ຮອງປະທານປະເທດ ຢ້ຽມຢາມ ແລະ ເຮັດວຽກ ຢູ່ເມືອງຜາອຸດົມ ແຂວງບໍ່ແກ້ວ

ວັນທີ 25 ມີນາ 2023 ຜ່ານມາ, ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈຳ ການຄະນະເລຂາທິການສູນກາງພັກ ຮອງປະທານປະເທດ, ມີ ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ, ພ້ອມຄະນະ ໄດ້ເຄື່ອນໄຫວຢ້ຽມ ຢາມເຮັດວຽກ ຢູ່ເມືອງຜາອຸດົມ ແຂວງບໍ່ແກ້ວ, ໂດຍມີ ສະຫາຍ ເພັງສອນ ແກ້ວວິໄລ ຄະນະປະຈຳພັກແຂວງ, ຮອງເຈົ້າແຂວງບໍ່ແກ້ວ ພ້ອມດ້ວຍພະນັກງານການນຳຫລັກແຫລ່ງໃຫ້ການຕ້ອນຮັບ.

ສະຫາຍ  ຈັນທອນ ພົນທະລາ ກຳມະການພັກແຂວງ ເລຂາພັກເມືອງເຈົ້າ ເມືອງ ເມືອງຜາອຸດົມ ໄດ້ລາຍງານສະພາບຮອບດ້ານ ແລະ ທີ່ພົ້ນເດັ່ນຂອງເມືອງຜາອຸດົມໂດຍຫຍໍ້ ໂດຍໄດ້ຍົກໃຫ້ເຫັນຄວາມເປັນເຈົ້າການສຶກສາອົບຮົມການເມືອງ-ແນວຄິດ ເພື່ອກຽມຄວາມພ້ອມຮອບດ້ານ ແລະ ປຸກລະດົມປະຊາ ຊົນບັນດາເຜົ່າ ພ້ອມກັນພັດທະນາ, ຊຸກຍູ້ປະຊາຊົນປູກເຂົ້ານາແຊງ ຈຳນວນ 903 ເຮັກຕາ, ປູກມັນຕົ້ນ 300 ເຮັກຕາ, ສາລີ, ລ້ຽງສັດ ແລະ ປູກພືດອື່ນໆໃນລະດູແລ້ງ ຈຳນວນ 102 ເຮັກຕາ, ລົງສໍາຫຼວດ ຈັດສັນດິນໃຫ້ນັກລົງທຶນເຂົ້າມາລ້ຽງສັດ ໃນ 2 ຈຸດ ຄື: ຈຸດບ້ານປາງທອງ ມີເນື້ອທີ່ 387,45 ເຮັກຕາ ແລະ ຈຸດພູບ້ານລັງ ມີເນື້ອທີ່ 906 ເຮັກຕາ; ວຽກງານຈັດສັນພູມເລົາເນົາ ແລະ ອາຊີບຄົງທີ່ໃຫ້ແກ່ປະຊາຊົນ ໄດ້ຈັດສັນດິນທຳການຜະລິດໃຫ້ປະຊາຊົນ ທີ່ໄປຕາມການຍົກຍ້າຍຈັດສັນສຳເລັດ 3 ບ້ານ ຄື: ບ້ານກອນຊອດ, ບ້ານຕະພູ ແລະ ບ້ານຈອມໄຊ, ໄດ້ຄົ້ນຄວ້າແກ້ໄຂດິນທຳການຜະລິດໃຫ້ປະຊາຊົນບ້ານນໍ້າຍາວ ທີ່ກັບຄືນບ້ານເກົ່າ ຈຳນວນ 123 ເຮັກຕາ ຢູ່ຈຸດຫ້ວຍບົງ

ໂອກາດດັ່ງກ່າວ ສະຫາຍ ບຸນທອງ ຈິດມະນີ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຄະນະພັກ, ຄະນະນຳ ຕະຫລອດຮອດປະຊາຊົນພາຍໃນເມືອງຜາອຸດົມ ຍາດມາໄດ້ໃນໄລຍະທີ່ຜ່ານມາ ແລະ ໄດ້ເນັ້ນໃຫ້ສືບຕໍ່ເພີ່ມທະວີການສຶກສາອົບຮົມວຽກງານການເມືອງ-ແນວຄິດ ໃຫ້ພະນັກງານ, ສະມາຊິກພັກ, ທະຫານ, ຕໍາຫລວດ ຕະຫລອດຮອດປະຊາຊົນ ໃຫ້ມີການຫັນ ປ່ຽນໃໝ່ ໄປພ້ອມກັບການຈັດຕັ້ງປະຕິບັດ ຕິດພັນກັບການຜັນຂະຫຍາຍຜົນສໍາເລັດກອງປະຊຸມວຽກງານການເມືອງ-ແນວຄິດ ທົ່ວປະເທດ. ພ້ອມກັນສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ພາຍໃນເມືອງ ເປັນຕົ້ນວຽກງານການລົງທຶນ, ການປູກເຂົ້ານາແຊງ, ການຜະລິດເປັນສິນຄ້າ, ສືບຕໍ່ຈັດຕັ້ງປະຕິບັດການເກັບລາຍຮັບເຂົ້າງົບປະມານ ຕາມທ່າແຮງຂອງເມືອງ, ໃນນັ້ນ ເອົາໃຈໃສ່ໃນໂຄງການລ້ຽງງົວ ຂອງບໍລິສັດເອກະຊົນ, ສ້າງເງື່ອນໄຂດຶງດູດນັກລົງທຶນເຂົ້າມາລົງທຶນ, ເອົາໃຈໃສ່ໃນການຈັດສັນບ້ານໃຫ້ປະຊາຊົນ ໂດຍໃຫ້ຄຳ ນຶງເຖິງການພັດທະນາພື້ນຖານໂຄງລ່າງ ເຊັ່ນ: ຖະນົນຫົນທາງ, ໄຟຟ້າ, ນໍ້າສະອາດ, ວຽກງານສຶກສາ, ສາທາ… ຄຽງຄູ່ກັນນັ້ນ ຕ້ອງມີການຈັດສັນອາຊີບຄົງທີ່, ແບ່ງອາຊີບໃຫ້ປະຊາຊົນ ໃນການປູກ-ການລ້ຽງ, ສ້າງຕະຫຼາດຂຶ້ນມາ ເພື່ອໃຫ້ມີການແລກປ່ຽນຊື້-ຂາຍສິນຄ້າ, ສືບຕໍ່ເອົາໃຈໃສ່ວຽກງານພັກ-ພະນັກງານ ພ້ອມກັນນັ້ນ ກໍເອົາໃຈໃສ່ຍູ້ຂະບວນການ, ສ້າງບຸກຄະລາກອນ, ສ້າງໜ່ວຍພັກປອດໃສ, ເຂັ້່ມແຂງ ແລະ ໜັກແໜ້ນ, ໃນນັ້ນ ການປະເມີນກອງປະຊຸມກາງສະໄໝ ໃຫ້ສືບຕໍ່ບັນດາຄາດໝາຍສູ້ຊົນ ໃຫ້ສໍາເລັດຕາມລະດັບຄາດໝາຍ.