ຈີນ-ຣັດເຊຍ ບັນລຸຂໍ້ຕົກລົງທາງເສດຖະກິດ ເລັ່ງເພີ່ມມູນຄ່າການຄ້າ ແລະ ທຸລະກໍາ ໃນຮູບສະກຸນເງິນ “ຣູເບິລ-ຢວນ” ພາຍໃນປີ 2030
ປະທານປະເທດ ສີຈິ້ນຜິງ ຂອງຈີນ ແລະ ປະທານາທິບໍດີ ວະລາດິເມຍ ປູຕິນ ຂອງຣັດເຊຍ ບັນລຸຂໍ້ຕົກລົງຈະເພີ່ມການຮ່ວມມືທາງເສດຖະກິດ ແລະ ທຸລະກິດລະຫວ່າງກັນເຊັ່ນ: ການເພີ່ມປະລິມານທຸລະກໍາການຄ້າໃນຮູບສະກຸນເງິນຣູເບິລ-ຢວນ, ການເພີ່ມການຮ່ວມມືດ້ານຄວາມໝັ້ນຄົງທາງພະລັງງານ ແລະ ອາຫານ ແລະ ການພັດທະນາໂຄງສ້າງລະບົບຂົນສົ່ງທາງລົດໄຟຂ້າມແດນຮ່ວມກັນພາຍໃນປີ 2030.
ປັດຈຸບັນ ທ່ານ ສີຈິ້ນຜິງ ຢູ່ລະຫວ່າງການເດີນທາງຢ້ຽມຢາມຣັດເຊຍຢ່າງເປັນທາງການ. ທັງ 2 ປະເທດໄດ້ເປີດເຜີຍລາຍລະອຽດຂອງຂໍ້ຕົກລົງໃນຄັ້ງນີ້ຜ່ານຖະແຫລງການຂອງລັດຖະບານ ໂດຍຝ່າຍຈີນລະບຸວ່າ: ຈີນໃຫ້ຄໍາໝັ້ນຈະເພີ່ມມູນຄ່າການຄ້າແບບທະວີພາຄີກັບຣັດເຊຍພາຍໃນປີ 2030. ຂະນະທີ່ຣັດເຊຍໃຫ້ລາຍລະອຽດວ່າ: ມູນຄ່າການຄ້າລະຫວ່າງຈີນ ແລະ ຣັດເຊຍຈະເພີ່ມຂຶ້ນຫລາຍເທົ່າຕໍ່ຈາກນີ້.
ປັດຈຸບັນຈີນຖືເປັນຄູ່ຄ້າອັນດັບ 1 ຂອງຣັດເຊຍ ໃນປີຜ່ານມາມູນຄ່າການສົ່ງອອກສິນຄ້າຂອງຣັດເຊຍໄປຈີນຂະຫຍາຍຕົວຂຶ້ນເກືອບ 49% ມູນຄ່າປະມານ 7,63 ແສນລ້ານຢວນ ຫລື 1,1 ແສນລ້ານໂດລາ ສູງກວ່າປີ 2021 ທີ່ເຕີບໃຫຍ່ປະມານ 28%.
ຖະແຫລງການຈາກຣັດເຊຍເປີດເຜີຍວ່າ: ພາຍໃນປີ 2030 ທັງ 2 ປະເທດມີແຜນຈະລົງທຶນໃນໂຄງການສໍາຄັນຮ່ວມກັນເຖິງ 80 ໂຄງການ ມູນຄ່າການລົງທຶນປະມານ 1,65 ແສນລ້ານໂດລາ. ນອກຈາກນີ້ ຣັດເຊຍຍັງຢືນຢັນວ່າຈະສະໜັບສະໜູນການຄ້າໃນຮູບສະກຸນເງິນຣູເບິລ-ຢວນໃຫ້ມີປະລິມານສູງຂຶ້ນ.
ລັດຖະບານຂອງຣັດເຊຍເປີດເຜີຍອີກວ່າ: ປັດຈຸບັນຈີນກັບຣັດເຊຍຢູ່ລະຫວ່າງຂະຫຍາຍທໍ່ສົ່ງແກັສທໍາມະຊາດໃນໄຊບີເຣຍຮ່ວມກັນ ເພື່ອຮອງຮັບການສັ່ງຊື້ພະລັງງານທີ່ຈະເພີ່ມສູງຂຶ້ນໃນອະນາຄົດ. ຂະນະດຽວກັນທັງສອງປະເທດຍັງມີແຜນຈະເພີ່ມການຮ່ວມມືດ້ານສື່ລະຫວ່າງກັນເຊັ່ນ: ການຮ່ວມກັນຜະລິດລາຍການໂທລະພາບ ແລະ ການເພີ່ມການຮ່ວມມືຂອງສໍານັກຂ່າວໃຫ້ຫລາຍຂຶ້ນ.
