ປະທານສະຫະພັນນັກຮົບເກົ່າແຫ່ງຊາດລາວ ຢ້ຽມຢາມ-ໂອ້ລົມ ສູນເສຍອົງຄະພິເສດ 790 ຜູ້ທີ່ເສຍສະຫລະເລືອດເນື້ອເພື່ອປະເທດຊາດ
ວັນທີ 21 ມີນາ 2023 ນີ້, ສະຫາຍ ພົນໂທ ແສງນວນ ໄຊຍະລາດ ປະທານສະຫະພັນນັກຮົບເກົ່າແຫ່ງຊາດລາວ ພ້ອມດ້ວຍ ສະຫາຍ ພົນຈັດຕະວາ ຄໍາເມົ້າ ຫລ້າຈັນເພັດ ຫົວຫນ້າກົມ 504 ແລະ ຄະນະ ໄດ້ຢ້ຽມຢາມ ແລະ ພົບປະໂອ້ລົມຕໍ່ອະດີດນາຍ ແລະ ພົນທະຫານ ຢູ່ສູນເສຍອົງຄະພິເສດ 790 ເນື່ອງໃນໂອກາດວັນນັກຮົບເສຍອົງຄະ ແລະ ວັນເສຍສະຫລະຊີວິດ ເພື່ອປະເທດຊາດ ຄົບຮອບ 77 ປີ (21/3/1946-21/3/2023).
ສະຫາຍ ພັນໂທ ບຸນມີ ອິນທະວົງສາ ຫົວໜ້າການເມືອງສູນເສຍອົງຄະພິເສດ 790 ລາຍງານໂດຍຫຍໍ້ວ່າ: ສູນເສຍອົງຄະພິເສດ 790 ສ້າງຕັ້ງຂຶ້ນໃນເດືອນກໍລະກົດ ປີ 1990 ໂດຍການຊີ້ນຳ-ນຳພາຂອງກະຊວງປ້ອງກັນປະເທດ ເພື່ອເປັນບ່ອນເຕົ້າໂຮມເອົາພະນັກງານ-ນັກຮົບ ທີ່ເສຍອົງຄະຂັ້ນພິເສດໃນທົ່ວປະເທດ ທີ່ໄດ້ເສຍອົງຄະຍ້ອນການສູ້ຮົບ ແລະ ຮັບໃຊ້ການສູ້ຮົບ ເຂົ້າມາເຕົ້າໂຮມກັນ ຢູ່ສູນແຫ່ງນີ້. ສູນດັ່ງກ່າວປະກອບມີ: ຫ້ອງການ, ໂຮງໝໍ, ສະໂມສອນ, ພາຫະນະຮັບໃຊ້ ແລະ ເຄື່ອງໃຊ້ຕ່າງໆ, ມີເນື້ອທີ່ດິນໃນການຄຸ້ມຄອງເພື່ອຈັດສັນປຸກສ້າງເຮືອນໃຫ້ພະນັກງານເສຍອົງຄະ ແລະ ດິນທຳການຜະລິດຢູ່ພາຍໃນສູນ. ປັດຈຸບັນ ສູນມີຈຳນວນພົນທັງໝົດ 195 ສະຫາຍ, ຍິງ 111 ສະຫາຍ, ມີພະນັກງານເສຍອົງຄະພິເສດ 37 ສະຫາຍ, ເສຍອົງຄະເບົາ 2 ສະຫາຍ, ພະນັກງານບຳນານ 51 ສະຫາຍ, ພະນັກງານດູແລ 50 ສະຫາຍ, ພະນັກງານປະຈຳການ 53 ສະຫາຍ, ພະນັກງານແພດໝໍ 5 ສະຫາຍ, ຄະນະບັນຊາສູນ 5 ສະຫາຍ, ມີ 4 ຂະແໜງການ ແລະ 1 ໂຮງໝໍ 10 ຕຽງ.
ໂອກາດນີ້, ປະທານສະຫະພັນນັກຮົບເກົ່າແຫ່ງຊາດລາວ ໂອ້ລົມວ່າ: ຕະຫລອດໄລຍະຜ່ານມາ, ພັກ-ລັດຖະບານ ກໍຄືກະຊວງປ້ອງກັນປະເທດ ໄດ້ເອົາໃຈໃສ່ເບິ່ງແຍງລ້ຽງດູພະນັກງານ-ນັກຮົບທີ່ເສຍອົງຄະ ເຊິ່ງແມ່ນຜູ້ທີ່ມີຜົນງານ, ຄຸນງາມຄວາມດີຕໍ່ປະເທດຊາດ ດ້ວຍຄວາມເປັນຫ່ວງເປັນໃຍຄືກັບຄົນຢູ່ໃນຄອບຄົວດຽວກັນ, ພະຍາຍາມຊອກຫາທຸກວິທີທາງ ເພື່ອຊ່ວຍເຫລືອ ແລະ ອຳນວຍຄວາມສະດວກໃຫ້ແກ່ພະນັກງານຜູ້ເສຍອົງຄະບໍ່ວ່າຈະເປັນ ທາງດ້ານວັດຖຸ ແລະ ຈິດໃຈ, ປະຕິບັດນະໂຍບາຍດ້ານຕ່າງໆ ຕໍ່ພະນັກງານເສຍອົງຄະ ຍ້ອນການສູ້ຮົບ ແລະ ຮັບໃຊ້ການສູ້ຮົບ, ພະນັກງານບຳນານ ແລະ ພະນັກງານຜູ້ທີ່ມີຜົນງານ, ຄຸນງາມຄວາມດີໃນພາລະກິດຮັບໃຊ້ການປະຕິວັດຊາດ ປະຊາທິປະໄຕ ຕາມນິຕິກຳ ແລະ ຄວາມສາມາດຕົວຈິງທີ່ມີ, ເຖິງແມ່ນວ່າບາງຄັ້ງຍັງບໍ່ທັນສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຕາມການສະເໜີກໍຕາມ ແຕ່ພວກເຮົາກໍໄດ້ພະຍາຍາມເພື່ອແກ້ໄຂ ແລະ ສາມາດຕອບສະໜອງໄດ້ໂດຍພື້ນຖານ. ພ້ອມນັ້ນກໍໃຫ້ສືບຕໍ່ຮັກສາທາດແທ້ມູນເຊື້ອອັນດີງາມ, ເປັນແບບຢ່າງໃນການສຶກສາອົບຮົມໃຫ້ລູກ-ຫລານ ແລະ ຄອບຄົວໃຫ້ກາຍເປັນພົນລະເມືອງທີ່ດີຂອງຊາດ, ຂອງສັງຄົມ ແລະ ກາຍ ເປັນຄອບຄົວພັດທະນາ, ເອົາໃຈ ໃສ່ເພີ່ມທະວີການພັດທະນາເສດຖະກິດຄອບຄົວ, ສັງຄົມຕາມເງື່ອນໄຂ ແລະ ຄວາມສາມາດຕົວຈິງ. ສ່ວນຄະນະພັກ-ຄະນະບັນຊາສູນສືບຕໍ່ເຕົ້າໂຮມຄວາມສາມັກຄີພາຍໃນໃຫ້ແໜ້ນແຟ້ນ, ເອົາໃຈໃສ່ນຳພາ-ຄຸ້ມຄອງນຳໃຊ້ວັດຖຸ-ອຸປະກອນທີ່ຂັ້ນເທິງປະກອບໃຫ້ນຳໃຊ້ໄດ້ຍາວນານ.
