ສາລະວັນ ຍັງຈະມີພາຍຸ ຝົນຕົກ ແລະ ຟ້າເຫລື້ອມຟ້າຮ້ອງ ຮອດວັນທີ 26 ມີນາ 2023

ອີງຕາມແຈ້ງການ ພະແນກຊັບພະຍາກອນ ແລະ ສິ່ງແວດລ້ອມ ແຂວງສາລະວັນ ວັນທີ 22 ມີນາ 2023 ຜ່ານມານີ້ວ່າ: ເນື່ອງຈາກຄວາມກົດດັນອາກາດຕໍ່າຂອງ ອາກາດຮ້ອນຈະປົກຄຸມຢູ່ທົ່ວທຸກເຂດຂອງແຂວງ ພ້ອມດຽວກັບກະແສລົມຕາເວັນຕົກ ພັດປົກຄຸມເປັນສ່ວນໃຫຍ່, ໃນລະຫ່ວາງວັນທີ 22 ຫາ 26 ມີນາ 2023 ເຊິ່ງຈະເຮັດໃຫ້ອາກາດຮ້ອນອົບເອົ້າ ພ້ອມມີໝອກແຫ້ງປົກຄຸມໃນຕອນກາງເວັນ, ເຊິ່ງລັກສະນະດັ່ງກ່າວ ຈະເຮັດໃຫ້ມີ ຝົນຕົກ ຟ້າຮ້ອງ, ຟ້າເຫຼື້ອມ, ໝາກເຫັບຕົກ ພ້ອມມີລົມພັດແຮງ, ຢູ່ບາງເຂດຂອງແຂວງ ອຸນຫະພູມຕໍ່າສຸດ 22-24 ອົງສາ ແລະ ສູງສຸດ 34-38 ອົງສາ.

ດັ່ງນັ້ນ, ຈຶ່ງແຈ້ງເຕືອນເຖິງອົງການປົກຄອງທຸກພາກສ່ວນ ແລະ ພໍ່ແມ່ປະຊາຊົນບັນດາເຜົ່າ ຊາວແຂວງ ສາລະວັນ, ຈົ່ງມີສະຕິລະມັດລະວັງຕໍ່ກັບສະພາບອາກາດທີ່ອາດຈະເກີດຂື້ນໃນໄລຍະນີ້, ຊຶ່ງມີຜົນກະທົບຕໍ່ກັບຊັບ ສິນຂອງພໍ່ແມ່ປະຊາຊົນ, ພ້ອມທັງຕິດຕາມການລາຍງານຂ່າວພະຍາກອນອາກາດ, ຈາກພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ຫຼື ຈາກວິທະຍຸໂທລະພາບ ແຂວງສາລະວັນ ຢ່າງເປັນປະຈໍາ.