ຕົວະຍົວະຫລອກລວງເອົາລົດຈັກ 2 ຄັນ ໄປຂາຍ ສຸດທ້າຍໄປບໍ່ລອດ ຖືກເຈົ້າໜ້າທີ່ຈັບມາດໍາເນີນຄະດີ

ອີງຕາມປ້ອງກັນຄວາມສະຫງົບ ນະຄອນຫລວງວຽງຈັນ ລາຍງານວ່າ:ທ່ານ ພັທ ສີພອນ ວິໄລສິນ ຮອງຫົວໜ້າພະແນກຕໍາຫລວດ ປກສ ເມືອງນາຊາຍທອງ ນວ ໃຫ້ຮູ້ວ່າພາຍຫລັງໄດ້ຮັບແຈ້ງຄວາມຈາກຜູ້ເສຍຫາຍ 2 ຄົນ ວ່າ ທ້າວ ໄໝ ອາຍຸ 48 ປີ ກໍາມະກອນ ຢູ່ບ້ານແສນຊຸມ ເມືອງໂພນໂຮງ ແຂວງວຽງຈັນ ໄດ້ຕົວະຍົວະຫລອກລວງເອົາລົດຈັກ ຄລິກໄອ CLICK I ສີດໍາ ໄປຂາຍ ໃນໄລຍະເດືອນຕຸລາ ແລະ ລົດຈັກເວບ 100 ສີດໍາ ໃນເດືອນທັນວາ 2022. ດັ່ງນັ້ນ, ເຈົ້າໜ້າທີ່ຈຶ່ງໄດ້ສົມທົບກັບພາກສ່ວນກ່ຽວຂ້ອງລົງກວດກາສະຖານທີ່ເກີດເຫດ ແລະ ຕິດຕາມເປົ້າໝາຍສົງໄສຕາມຈຸດຕ່າງໆຕາມທີ່ໄດ້ຮັບແຈ້ງຄວາມໄວ້. ຮອດວັນທີ 1 ກຸມພາ 2023, ກໍສາມາດກັກຕົວ ທ້າວ ໄໝ ໄດ້; ພ້ອມທັງເກັບກູ້ຂອງກາງລົດຈັກ 2 ຄັນ ຄືນມາໄດ້ໃນເດືອນດຽວກັນ.

ຜ່ານການສອບສວນ ທ້າວ ໄໝ ຮັບສາລະພາບຕໍ່ເຈົ້າໜ້າທີ່ ປກສ ເມືອງນາຊາຍທອງວ່າ: ຕົນໄດ້ຫລອກລວງເອົາລົດຈັກ 2 ຄັນແທ້ ໂດຍໄດ້ນໍາໄປຂາຍ ແລ້ວເອົາເງິນໄປໃຊ້ຈ່າຍຈົນໝົດ; ເຊິ່ງລົດຈັກຄລິກໄອ ສີດໍາ ຂາຍໃຫ້ຄົນຮູ້ຈັກ ຢູ່ບ້ານວຽງທອງ ເມືອງຫີນເຫີບ ແຂວງວຽງຈັນ ແລະລົດຈັກ ເວບ 100 (Wave 100) ສີດໍາ ຢູ່ເຂດບ້ານສາຍລົມ ເມືອງຈັນທະບູລີ ໄດ້ເງິນທັງໝົດ 10.000.000 ກີບ.

ທ່ານ ພັທ ສີພອນ ວິໄລສິນ ໃຫ້ຮູ້ຕື່ມວ່າ: ປັດຈຸບັນ ລົດຈັກທັງສອງຄັນແມ່ນ ໄດ້ມອບໃຫ້ເຈົ້າຂອງເດີມແລ້ວ ໃນວັນທີ 10 ມີນາ 2023; ສ່ວນ ທ້າວ ໄໝ ເຈົ້າໜ້າທີ່ ປກສ ເມືອງນາຊາຍທອງ ແມ່ນໄດ້ສະຫລຸບສໍານວນຄະດີສົ່ງມອບ ໃຫ້ໄອຍະການດໍາເນີນຄະດີຕາມກົດໝາຍ.