ຕຳກັນ 4 ຄັນຊ້ອນ ບາດເຈັບສາຫັດ 2 ຢູ່ບ້ານໜອງໄຮ ເມືອງຫາດຊາຍຟອງ

ເວລາ 19:30 ໂມງ ຂອງວັນທີ 22 ມີນາ 2023 ຜ່ານມາ ເກີດອຸບັດເຫດລົດຕຳກັນ 4 ຄັນຊ້ອນ ຢູ່ບ້ານໜອງໄຮ ເມືອງຫາດຊາຍຟອງ ນະຄອນຫລວງວຽງຈັນ.

ເບື້ອງຕົ້ນ ທ່ານ ພັຕ ແດງນ້ອຍ ສີຫາລາດ ຫົວໜ້າກອງຮ້ອຍຈະລາຈອນເມືອງຫາດຊາຍຟອງ ໄດ້ລາຍງານໃຫ້ຮູ້ວ່າ: ອຸບັດເຫດເກີດຢູ່ ເສັ້ນທາງເຕ່ 4 ຖະໜົນກຳແພງເມືອງ ບ້ານ ໜອງໄຮ ເມືອງຫາດຊາຍຟອງ ນະຄອນຫລວງວຽງຈັນ, ຈາກການລົງກວດກາສະຖານທີ່ຕົວຈິງ ເບື້ອງຕົ້ນ ລົດເກັງ ຂັບໂດຍທ້າວ ສຸລິນ (ສັນຊາດໄທ) ຢູ່ບ້ານ ຊ່ອງເມັກ ແຂວງ ອຸບົນຣາຊະທານີ ແລ່ນມາແຕ່ເສັ້ນທາງດອນກອຍ, ລົດຮຸນໄດ ແລ່ນມາແຕ່ວົງວຽງໜອງໄຮ ພໍມາຮອດຈຸດເກີດເຫດໄດ້ຕຳເອົາລົດຮຸນໄດ ແລ້ວເສຍຫລັກຕຳເອົາລົດຈັກ ແລະ ລົດໃຫຍ່ອີກຄັນໜຶ່ງ ເຮັດໃຫ້ພາຫະນະເປ່ເພ 4 ຄັນ ບາດເຈັບ 3 ຄົນ ຜູ້ຂັບຂີ່ລົດຈັກ 2 ຄົນ ໄດ້ຮັບບາດເຈັບສາຫັດ (ປັດຈຸບັນຍັງບໍ່ຟື້ນ). ສ່ວນສາເຫດຂອງການເກີດອຸບັດໃນຄັ້ງນີ້ແມ່ນຍັງຢູ່ໃນຂັ້ນຕອນສອບສວນ-ສືບສວນ ຂອງເຈົ້າໜ້າທີ່, ຖ້າມີລາຍລະອຽດເພີ່ມເຕີມ ທີມງານໜັງສືພິມລາວພັດທະນາຈະລາຍງານໃຫ້ຊາບຕື່ມ.