ທ່ານ ປູຕິນ ພົບປະເຈລະຈາກັບທ່ານ ສີຈິ້ນຜິງ ຢືນຢັນພ້ອມຫາລືແຜນສັນຕິພາບທີ່ຈີນສະເໜີ

ປະທານປະເທດ ສີຈິ້ນຜິງ ຂອງຈີນ ໄດ້ພົບປະເຈລະຈາຢ່າງເປັນທາງການນໍາປະທານາທິບໍດີ ວະລາດິເມຍ ປູຕິນ ຂອງຣັດເຊຍ ໃນວັນທີ 20 ມີນາ ລະຫວ່າງການຢ້ຽມຢາມນະຄອນຫລວງມົດສະກູເປັນເວລາ 3 ວັນ ໂດຍຖືເປັນການຢ້ຽມຢາມຣັດເຊຍຄັ້ງທໍາອິດຂອງຜູ້ນໍາຈີນ ຫລັງຈາກຣັດເຊຍເປີດສາກສົງຄາມບຸກອູແກຣນເປັນເວລາ 1 ກວ່າປີຜ່ານມາ.

ການເຈລະຈາຂອງທັງສອງຜູ້ນໍາມີຂຶ້ນຢູ່ເກຼມລິນ ໂດຍທ່ານ ສີຈິ້ນຜິງ ແລະ ທ່ານ ປູຕິນ ຕ່າງທັກທາຍ ແລະ ເອີ້ນກັນວ່າ: “ໝູ່ຮັກ” ແລະ ໃຊ້ເວລາໃນການເຈລະຈາເຖິງ 4 ຊົ່ວໂມງ ໂດຍສໍານັກຂ່າວ Xinhua ຂອງຈີນລາຍງານວ່າ: ເປັນການເຈລະຈາທີ່ເຈາະເລິກ ແລະ ກົງໄປກົງມາ.

ຜູ້ນໍາທັງສອງປະເທດໃນຍົກບັນຫາສົງຄາມອູແກຣນຂຶ້ນມາເຈລະຈາ ແລະ ກ່າວເຖິງແຜນສັນຕິພາບ 12 ປະການທີ່ລັດຖະບານປັກກິ່ງສະເໜີເພື່ອປ້ອງກັນການລຸກລາມຂອງສົງຄາມອູແກຣນໄປເຖິງຈຸດທີ່ຄວບຄຸມບໍ່ໄດ້.

ໂດຍທ່ານ ປູຕິນ ກ່າວຕໍ່ທ່ານ ສີຈິ້ນຜິງ ວ່າ: ຣັດເຊຍພ້ອມສໍາລັບການຫາລືຕໍ່ຂໍ້ສະເໜີຂອງຈີນເພື່ອຢຸດສົງຄາມໃນອູແກຣນ ແລະ ຢືນຢັນວ່າ: ຣັດເຊຍ “ເປີດຮັບຂະບວນການເຈລະຈາສະເໝີ”.

ເຖິງຢ່າງໃດກໍຕາມ, ທ່ານ ສີຈິ້ນຜິງ ແລະ ທ່ານ ປູຕິນ ມີກໍານົດເຈລະຈາກັນຢ່າງເປັນທາງການໃນວັນທີ 21 ມີນາ ໂດຍສໍານັກຂ່າວ TASS ຂອງທາງການຣັດເຊຍລາຍງານວ່າ: ອາດມີການຫາລືຫລາຍບັນຫາສໍາຄັນ ລວມທັງການຮ່ວມມືດ້ານພະລັງງານ, ກອງທັບ ແລະ ການຄ້າ.

ອ້າງອີງ:

https://www.bbc.com/news/world-asia-65018657

https://www.reuters.com/…/putin-meets-dear-friend-xi…/

https://edition.cnn.com/…/h_c2d0ec8b0cb46edef7d69dd4696…

https://www.channelnewsasia.com/…/russia-putin-xi…

https://tass.com/politics/1591737