ ສີພັນດອນ ເຂົ້າຮ່ວມກອງປະຊຸມພົບປະພະນັກງານສານປະຊາຊົນແຂວງບໍ່ແກ້ວ  ທ່ານໄດ້ເນັ້ນໜັກຫລາຍບັນຫາ ເພື່ອເປັນບ່ອນອີງໃຫ້ບັນດາພະນັກງານສານປະຊາຊົນແຂວງບໍ່ແກ້ວ ນໍາໄປປັບປຸງການເຄື່ອນໄຫວວຽກງານໃຫ້ດີຂຶ້ນ ເປັນຕົ້ນແມ່ນຕ້ອງເອົາໃຈໃສ່ສຶກສາອົບຮົມການເມືອງ-ນໍາພາແນວຄິດໃຫ້ພະນັກງານຢ່າງເປັນປົກກະຕິ ແລະ ຕໍ່ເນື່ອງເພີ່ມທະວີການນໍາພາຂອງພັກເຂົ້າໃນການພິຈາລະນາແກ້ໄຂຄະດີ ແລະ ຕ້ອງຮັບປະກັນປະຕິບັດຕາມຫລັກການ ແລະ ຂັ້ນຕອນຂອງການດໍາເນີນຄະດີຢ່າງເຂັ້ມງວດ, ມີຄວາມລະອຽດ, ຮອບຄອບ; ພັດທະນາກົນໄກຂອງການດໍາເນີນຄະດີໃຫ້ມີຄວາມວ່ອງໄວ, ໂປ່ງໃສ, ກວດກາ ໄດ້ທັງຫລຸດຜ່ອນຂັ້ນຕອນທີ່ບໍ່ຈໍາເປັນ ເພື່ອເຮັດໃຫ້ການຕັດສິນຄະດີບັນລຸຕາມຄາດໝາຍ ແລະ ຮັບປະກັນໄດ້ການຕັດສິນໃຫ້ມີຄຸນນະພາບ; ສືບຕໍ່ຕິດຕາມ ແລະ ຊຸກຍູ້ຄະນະກໍາມະການຕິດຕາມກວດກາການປະຕິບັດໜ້າທີ່ ແລະ ການປະພຶດຂອງຜູ້ພິພາກສາຢູ່ສານຂອງຕົນໃຫ້ເຄື່ອນໄຫວແຂງ ແຮງ ແລະ ເປັນປົກກະຕິ; ພ້ອມນັ້ນ, ຕ້ອງເອົາໃຈໃສ່ໃນການປະສານສົມທົບກັບບັນດາພາກສ່ວນທີ່ກ່ຽວຂ້ອງກັບ ການດໍາເນີນຄະດີຕາມຂະບວນຍຸຕິທໍາ ເພື່ອປຶກສາຫາລືແກ້ໄຂຮ່ວມກັນ ເພື່ອຮັບປະກັນໃຫ້ການດໍາເນີນຄະດີມີຄວາມຮັດກຸມ, ເປັນທີ່ເຊື່ອຖື ແລະ ຍອມຮັບຂອງປະຊາຊົນ ແລະ ສໍາຄັນແມ່ນຕ້ອງເດັດດ່ຽວ ແກ້ໄຂໃຫ້ໄດ້ຄວາມອັ່ງອໍ, ຊັກຊ້າ ແກ່ຍາວຂອງການດໍາເນີນຄະດີໃຫ້ຕົກໄປ.

ທັງນີ້, ກໍເພື່ອເປັນການປັບປຸງ ແລະ ກໍ່ສ້າງໃຫ້ໄດ້ພະນັກງານຂອງສານທີ່ດີເດັ່ນ ແລະ ມີຄຸນນະພາບ ສາມາດນໍາໄປຈັດຕັ້ງຜັນຂະຫຍາຍເຂົ້າໃນວຽກງານຕົວຈິງໃຫ້ມີຜົນສໍາເລັດ ແນໃສ່ສ້າງຄວາມເຂັ້ມແຂງໃຫ້ອົງການຕຸລາການກາຍເປັນທີ່ເພິ່ງ, ໄວ້ເນື້ອເຊື່ອ ໃຈຂອງປະຊາຊົນ, ເປັນທີ່ຍອມຮັບຂອງສັງຄົມ ແລະ ເຮັດໃຫ້ຫາງສຽງຈົ່ມວ່າຈາກສັງຄົມຕໍ່ການແກ້ໄຂຄະດີຂອງສານຫລຸດລົງເທື່ອລະກ້າວ.