ທະນາຄານກາງສະຫະລັດ ຂຶ້ນດອກເບ້ຍອີກ  0.25% ຈາກ 4.75% ເປັນ 5%

ສຳນັກຂ່າວຕ່າງປະເທດລາຍງານ: ວັນທີ 22 ມີນາ 2023 ຜ່ານມາ, ທະນາຄານກາງສະຫະລັດອາເມຣິກາ (FED) ປະກາດວ່າ ຈະຂຶ້ນອັດຕາດອກເບ້ຍມາດຕະຖານອີກ 0.25% ຈາກ 4.75% ເປັນ 5% ສູງສຸດນັບຕັ້ງແຕ່ປີ 2007 ເພື່ອຕໍ່ສູ້ກັບອັດຕາເງິນເຟີ້ທີ່ຍັງຢູ່ໃນລະດັບສູງ ຕາມຄວາມຄາດໝາຍຂອງນັກລົງທຶນ ແລະ ນັກເສດຖະສາດ ເຖິງຈະມີຄວາມສ່ຽງຕໍ່ສະຖຽນລະພາບທາງດ້ານການເງິນ ແລະ ເຮັດໃຫ້ພາກທະນາຄານປັ່ນປ່ວນກໍຕາມ.

ທັງນີ້, ຄວາມປັ່ນປ່ວນໃນພາກທະນາຄານໃນໄລຍະຜ່ານມາ ບໍ່ພຽງແຕ່ເຮັດໃຫ້ເກີດຄວາມກັງວົນວ່າ ທະນາຄານກາງສະຫະລັດ ອາດຂຶ້ນດອກເບ້ຍໄວເກີນໄປ ຈົນເຮັດໃຫ້ເສດຖະກິດຖົດຖອຍ ແຕ່ຍັງສົ່ງຜົນໃຫ້ທະນາຄານລົ້ມລະລາຍ ຫລາຍຂຶ້ນອີກ ຈົນນັກເສດຖະສາດຊື່ດັງຫລາຍຄົນອອກມາຮຽກຮ້ອງໃຫ້ ທະນາຄານກາງຢຸດດອກເບ້ຍໄວ້ກ່ອນ.

ແຕ່ການຂຶ້ນດອກເບ້ຍຄັ້ງຫລ້າສຸດ ເຊິ່ງເປັນຄັ້ງທີ 9 ຕິດຕໍ່ກັນ ສົ່ງສັນຍານທີ່ຊັດເຈນວ່າ ທະນາຄານກາງສະຫະລັດ ຍັງໃຫ້ຄວາມສຳຄັນເລື່ອງການຟື້ນຟູສະຖຽນລະພາບທາງດ້ານລາຄາເປັນອັນດັບທຳອິດ.