UN ເຕືອນ ວິກິດນໍ້າໂລກຈາກການບໍລິໂພກເກີນຈໍາເປັນ ແລະ ສະພາບໂລກປັ່ນປ່ວນອາດຮຸນແຮງຈົນ “ຄວບຄຸມບໍ່ໄດ້”
ອົງການສະຫະປະຊາຊາດ (UN) ເຜີຍແພ່ລາຍງານການພັດທະນານໍ້າໂລກ ເຕືອນໂລກກໍາລັງຜະເຊີນວິກິດນໍ້າທີ່ອາດທະວີຄວາມຮຸນແຮງຂຶ້ນຈົນບໍ່ສາມາດຄວບຄຸມໄດ້ ເນື່ອງຈາກຄວາມຕ້ອງການບໍລິໂພກນໍ້າທີ່ເພີ່ມຂຶ້ນ ແລະ ຜົນກະທົບທີ່ຂະຫຍາຍຕົວຈາກສະພາບໂລກປັ່ນປ່ວນ ເຊິ່ງກໍ່ໃຫ້ເກີດແຮງກົດດັນມະຫາສານຕໍ່ຊັບພະຍາກອນນໍ້າທົ່ວໂລກ.
ການເຜີຍແພ່ລາຍງານຂອງ UN ມີຂຶ້ນກ່ອນກອງປະຊຸມສຸດຍອດດ້ານນໍ້າ ປີ 2023 (UN 2023 Water Conference) ທີ່ຈັດຂຶ້ນໃນນະຄອນນິວຢ໋ອກ ວັນທີ 22 ມີນາ.
ໂດຍລາຍງານລະບຸວ່າ: ອັດຕາການໃຊ້ນໍ້າທົ່ວໂລກເພີ່ມຂຶ້ນປະມານ 1% ຕໍ່ປີ ໃນໄລຍະ 40 ປີຜ່ານມາ ເຊິ່ງເປັນຜົນຈາກການເຕີບໃຫຍ່ຂອງຈໍານວນປະຊາກອນ ແລະ ຮູບແບບການບໍລິໂພກທີ່ປ່ຽນໄປ.
ນອກຈາກນີ້, ຄາດວ່າພາຍໃນປີ 2050 ຈໍານວນປະຊາຊົນໃນເຂດເມືອງທີ່ຂາດເຂີນນໍ້າຈະເພີ່ມຂຶ້ນຈາກປະມານ 930 ລ້ານຄົນໃນປີ 2016 ເປັນຫລາຍກວ່າ 2,4 ພັນລ້ານຄົນ ຫລື ເກືອບ 2 ເທົ່າ ໂດຍຄວາມຕ້ອງການນໍ້າໃນເຂດເມືອງຄາດວ່າຈະເພີ່ມຂຶ້ນກວ່າ 80% ພາຍໃນປີ 2050 ເຊັ່ນກັນ.
ຈາກຂໍ້ມູນໃນລາຍງານຊີ້ວ່າ: ການເຂົ້າເຖິງນໍ້າເປັນບັນຫາໃຫຍ່ໃນປັດຈຸບັນ ໂດຍພົບວ່າປະຊາກອນ 2 ພັນລ້ານກວ່າຄົນບໍ່ມີນໍ້າດື່ມສະອາດສໍາລັບບໍລິໂພກ ແລະ 3,6 ພັນລ້ານຄົນ ບໍ່ສາມາດເຂົ້າເຖິງນໍ້າທີ່ມີການຈັດການສຸຂະອະນາໄມຢ່າງປອດໄພ.
ຂະນະທີ່ປະມານ 10% ຂອງປະຊາກອນໂລກອາໄສຢູ່ໃນປະເທດກໍາລັງຜະເຊີນວິກິດຄວາມຄຽດນໍ້າ (Water Stress) ຫລື ສະພາບຂາດເຂີນນໍ້າຈືດໃນລະດັບສູງຢູ່ແລ້ວ.
ໂດຍລາຍງານລະບຸວ່າ: ສະພາບຂາດເຂີນນໍ້າຕາມລະດູການຈະເພີ່ມຂຶ້ນໃນພື້ນທີ່ທີ່ມີແຫລ່ງນໍ້າອຸດົມສົມບູນເຊັ່ນ: ອາຟຣິກາກາງ, ອາຊີຕາເວັນອອກ ແລະ ບາງສ່ວນຂອງທະວີບອາເມລິກາໃຕ້. ຂະນະດຽວກັນ ສະພາບຂາດເຂີນຈະຍິ່ງຮ້າຍແຮງໃນເຂດຕາເວັນອອກກາງ ແລະ ພາກພື້ນຊາເຮລ (Sahel) ເຊິ່ງເປັນເຂດຮອຍຕໍ່ທະເລຊາຍຊາຮາຣາໃນອາຟຣິກາ ເຊິ່ງຂາດເຂີນນໍ້າຢູ່ແລ້ວ.
ອ້າງອີງ:
https://edition.cnn.com/…/global-water…/index.html
