ຝຣັ່ງປະກາດຫ້າມພະນັກງານລັດໃຊ້ TikTok ໃນມືຖື

ລັດຖະບານຝຣັ່ງປະກາດຫ້າມພະນັກງານລັດໃຊ້ແອັບ TikTok ໃນໂທລະສັບມືຖື ທ່າມກາງຄວາມກັງວົນກ່ຽວກັບການຮົ່ວໄຫລຂອງຂໍ້ມູນ.

“ເພື່ອຮັກສາຄວາມໝັ້ນຄົງດ້ານໄຊເບີຂອງເຈົ້າໜ້າທີ່ ແລະ ລະບົບລັດ, ລັດຖະບານຈຶ່ງໄດ້ຕັດສິນໃຈຫ້າມພະນັກງານລັດໃຊ້ແອັບ TikTok ໃນໂທລະສັບມືຖືທີ່ໃຊ້ສໍາລັບເຮັດວຽກ” ທ່ານ ສເຕນິສລາສ ເກິຣິນີ ລັດຖະມົນຕີກະຊວງພະນັກງານລັດຝຣັ່ງ ລະບຸໃນທະວິດເຕີ ແລະ ຄໍາສັ່ງດັ່ງກ່າວມີຜົນບັງຄັບໃຊ້ໃນທັນທີ.

ທັງນີ້, ພັນທະມິດຂອງຝຣັ່ງຢູ່ເອີຣົບ ແລະ ພາກພື້ນຕ່າງໆເຊັ່ນ: ອັງກິດ, ໂຮນລັງ, ແບນຊິກ ແລະ ນິວຊີແລນ ຕ່າງອອກຄໍາສັ່ງເຊັ່ນດຽວກັນນີ້ເມື່ອຫລາຍອາທິດກ່ອນ ທ່າມກາງຄວາມກັງວົນວ່າ: ລັດຖະບານຈີນສາມາດເຂົ້າເຖິງຂໍ້ມູນ ແລະ ຕໍາແໜ່ງສະຖານທີ່ຂອງຜູ້ໃຊ້ TikTok ຜ່ານທາງ ByteDance ເຊິ່ງເປັນບໍລິສັດແມ່ຂອງ TikTok.