ປຶກສາຫາລື ແກ້ໄຂບັນຫາວຽກງານແຮງງານເຫລືອບໍ່ພໍ ແລະ ການປັບຂຶ້ນຄ່າແຮງຂັ້ນຕໍ່າ ໃນ ສປປ ລາວ

ວັນທີ 23 ມີນາ 2023  ຜ່ານມານີ ກະຊວງແຮງງານ ແລະ ສະຫວັດດີການສັງຄົມ(ຮສສ) ຈັດກອງປະຊຸມຄະນະກຳມະ ການແຮງງານແຫ່ງຊາດ ຄັ້ງທີ 1 ໂດຍເປັນປະທານຮວ່ມ ຂອງ ທ່ານນາງ ໃບຄໍາ ຂັດທິຍະ ລັດຖະມົນຕີກະຊວງ ຮສສ, ທ່ານ ນາງ ອາລິ ວົງໜໍ່ບຸນທຳ ປະທານສູນກາງສະຫະພັນກຳມະບານລາວ, ທ່ານ ໄຊບັນດິດ ຣາຊະພົນ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ.

ກອງປະຊຸມສະຫລຸບຕີລາຄາຜົນຂອງການຈັດຕັ້ງປະຕິບັດສາມຝ່າຍກ່ຽວກັບ ວຽກງານສາຍພົວພັນແຮງງານຄັ້ງທີ 20 ທີ່ໄດ້ກໍານົດບັນດາໜ້າວຽກອັນສໍາຄັນຕ່າງໆ ຂອງສາມຝ່າຍ ທີ່ໄດ້ກໍານົດໄວ້ຜ່ານມາ ໂດຍຊອກໃຫ້ເຫັນຈຸດດີ, ດ້ານຕັ້ງໜ້າ ແລະ ດ້ານຂໍ້ຄົງຄ້າງ ເພື່ອພ້ອມກັນພິຈາລະນາ ແລະ ເອກະພາບສູງໃນການເສີມຂະຫຍາຍດ້ານດີ ແລະ ຈໍາກັດບັນດາບັນຫາທີ່ເປັນຈຸດອ່ອນຂໍ້ຄົງຄ້າງ, ຄຽງຄູ່ກັນນັ້ນ ພວກເຮົາຍັງຈະຕ້ອງໄດ້ພ້ອມກັນກຳນົດທິດທາງແຜນການຈຸດສຸມໃນປີ 2023 ໃຫ້ແທດເໝາະກັບສະພາບ ແລະ ເງື່ອນໄຂຕົວຈິງ ໂດຍລົງເລິກຜັນຂະຫຍາຍ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ແລະ ວາລະແຫ່ງຊາດໃຫ້ເປັນອັນລະອຽດ ໂດຍສະເພາະແມ່ນການຂຶ້ນທະ ບຽນແຮງງານລາວ ແລະ ແຮງງານຕ່າງປະເທດ, ການປັບປຸງຄ່າແຮງງານຂັ້ນຕໍ່າ, ບັນຫາການຂາດແຄນແຮງງານ ແລະ ການສ້າງຂະບວນການ ເພື່ອເປັນການສະເຫລີມສະຫລອງວັນກໍາມະກອນສາກົນ ຄົບຮອບ 137 ປີ ທີ່ໃກ້ຈະມາເຖິງນີ້.

ທ່ານ ນາງ ໃບຄໍາ ຂັດທິຍະ ຍັງໄດ້ຮຽກຮ້ອງໃຫ້ຜູ້ເຂົ້າຮ່ວມ ກອງປະຊຸມຕ້ອງໄດ້ເບິ່ງຄືນບັນຫາທີ່ເປັນບູລິມະສິດອັນຮີບດ່ວນ ເປັນບັນຫາທີ່ເກີດຜົນປະໂຫຍດໃຫ້ແກ່ ສາມຝ່າຍໃຫ້ຫລາຍທີ່ສຸດ ທັງຜູ້ອອກແຮງງານ, ຜູ້ໃຊ້ແຮງງານ ແລະ ຜົນປະໂຫຍດລວມຂອງລັດ ຕົ້ນຕໍແມ່ນການປັບປຸງຄ່າແຮງງານຂັ້ນຕໍ່າ, ການຂຶ້ນທະບຽນແຮງງານຕາມວາລະແຫ່ງຊາດ, ບັນຫາການຂາດແຄນແຮງງານ ສາເຫດມັນແມ່ນອັນໃດ ຍ້ອນບັນຫາຄ່າແຮງງານຂັ້ນຕໍ່າສຸດ ທີ່ຫລາຍພາກສ່ວນໃຫ້ຄວາມສົນໃຈ ຫລື ແມ່ນຍ້ອນບັນຫາອື່ນໆ.

ຄະນະກໍາມະການແຮງງານແຫ່ງຊາດ ແມ່ນການ ຈັດຕັ້ງໜຶ່ງຂອງລັດ ທີ່ບໍ່ປະຈໍາການມີພາລະບົດບາດ ເປັນເສນາທິການໃຫ້ລັດຖະບານ, ແມ່ນໜ່ວຍງານໜຶ່ງທີ່ເຄື່ອນໄຫວວຽກງານດ້ານແຮງງານຮ່ວມກັນ ລະຫວ່າງກະຊວງແຮງງານ ແລະ ສະຫວັດດີການສັງຄົມ ໃນນາມອົງການລັດ, ສູນກາງສະຫະພັນກຳມະບານລາວ ໃນນາມອົງການຜູ້ຕາງໜ້າຜູ້ອອກແຮງງານ ແລະ ສະພາການຄ້າ ແລະ ອຸດສາຫະກຳແຫ່ງຊາດລາວ ໃນນາມອົງການຜູ້ຕາງໜ້າຜູ້ໃຊ້ແຮງງານ ຕາມຫລັກການດ້ານແຮງງານທີ່ກຳນົດໄວ້ໃນ ຫລັກການສາກົົນ, ກົດໝາຍວ່າດ້ວຍແຮງງານ ແລະ ບັນດານິຕິກຳລຸ່ມກົດໝາຍ ທີ່ໄດ້ກຳນົດອອກຢ່າງເໝາະສົມ ແລະ ພຽງພໍໃຫ້ແກ່ການເຄື່ອນໄຫວ. ໃນລະດັບສາກົນ ອົງການສາມຝ່າຍ ຂອງ ສປປ ລາວ ກໍໄດ້ໃຫ້ສັດຕະຍາບັນຕໍ່ສົນທິສັນຍາວ່າດ້ວຍການປຶກສາຫາລືສາມຝ່າຍ ສະບັບເລກທີ 144 ມາແລ້ວ ຊຶ່ງເປັນການຢັ້ງຢືນໄດ້ວ່າ ພວກເຮົາເຄົາລົບ ແລະ ນໍາໃຊ້ກົນໄກສາມຝ່າຍ ເຄື່ອນໄຫວດ້ານແຮງງານຢູ່ພາຍໃນປະເທດເຮົາຢ່າງຕັ້ງໜ້າ.