ບໍລິສັດ ມາຣິອອນໄບໂອເທັກ ປະເທດອິນເດຍ ຖືກຖອນໃບອະນຸຍາດການຜະລິດຢ່າງຖາວອນ ຫລັງຢານ້ຳແກ້ໄອ Dok-1 Max ແລະ Ambronol ເຮັດໃຫ້ເດັກນ້ອຍເສຍຊີວິດ
ສຳນັກຂ່າວຕ່າງປະເທດລາຍງານ: ວັນທີ 22 ມີນາ 2023 ຜ່ານມາ, ທາງການລັດອຸດຕະ ທາງເໜືອຂອງປະເທດອິນເດຍ ປະກາດຍົກເລີກໃບອະນຸຍາດການຜະລິດຂອງບໍລິສັດ ມາຣິອອນ ໄບໂອເທັກ (Marion Biotech) ຢ່າງຖາວອນ, ຫລັງເກີດກໍລະນີການເສຍຊີວິດຂອງເດັກນ້ອຍ 18 ຄົນ ໃນ ອຸດສະເບກິດສະຖານ ທີ່ເຊື່ອມໂຍງກັບຢານ້ຳແກ້ໄອທີ່ບໍລິສັດນີ້ຜະລິດ.
ກໍລະນີຫລ້າສຸດ ເກີດຂຶ້ນໃນເດືອນທັນວາ 2022 ຜ່ານມາ, ອົງການຄວບຄຸມມາດຕະຖານຢາກາງຂອງອິນເດຍ ພົບຕົວຢ່າງຢານ້ຳແກ້ໄອຂອງບໍລິສັດນີ້ 22 ຕົວຢ່າງທີ່ມີສິ່ງເຈືອປົນ ແລະ ບໍ່ມີຜົນຕາມຈຸດປະສົງ. ໃນເດືອນມັງກອນ 2023 ອົງການອະນາໄມໂລກອອກຄຳເຕືອນບໍ່ໃຫ້ໃຊ້ຢານ້ຳແກ້ໄອ 2 ຍີ່ຫໍ້ຂອງບໍລິສັດ ໄດ້ແກ່: Dok-1 Max ແລະ Ambronol ເນື່ອງຈາກບໍ່ໄດ້ມາດຕະຖານ ແຕ່ບໍລິສັດອອກມາປະຕິເສດ.
ຕໍ່ມາ, ຜົນການກວດສອບຂອງເຈົ້າໜ້າທີ່ ອຸດສະເບກິດສະຖານພົບວ່າຢາທັງສອງໂຕນີ້ມີສານ ໄດເອທີລິນໄກດໍ (Diethylene glycol) ແລະ (Ethylene Glycol) ເອທີລິນໄກດໍ ຫລາຍກວ່າຈຳນວນປົກກະຕິ ສານດັ່ງກ່າວເປັນພິດຕໍ່ຮ່າງກາຍມະນຸດ ແລະ ອາດເຖິງຂັ້ນເສຍຊີວິດຫາກບໍລິໂພກໃນປະລິມານຫລາຍ ເຮັດໃຫ້ກະຊວງສາທາລະນະສຸກອິນເດຍສັ່ງລະງັບການຜະລິດບໍລິສັດທັນທີ.
