ມາຕີເນສ ເປັນເຫດ, IFAB ອອກກົດໃຫມ່ 4 ຂໍ້ ຫ້າມຜູ້ຮັກສາປະຕູກ່ວນຄົນຍິງລູກໂທດ

ເປີດກົດໃຫມ່ 4 ຂໍ້ທີ່ IFAB ຫ້າມຜູ້ຮັກສາປະຕູ ປັ່ນຫົວ ຄົນຍິງລູກໂທດ ຫລັງຜູ້ຮັກສາປະຕູອາເຈນຕີນາ ສ້າງເລື່ອງໃນບານໂລກ 2022.

ວັນທີ 26 ມີນາ ຄະນະກຳມະການສະມາຄົມບານເຕະລະຫວ່າງປະເທດ ຫລື IFAB ປະກາດກົດໃຫມ່ທີ່ຈະເລີ່ມໃຊ້ຕັ້ງແຕ່ວັນທີ 1 ກໍລະກົດນີ້ ເພື່ອປົກປ້ອງຄົນຍິງລູກໂທດຈາກການຖືກກໍ່ກວນສະມາທິຜູ້ຮັກສາປະຕູຄູ່ແຂ່ງ ຫລັງເກີດປະເດັນໃນບານໂລກ 2022 ເຊິ່ງ ເອມີເລຍໂນ ມາຕີເນສ ຜູ້ຮັກສາປະຕູທີມຊາດອາເຈນຕີນາ ປັ່ນປະສາດຜູ້ຫລິ້ນທີມຊາດຝຣັ່ງລະຫວ່າງຍິງລູກໂທດຕັດສິນ ຮອບຊີງຊະນະເລີດ ກ່ອນຄວ້າແຊ໊ມໂລກມາຄອງ.

ກົດໃຫມ່ຂອງ IFAB ໃນການຍິງລູກໂທດ ມີດັ່ງນີ້.

1, ຜູ້ຮັກສາປະຕູ ຫ້າມສຳຜັດເສົາ, ຄານ ແລະ ຕາໜ່າງປະຕູ ກ່ອນຍິງລູກໂທດ.

2. ຜູ້ຮັກສາປະຕູ ຫ້າມຖ່ວງເວລາກ່ອນຍິງລູກໂທດ ເຊັ່ນດຽວກັບ ເອມີເລຍໂນ ມາຕີເນສ ຂວາງບານຖິ້ມກ່ອນທີ່ ໂອເຣລຽງ ຊູອາເມນີ ຈະເຂົ້າມາຍິງລູກໂທດ.
3. ຜູ້ຮັກສາປະຕູ ຫ້າມລົບກວນສະມາທິຄົນຍິງລູກໂທດ ລວມເຖິງການເຂົ້າໄປລົມກ່ອນຍິງລູກໂທດ.
4. ຜູ້ຮັກສາປະຕູ ຫ້າມສະແດງພຶດຕິກຳທີ່ບໍ່ໃຫ້ກຽດຄູ່ແຂ່ງ ລວມເຖິງການດີໃຈອອກນອກໜ້າ ຫາກພາດລູກໂທດ.