ປະທານປະເທດ ລົງເຄື່ອນໄຫວຢ້ຽມຢາມ ແລະ ໂອ້ລົມການນຳຫລັກແຫລ່ງ ແຂວງເຊກອງ

ວັນທີ 24 ມີນາ 2023,  ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ພ້ອມຄະນະລັດຖະມົນຕີ ລົງເຄື່ອນໄຫວຢ້ຽມຢາມ ແລະ ໂອ້ລົມການນຳຫລັກແຫລ່ງ ແລະ ພະນັກງານຢູ່ ແຂວງເຊກອງ,  ໂດຍການຕ້ອນຮັບຂອງທ່ານ ເຫລັກໄຫລ ສີວິໄລ ເຈົ້າແຂວງເຊກອງ ພ້ອມພະນັກງານ.

ທ່ານເຈົ້າແຂວງ ໄດ້ລາຍງານສະພາບການພັດທະນາເສດຖະກິດ-ສັງຄົມ ພາຍໃນແຂວງວ່າ: ຜ່ານມາແຂວງເຊກອງໄດ້ເປັນເຈົ້າການນຳພາ-ຊີ້ນຳ ການປັບປຸງເນື້ອໃນ ແລະ ວິທີການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ, ທົ່ວປວງຊົນຮອບດ້ານຂອງພັກ ສອດຄ່ອງກັບສະພາບຄວາມເປັນຈິງຂອງທ້ອງຖີ່ນ, ເລັ່ງໃສ່ປັບປຸງ ປກສ ກຸ່ມ, ປກສ ບ້ານ ແລະ ກອງຫລອນບ້ານໃຫ້ມີຄວາມເຂັ້ມແຂງ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ອັນພົ້ນເດັ່ນໄດ້ປຸກລະດົມນັກທຸລະກິດຜູ້ປະກອບການທີ່ລົງທຶນພາຍໃນແຂວງເຊກອງ ແລະ ຕ່າງແຂວງປະກອບສ່ວນສ້າງສູນບຳບັດຢາເສບຕິດ, ປັດຈຸບັນກຳລັງສຸມໃສ່ກໍ່ສ້າງ-ສ້ອມແປງສູນບຳບັດຢາເສບຕິດ ຄາດວ່າຈະສຳເລັດໃນປີ 2023 ນີ້.

ໂອກາດນີ້, ທ່ານປະທານປະເທດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດທີ່ແຂວງຍາດມາໄດ້ ແລະ ໄດ້ມີຄຳເຫັນຊີ້ນຳຈຳນວນໜຶ່ງຕໍ່ຄະນະປະຈຳພັກແຂວງໄດ້ ເອົາໃຈໃສ່ເປັນຕົ້ນ ລົງເລິກວຽກງານກໍ່ສ້າງພັກ-ພະນັກງານ, ວຽກງານປ້ອງກັນຊາດ-ປ້ອງກັນຄວາມສະຫງົບ, ການຈັດຕັ້ງປະຕິບັດສອງວາລະແຫ່ງຊາດ, ວຽກງານກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດ ແລະ ລຶບລ້າງຄວາມທຸກຍາກຂອງປະຊາຊົນ, ສົ່ງເສີມການພະລິດເປັນສິນຄ້າຂອງປະຊາຊົນໃຫ້ມີໜໍ່ແໜງໃໝ່, ຂຸດຄົ້ນບັນດາທ່າແຮງຂອງແຂວງ ຕິດພັນກັບການຄຸ້ມຄອງ, ນຳໃຊ້ຊັບພະຍາກອນຢ່າງມີປະສິດທິພາບຕາມທິດຍືນຍົງ, ເອົາການປັບປຸງຄຸນນະພາບ ຂອງວຽກພັກ-ພະນັກງານ ເປັນອັນຕັດສິນການປະຕິບັດທຸກຂົງເຂດວຽກງານ. ເນື້ອໃນຕົ້ນຕໍຂອງການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ແຕ່ລະຄັ້ງຂອງພັກ, ທໍາອິດແມ່ນການຈັດຕັ້ງເຊື່ອມຊຶມ ແນໃສ່ສ້າງຄວາມຮັບຮູ້ເຂົ້າໃຈເປັນເອກະພາບມະຕິຂອງສູນກາງພັກ, ຍຸດທະສາດການພັດທະນາຂອງສູນກາງຕິດພັນກັບການສ້າງຄວາມເຂົ້າໃຈ ກ່ຽວກັບສະຖາ ນະການ, ສະພາບການຂອງຂະແໜງການ ແລະ ທ້ອງຖິ່ນ; ພ້ອມກັນນັ້ນ ກໍ່ເຫັນໄດ້ບັນຫາຜົນສໍາເລັດ, ຂໍ້ຄົງຄ້າງ, ບົດຮຽນທີ່ຜ່ານມາເພື່ອສະແດງຄວາມຕັດສິນໃຈສ້າງການຫັນປ່ຽນໃໝ່ຢ່າງແຂງແຮງ, ເລິກເຊິ່ງ ແລະ ຮອບດ້ານ. ແມ່ນໜ້າທີ່ຄວາມຮັບຜິດຊອບຂອງຄະນະພັກແຕ່ລະຂັ້ນ ໂດຍສະເພາະແມ່ນຜູ້ເປັນຫົວໜ້າຢູ່ແຕ່ລະບ່ອນ ໃນການຕິດຕາມ, ກວດກາ, ຊີ້ນໍາ, ຊຸກຍູ້ການຜັນຂະຫຍາຍ ແລະ ຈັດຕັ້ງປະຕິບັດຂອງບັນດາອົງການຈັດຕັ້ງພັກ, ອົງການປົກຄອງ ແລະ ບັນດາອົງການຈັດຕັ້ງທາງສັງຄົມທີ່ຂຶີ້ນກັບຄວາມຮັບຜິດຊອບຂອງຕົນ ເພື່ອສະຫຼຸບຕີລາຄາ, ປະເມີນຜົນ ແລະ ລາຍງານຄະນະບໍລິຫານງານສູນກາງພັກ ກໍ່ຄື ຄະນະພັກຂັ້ນເທິງຢ່າງເປັນປົກກະຕິຕາມເວລາທີ່ໄດ້ກໍານົດໄວ້.