ອາດີດນາຍົກລັດຖະມົນຕີ ລົງຕິດຕາມຄວາມຄືບໜ້າໂຄງການກໍ່ສ້າງພຣະທາດເກດແກ້ວຈຸນລະມະນີສາມັກຄີສີດອນໄຊ ແຂວງຈໍາປາສັກ

ວັນທີ 23 ມີນາ 2023, ທ່ານ ພັນຄຳ ວິພາວັນ ອາດີດນາຍົກລັດຖະມົນຕີ ແຫ່ງ ສປ ປລາວ ແລະ ທ່ານ ພົນເອກ ວິໄລ ຫລ້າຄຳຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ໄດ້ລົງຕິດຕາມຄວາມຄືບໜ້າການຈັດຕັ້ງປະຕິບັດໂຄງການກໍ່ສ້າງພຣະທາດເກດແກ້ວຈຸນລະມະນີສາມັກຄີສີດອນໄຊ, ເມືອງສຸຂຸມາ, ແຂວງຈໍາປາສັກ. ໂດຍການຕ້ອນຮັບ ແລະ ຮ່ວມຕິດຕາມຂອງ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ.

ທ່ານ ຈັນທະວີສຸກ ວັນສີລິ ຫົວໜ້າພະແນກໂຍທາທິການ ແລະ ຂົນສົ່ງ (ຍທຂ) ແຂວງຈໍາປາສັກ ໃນນາມຕ່າງໜ້າຄະນະຊີ້ນຳດ້ານເຕັກນິກຂັ້ນແຂວງ ຂອງໂຄງການດັ່ງກ່າວ ລາຍງານວ່າ: ໂຄງການນີ້ແມ່ນມີທີ່ຕັ້ງຢູ່ບ້ານຄຸ້ມໃຫຍ່ (ດອນໄຊ), ເມືອງສຸຂຸມາ, ແຂວງຈຳປາສັກ, ເຊິ່ງຢູ່ກາງດອນແມ່ນໍ້າຂອງ ຫ່າງຈາກເທດສະບານແຂວງຈຳປາສັກ ລົງໄປທາງທິດໃຕ້ 80 ກິໂລແມັດ ແລະ ຫ່າງຈາກເທດສະບານເມືອງສຸຂຸມາ ໄປທາງທິດຕາເວັນອອກສ່ຽງໃຕ້ 17 ກິໂລແມັດ, ໂຄງການດັ່ງກ່າວ ແມ່ນໄດ້ຮັບທຶນຮ່ວງເງິນລະດົມຂອງ ທ່ານນາຍົກລັດຖະມົນຕີ ແຫ່ງ ສປປ ລາວ ໂດຍແມ່ນຫ້ອງວ່າການແຂວງຈຳປາສັກ ເປັນເຈົ້າຂອງໂຄງການ, ພະແນກ (ຍທຂ) ແຂວງ ເປັນຜູ້ຕິດຕາມດ້ານເຕັກນິກ ແລະ ຮັບເໝົາໂດຍບໍລິສັດທະວີຊັບກໍ່ສ້າງຂົວ-ທາງ ຈໍາກັດຜູ້ດຽວ, ໄດ້ເຊັນສັນຍາໃນວັນທີ 25 ຕຸລາ 2022 ໄລຍະເວລາ ການກໍ່ສ້າງ 1 ປີ, ລວມມູນຄ່າກໍ່ສ້າງທັງໝົດ 6,5 ຕື້ກວ່າກີບ ປະກອບດ້ວຍ 2 ໜ້າວຽກຫລັກ ຄື ການກໍ່ສ້າງພຣະທາດເກດແກ້ວຈຸນລະມະນີສາມັກຄີສິດອນໄຊ, ກວ້າງ 30×30 ແມັດ, ສູງ 33 ແມັດ, ມີ 5 ຊັ້ນ ແລະ ອ້ອມຮອບດ້ວຍກົມມະລຽນ ຂະໜາດກ້ວາງ 61×61 ແມັດ, ຮູບຊົງລາວ ແລະ ສ້າງທາງດິນແດງ ແຕ່ທ່າບັກບ້ານຕູ້ມໃຫຍ່ (ດອນໄຊ) ຫາ ພຣະທາດ, ການຈັດຕັ້ງປະຕິບັດໂຄງການມີ 2 ໄລຍະ, ສຳລັບຄວາມຄືບໜ້າໂດຍລວມຂອງໂຄງການ ແມ່ນປະຕິບັດໄດ້ 48.7%, ການຈັດຕັ້ງປະຕິບັດໄດ້ສຳເລັດ ວຽກການກໍ່ສ້າງພຣະທາດເກດແກ້ວ, ໂຄງສ້າງຕົວຂອງພຣະທາດ, ຕໍ່ເຕີມໂຄງສ້າງຖານ ແລະ ສຳເລັດ ການກໍ່ສ້າງທາງດິນແດງ ແຕ່ທ່າບັກບ້ານຕູ້ມໃຫຍ່, ດອນໄຊ ຫາ ພຣະທາດ ຍາວ 1.500 ແມັດ, ກວ້າງ 5 ແມັດ; ສ່ວນວຽກທີ່ຕ້ອງສືບຕໍ່ຍັງມີ ການກໍ່ສ້າງກໍາແພງ, ປະຕູໂຂງ ປະຕິບັດໄດ້ 70-80% ແລະ ເດີ່ນດ້ານໃນພຣະທາດ ແມ່ນໄດ້ສໍາເລັດການຖົມດິນປັບລະດັບເດີ່ນ ແລະ ກະກຽມເທເບຕົງ.

ໂອກາດນີ້, ທ່ານ ພັນຄຳ ວິພາວັນ ໄດ້ສະແດງຄວາມຊົມເຊີຍ ພາກສ່ວນທີ່ກ່ຽວຂ້ອງ ໃນການຈັດຕັ້ງປະຕິບັດເຫັນວ່າມີຄືບໜ້າຫລາຍສົມຄວນ ຊຶ່ງໂຄງການນີ້ເປັນການ ສົມທົບ ແຫລ່ງທຶນ ໃນການພັດທະນາເສດຖະກິດ ຈາກຜູ້ປະກອບການ ພາກທູລະກິດ ຫລາຍພາກສ່ວນ ເພື່ອສ້າງປະຫວັດສາດອັນໃໝ່, ປະກອບສ່ວນສ້າງ ມໍລະດົກ ອັນສັກສິດ ໃຫ້ຄົນລຸ້ນຫລັງ ໄດ້ສະກາລະບູຊາ, ພ້ອມນັ້ນ ທ່ານອາດີດນາຍົກລັດຖະມົນຕີ ຍັງໄດ້ສະເໜີມອບ ໃຫ້ທ່ານ ພົນເອກ ວິໄລ ຫລ້າຄຳຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ແລະ ທ່ານເຈົ້າແຂວງຈຳປາສັກ ເປັນຜູ້ສືບຕໍ່ຊີ້ນຳໂຄງການ ແລະ ພະແນກການກ່ຽວຂ້ອງ ຕ້ອງສືບຕໍ່ດຳເນີນການຈັດຕັ້ງປະຕິບັດວຽກງານພາກສະໜາມ, ໂດຍສະເພາະ 5 ວຽກໃຫຍ່ຂອງໂຄງການດັ່ງກ່າວ ເພື່ອໃຫ້ ສຳເລັດຕາມແຜນທີ່ກຳນົດໄວ້.

ຂໍ້ມູນ+ພາບ: ສື່ມວນຊົນແຂວງຈຳປາສັກ