ຈົດຈໍາລໍາລຶກບຸນຄຸນຂອງພັກ 68 ປີ ທີ່ຕໍ່ສູ້ ແລະ ນຳພາທຸກຂະບວນການພັດທະນາ
ໂດຍ: ທິດກໍ່າ
ວັນທີ 22 ມີນາ 2023 ທີ່ຜ່ານພົ້ນໄປບໍ່ພໍເທົ່າໃດວັນຜ່ານມາ ເປັນວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 68 ປີ (22/3/1955-22/3/2023). ພັກປະຊາຊົນປະຕິວັດລາວໄດ້ກໍາເນີດເກີດຂຶ້ນ ແລະ ເຕີບໃຫຍ່ໃນຂະບວນການຕໍ່ສູ້ປະຕິວັດປົດປ່ອຍປະເທດຊາດອອກຈາກການປົກຄອງລ່າເມືອງຂຶ້ນແບບເກົ່າ ແລະ ລ່າເມືອງຂຶ້ນແບບໃໝ່ ເຊິ່ງຜ່ານໄລຍະການຕໍ່ສູ້ປະຕິວັດກັບຈັກກະພັດສອງໂຕໃຫຍ່ນີ້ໃຊ້ເວລາເກືອບໜຶ່ງສະຕະວັດ.
ຫາກຕັ້ງໂຈດກັນວ່າ, ດ້ວຍສາເຫດໃດຈຶ່ງເກີດມີພັກປະຊາຊົນປະຕິວັດລາວ. ຄໍາຕອບກໍຄື ຍ້ອນປະຊາຊົນບັນດາເຜົ່າຖືກກົດຂີ່ຂູດຮີດຈາກລັດທິການປົກຄອງຂອງຈັກກະພັດ ຈຶ່ງໄດ້ທໍາການຕໍ່ສູ້ຢ່າງເດັດດ່ຽວ ດັ່ງຄໍາສຸພາສິດທີ່ວ່າ: ມີການກົດຂີ່ຂູດຮີດຢູ່ບ່ອນໃດ ບ່ອນນັ້ນຍ່ອມມີການຕໍ່ສູ້. ຂະບວນການນໍາພາຕໍ່ສູ້ປະຕິວັດໃນເບື້ອງຕົ້ນແມ່ນພັກກອມມູນິດອິນດູຈີນ ໂດຍການນໍາພາຂອງປະທານ ໂຮ່ຈີມິງ, ແຕ່ຕໍ່ມາຍ້ອນຂະບວນການຕໍ່ສູ້ຂອງປະຊາຊົນສາມຊາດອິນດູຈີນມີການເຕີບໃຫຍ່ຂະຫຍາຍຕົວ ພັກກອມມູນິດອິນດູຈີນຈຶ່ງໄດ້ແຍກອອກມາເປັນສາມພັກຄື: ພັກປະຊາຊົນປະຕິວັດລາວ, ພັກສັງຄົມນິຍົມຫວຽດນາມ ແລະ ພັກປະຊາຊົນກໍາປູເຈຍ ໃນປັດຈຸບັນ.
ໃນເມື່ອແຍກພັກອອກມາເປັນພັກໃຜພັກມັນແລ້ວ ສະເພາະພັກປະຊາຊົນປະຕິວັດລາວ ໂດຍແມ່ນທ່ານ ໄກສອນ ພົມວິຫານ ເປັນເລຂາທິການໃຫຍ່ນັບແຕ່ມື້ນັ້ນມາ ໄດ້ນໍາພາຂະບວນການຕໍ່ສູ້ປົດປ່ອຍປະເທດຊາດຕ້ານຈັກກະພັດສອງໂຕໃຫຍ່ ຄືຝຣັ່ງ ແລະ ອາເມລິກາໄດ້ຮັບໄຊຊະນະເລື້ອຍໆມາ ຈົນຮອດປີ 1975 ຈຶ່ງສາມາດປົດປ່ອຍປະເທດຊາດໄດ້ຢ່າງສົມບູນແລ້ວກໍປະກາດລົບລ້າງອໍານາດການປົກຄອງເກົ່າ ສ້າງຕັ້ງອໍານາດການປົກຄອງໃໝ່, ລະບອບໃໝ່, ຕັ້ງຊື່ປະເທດໃໝ່ຄື: ສາທາລະນະລັດ ປະຊາທິປະໄຕ ປະຊາຊົນລາວ ໃນປັດຈຸບັນ.
ຕະຫລອດໄລຍະແຫ່ງການສ້າງຕັ້ງອໍານາດການປົກຄອງໃໝ່, ລະບອບໃໝ່ເປັນເວລາ 47 ປີ ໂດຍແມ່ນພັກປະຊາຊົນປະຕິວັດລາວເປັນແກນນໍາ ປະເທດຊາດໄດ້ຮັບການພັດທະນາຢ່າງບໍ່ຢຸດຢັ້ງ ອັນທີ່ໂດດເດັ່ນທີ່ສຸດດ້ານການເມືອງມີສະຖຽນລະພາບໝັ້ນຄົງ, ເຂດເຂດການປ້ອງກັນຊາດ-ປ້ອງກັນຄວາມສະຫງົບນັບມື້ມີຄວາມໜັກແໜ້ນເຂັ້ມແຂງ, ເສດຖະກິດ-ສັງຄົມມີຄວາມຈະເລີນຮຸ່ງເຮືອງ ແລະ ພັດທະນາໃນທຸກດ້ານ.
ຈາກໝາກຜົນທີ່ກ່າວມານີ້ ຈຶ່ງເຮັດໃຫ້ ສປປ ລາວຂອງພວກເຮົາ ນັບມື້ມີບົດບາດຊື່ສຽງໃນເວທີພາກພື້ນ ແລະ ສາກົນຢ່າງກວ້າງຂວາງ. ສິ່ງທີ່ພວກເຮົາຄວນຈົດຈໍາລໍາລຶກຕໍ່ພາລະກິດອັນຍິ່ງໃຫຍ່ຂອງພັກປະຊາຊົນປະຕິວັດລາວນັ້ນຄື ການນໍາພາຕໍ່ສູ້ປົດປ່ອຍປະເທດຊາດຈົນໄດ້ຮັບໄຊຊະນະ. ຈາກນັ້ນ ກໍນໍາພາສ້າງສາພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງຄືທຸກວັນນີ້. ພັກປະຊາຊົນປະຕິວັດລາວ ຈົ່ງໝັ້ນຍືນເຂັ້ມແຂງຕະຫລອດໄປ.
