ຈີນອະນຸມັດໃຊ້ວັກຊີນປ້ອງກັນໂຄວິດ mRNA ພັດທະນາໃນປະເທດສູດທໍາອິດ ຜົນທົດລອງຊີ້ປະສິດທິພາບສູງ
ລັດຖະບານຈີນອະນຸມັດນໍາໃຊ້ວັກຊີນປ້ອງກັນໂຄວິດຊະນິດ mRNA ທີ່ພັດທະນາຂຶ້ນພາຍໃນປະເທດເປັນສູດທໍາອິດ ໂດຍບໍລິສັດ CSPC Pharmaceutical Group Ltd ເຊິ່ງເປັນການອະນຸມັດໃຊ້ໃນກໍລະນີສຸກເສີນ ໂດຍໜ່ວຍງານເບິ່ງແຍງດ້ານສາທາລະນະສຸກຂອງນະຄອນຫລວງປັກກິ່ງ.
ຖະແຫລງການຈາກບໍລິສັດ CSPC ລະບຸຜົນການທົດລອງວັກຊີນທີ່ໃຊ້ໃນການສັກເປັນເຂັມກະຕຸ້ນສໍາລັບຜູ້ທີ່ໄດ້ຮັບວັກຊີນຊະນິດອື່ນ ພົບວ່າມີປະສິດທິພາບສູງໃນການຕ້ານໂຄວິດ, ແຕ່ບໍ່ໄດ້ລະບຸຕົວເລກ ຫລື ຂໍ້ມູນລາຍລະອຽດການທົດລອງອື່ນໆ.
ການອະນຸມັດນໍາໃຊ້ວັກຊີນ mRNA ສູດທໍາອິດຂອງຈີນມີຂຶ້ນຫລັງລັດຖະບານຫລຸດຜ່ອນມາດຕະການເຂັ້ມງວດໃນການປ້ອງກັນການລະບາດຂອງໂຄວິດຢ່າງກະທັນຫັນໃນທ້າຍປີຜ່ານມາ ເຊິ່ງສົ່ງຜົນໃຫ້ມີຈໍານວນຜູ້ຕິດເຊື້ອ ແລະ ຜູ້ເສຍຊີວິດຈາກໂຄວິດເພີ່ມສູງຂຶ້ນ.
ຜ່ານມາລັດຖະບານຈີນໃຊ້ວັກຊີນຊະນິດເຊື້ອຕາຍໃນການສັກໃຫ້ປະຊາຊົນ ແລະ ປະຕິເສດຈະອະນຸມັດໃຊ້ວັກຊີນ mRNA ຈາກບໍລິສັດຕ່າງປະເທດຄື Pfizer-BioNTech ແລະ Moderna ສໍາລັບການນໍາໃຊ້ສາທາລະນະ ເຖິງວ່າວັກຊີນຊະນິດ mRNA ຈະໄດ້ຮັບການພິຈາລະນາວ່າມີປະສິດທິພາບສູງສຸດໃນການຫລຸດການຕິດເຊື້ອຈົນມີອາການຮຸນແຮງ ແລະ ເສຍຊີວິດກໍຕາມ.
ເຖິງຢ່າງໃດກໍຕາມ, CanSino ຜູ້ຜະລິດລາຍໃຫຍ່ຂອງຈີນ ເປີດເຜີຍກ່ອນໜ້ານີ້ວ່າ: ກໍາລັງພັດທະນາວັກຊີນຊະນິດ mRNA ເຊັ່ນກັນ ເພື່ອໃຊ້ໃນການຊ່ວຍຫລຸດຊ່ອງວ່າງການເສີມສ້າງພູມຕ້ານທານຂອງປະຊາຊົນໃນການຕ້ານໂຄວິດ.
