ອັບການິດສະຖານເປີດປີການສຶກສາໃໝ່ ຫລັງຫ້າມນັກຮຽນຍິງເຂົ້າສຶກສາຕໍ່ໃນລະດັບຊັ້ນມັດທະຍົມ

ໂຮງຮຽນຫລາຍແຫ່ງໃນອັບການິດສະຖານທະຍອຍເປີດປີການສຶກສາໃໝ່ ໂດຍມີນັກຮຽນຍິງຈໍານວນຫລາຍແສນຄົນບໍ່ໄດ້ຮັບໂອກາດທາງການສຶກສາ ຫລັງຈາກລັດຖະບານຕາລີບັນສັ່ງຫ້າມນັກຮຽນຍິງທົ່ວປະເທດເຂົ້າສຶກສາຕໍ່ໃນລະດັບຊັ້ນມັດທະຍົມສຶກສາ ມີພຽງເດັກຍິງທີ່ອາຍຸຕໍ່າກວ່າ 12 ປີລົງມາເທົ່ານັ້ນທີ່ຈະໄດ້ຮັບອະນຸຍາດໃຫ້ໄປໂຮງຮຽນ.

ທ່ານ ຮາບິບູນເລາະ ອັກຮາ ລັດຖະມົນຕີສຶກສາທິການຂອງຕາລີບັນ ລະບຸວ່າ: ໂຮງຮຽນຊັ້ນປະຖົມສຶກສາຍັງເປີດກວ້າງສໍາລັບເດັກນັກຮຽນຍິງ, ແຕ່ຈະມີການຈໍາກັດສິດໃນການເຂົ້າສຶກສາຕໍ່ໃນລະດັບຊັ້ນມັດທະຍົມສຶກສາ ໂດຍລັດຖະບານຕາລີບັນໃຫ້ເຫດຜົນເພື່ອສ້າງຄວາມຍຸຕິທໍາຕໍ່ການກະທໍາດັ່ງກ່າວວ່າ: ພື້ນທີ່ການສຶກສາໂດຍສະເພາະໃນລະດັບຊັ້ນມັດທະຍົມສຶກສາຂາດສະພາບແວດລ້ອມທີ່ປອດໄພສໍາລັບເດັກນັກຮຽນຍິງ.

ຄັ້ງນີ້ບໍ່ແມ່ນຄັ້ງທໍາອິດທີ່ລັດຖະບານຕາລີບັນຈໍາກັດສິດໃນການເຂົ້າສຶກສາຕໍ່ຂອງຜູ້ຍິງໃນອັບການິດສະຖານ ເພາະໃນໄລຍະທໍາອິດທີ່ກຸ່ມຕາລີບັນເຄີຍກ້າວຂຶ້ນມາບໍລິຫານປະເທດໃນໄລຍະປີ 1996-2001 ພວກເຂົາເຄີຍຈໍາກັດພື້ນທີ່ຂອງຜູ້ຍິງອັບການິດສະຖານອອກຈາກໂລກຂອງການສຶກສາ ແລະ ການເຮັດວຽກ ໂດຍການປະກາດຫ້າມຄັ້ງນີ້ເລີ່ມຂຶ້ນໃນເດືອນມີນາ 2022 ແລະ ບໍ່ມີປະເທດມຸດສະລິມປະເທດໃດໃນໂລກທີ່ກີດກັນຜູ້ຍິງອອກຈາກສິດທາງການສຶກສາຄືອັບການິດສະຖານ.

ທ່ານ ແຈັກເກີຣີນ ຣັສເຊລ ຜູ້ອໍານວຍການບໍລິຫານຂອງ UNICEF ຊີ້ວ່າ: ສະຖານະການໃນອັບການິດສະຖານຮ້າຍແຮງຂຶ້ນ, ການຫ້າມດັ່ງກ່າວເປັນການພາກໂອກາດ ແລະ ຄວາມສາມາດໃນການເຂົ້າເປັນສ່ວນໜຶ່ງຂອງສັງຄົມ ລວມທັງພາກຄວາມຝັນຂອງພວກເຂົາທີ່ຢາກຈະເຮັດວຽກ, ຢາກຈະເປັນແພດ ຫລື ເປັນຄູອາຈານທີ່ຈະເຂົ້າມາຊ່ວຍພັດທະນາປະເທດ.

ອັບການິດສະຖານເປັນພຽງປະເທດດຽວໃນໄລຍະເວລານີ້ທີ່ປະກາດຫ້າມ, ຫ້າມນັກຮຽນຍິງເຂົ້າສຶກສາຕໍ່ໃນລະດັບຊັ້ນມັດທະຍົມສຶກສາ, ກີດກັນພວກເຂົາອອກຈາກການດໍາລົງຊີວິດໃນພື້ນທີ່ສາທາລະນະ, ກົດຄ່າແຮງ ຫລື ຄ່າຕອບແທນໃຫ້ຕໍ່າລົງ ເພື່ອບີບໃຫ້ຢູ່ແຕ່ທີ່ພັກອາໄສ, ຫ້າມໄປສວນສາທາລະນະ, ບ່ອນອອກກໍາລັງກາຍ ຫລື ໂຮງອາບນໍ້າສາທາລະນະ ໂດຍຈະຕ້ອງແຕ່ງກາຍໃຫ້ຖືກຕ້ອງເໝາະສົມຖ້າຢູ່ໃນພື້ນທີ່ສາທາລະນະນໍາອີກ.

ນອກຈາກນີ້, ຄໍາສັ່ງຫ້າມດັ່ງກ່າວຍັງເຮັດໃຫ້ອັດຕາການຮູ້ໜັງສືຂອງຜູ້ຍິງອັບການິດສະຖານທີ່ເຄີຍເພີ່ມຂຶ້ນ 2 ເທົ່າໃນໄລຍະ 2 ທົດສະວັດຜ່ານມາ ຕ້ອງຢຸດສະງັກ. ອີກທັງຈໍານວນຕົວເລກຂອງນັກຮຽນຍິງທີ່ເຄີຍເພີ່ມສູງຂຶ້ນເກືອບ 20 ເທົ່າ ນັບແຕ່ປີ 2001 ຈາກປະມານ 5.000 ຄົນ ມາຢູ່ 1 ແສນກວ່າຄົນ ໃນໄລຍະປີ 2021 ຜ່ານມາ ຫລຸດລົງຫລາຍໃນໄລຍະເວລານີ້.

ອ້າງອີງ:

https://www.cbsnews.com/…/afghanistan-taliban-school…/

https://www.aljazeera.com/…/afghanistan-school-year…

https://www.globalpartnership.org/…/afghanistan-gpe…

https://www.npr.org/…/taliban-afghanistan-girls-school