ທາງການໄທອອກຖະແຫລງພົບຊີຊຽມ-137 ທີ່ຖືກຫລອມຢູ່ໂຮງງານຫລອມເຫລັກ ຈັງຫວັດປາຈີນບູລີ

ຈາກກໍລະນີ ວັດຖຸກຳມັນຕະພາບລັງສີຊີຊຽມ-137 ສູນຫາຍຈາກໂຮງງານໄຟຟ້າແຫ່ງໜຶ່ງໃນ ອຳເພີ ສີມະຫາໂພທິ ຈັງຫວັດປາຈີນບູລີ ຈຶ່ງເປັນເຫດເຮັດໃຫ້ເຈົ້າໜ້າທີ່ໜ່ວຍງານທີ່ກ່ຽວຂ້ອງເລັ່ງຕິດຕາມສືບຕໍ່ຄົ້ນຫາສານດັ່ງກ່າວ ຕັ້ງແຕ່ຕົ້ນທາງເຖິງປາຍທາງວ່າສານກຳມັນຕະພາບລັງສີດັ່ງກ່າວໄປຢູ່ໃສ ເພື່ອເຂົ້າຈັດການພື້ນທີ່ ແລະ ປ້ອງກັນບໍ່ໃຫ້ເກີດອັນຕະລາຍ.

ມາຮອດວັນທີ 19 ມີນາ 2023, ຈັງຫວັດ ປາຈີນບູລີ ມີການປະກາດປິດໂຮງງານຫລອມເຫລັກໃນເຂດອຸດສາຫະກຳ ພ້ອມຫ້າມບໍ່ໃຫ້ພະນັກງານທັງໝົດເຂົ້າ-ອອກໂຮງງານ ເພື່ອຄວາມປອດໄພ, ດັ່ງນັ້ນເຈົ້າໜ້າທີ່ໄດ້ລົງພື້ນທີ່ໂດຍເຂົ້າກວດໂຮງງານຫລອມເຫລັກ 2 ແຫ່ງ. ຈາກການກວດສອບເບື້ອງຕົ້ນພົບວ່າ: ເປັນໂຮງງານຫລອມເຫລັກທີ່ໃຫຍ່ທີ່ສຸດມີເຕົາຫລອມ 8 ເຕົາ, ໃນແຕ່ລະວັນມີລົດບັກທຸກເສດເຫລັກ ແລະ ເຫລັກທີ່ຫລອມແລ້ວເຂົ້າ-ອອກ ເປັນຈຳນວນຫລາຍ ຈຶ່ງຄາດວ່າ ຊີຊຽມ-137 ອາດຖືກຂາຍເປັນເຫລັກເສດເພື່ອຈະນຳໄປຫລອມ, ດັ່ງນັ້ນເຈົ້າໜ້າທີ່ຈຶ່ງໃຊ້ເຄື່ອງມືຂອງສຳນັກງານປະລະມະນູເພື່ອສັນຕິ ເຂົ້າກວດສະແກນຫາລັງສີຕາມກອງເຫລັກເສດທີ່ຖືກບີບອັດເປັນແທ່ງເພື່ອລໍຖ້າເຂົ້າເຕົາຫລອມ ພົບວ່າບາງຈຸດເຄື່ອງກວດຈັບສານບາງຢ່າງໄດ້ແຕ່ບໍ່ລະບຸຊະນິດ ຈຶ່ງປະສານຫາເຈົ້າໜ້າທີ່ພະລັງງານປະລະມະນູເພື່ອສັນຕິເຂົ້າກວດສອບຢ່າງລະອຽດຈຶ່ງຮູ້ວ່າເປັນສານກຳມັນຕະພາບລັງສີຊີຊຽມ-137 ສະພາບຖືກອັດເປັນກ້ອນສີ່ຫລ່ຽມກອງຊ້ອນກັນເປັນຊັ້ນສູງ ກຽມຫລອມໃນຕອນແລງ ຈຶ່ງປະກາດປິດໂຮງງານທັນທີ.

ຫລ້າສຸດ ຕອນທ່ຽງຂອງວັນທີ 20 ມີນາ 2023 ທາງການໄທ ໄດ້ອອກຖະແຫລງການວ່າ ໄດ້ພົບ ຊີຊຽມ-137 ຖືກນໍາໄປຫລອມແລ້ວ ທີ່ໂຮງງານຫລອມເຫລັກ ຈັງຫວັດປາຈີນບູລີ ແຕ່ໃນໂຮງງານຫລອມດັ່ງກ່າວນັ້ນເປັນພື້ນທີ່ປິດ ພ້ອມມີແນວກອງອາກາດ ແລະ ຍັງບໍ່ພົບການແຜ່ກະຈາຍໄປຕາມອາກາດ ໃນບໍລິເວນໃກ້ຄຽງ.

ທ່ານ ລົນນະລົງ ນະຄອນຈິນດາ ຜູ້ວ່າການ ຈັງຫວັດປາຈີນບູລີ ປະເທດໄທ ລາຍງານວ່າ: ປັດຈຸບັນ ເຮົາໄດ້ພົບ ຊີຊຽມ 137 ຖືກຫລອມລະລາຍໄປເປັນທີ່ຮຽບຮ້ອຍແລ້ວ ແຕ່ເຮັດໃນພື້ນທີ່ປິດ ແລະ ທາງການໄດ້ສັ່ງໃຫ້ຈຳກັດພື້ນທີ່ ບໍ່ໃຫ້ຄົນເຂົ້າອອກ ແລະ ໄດ້ສັ່ງໃຫ້ປີດໂຮງງານຊົ່ວຄາວ ເປັນທີ່ຮຽບຮ້ອຍແລ້ວ.

.