ຈະມີການປັບຂຶ້ນລາຄາປື້ມແບບຮຽນ ໃນ 6 ເດືອນທ້າຍປີ 2023 ເນື່ອງຈາກລາຄາຕົ້ນທຶນມີການເໜັງຕີງ
ທ່ານ ນາງ ວັນມະນີ ພິິມມະສານ ຫົວໜ້າພະແນກ ແລະ ອຸດສາຫະກຳ ແລະ ການຄ້າ ນະຄອນຫລວງວຽງຈັນ ຮອງປະທານຜູ້ປະຈຳການຄະນະຄຸ້ມຄອງລາຄາສິນຄ້າ ແລະ ຄ່າບໍລິການ ຂັ້ນນະຄອນຫລວງຈັນ ລາຍງານ ຕໍ່ກອງປະຊູມວຽກງານລາຄາສິນຄ້າ ແລະ ຄ່າບໍລິການຂັ້ນນະຄອນຫລວງ ປະຈຳປີ 2022 ແລະ ທິດທາງສຳລັບປີ 2023 ໃນວັນທີ 24 ມີນາ 2023 ຜ່ານມານີ້ ວ່າ: ການຄຸ້ມຄອງລາຄາສິນຄ້າໂດຍສະເພາະບັນຊີ ກ ເຊັ່ນ: ຊີ້ນໝູ, ເຂົ້າ, ປານິນ-ກະຊັງ ແລະ ໄກ່ພັນປອກ ສາມສາຍພັນ ຈາກສະພາບພາຍນອກ ແລະ ພາຍໃນ ທີ່ສົ່ງຜົນກະທົບ ເຮັດໃຫ້ຕົ້ນທຶນການຜະລິດສິນຄ້າ ແລະ ຄ່າບໍລິການເພີ່ມຂຶ້ນຢ່າງຕໍ່ເນື່ອງ ໃນໄລຍະຕົ້ນປີ ຫາ ທ້າຍປີ 2022 ເປັນຕົ້ນມາ ບັນຫາລາຄານໍ້າມັນເຊື້ອໄຟເພີ່ມຂຶ້ນສູງ, ອັດຕາແລກປ່ຽນເພີ່ມຂຶ້ນ ຈາກເງິນກີບອ່ອນຄ່າ, ຈາກອັດຕາເງິນເຟີ້ເພີ່ມຂຶ້ນ, ການຂາດແຄນເງິນຕາຕ່າງປະເທດ ເພື່ອຊຳລະສະສາງສິນຄ້ານຳເຂົ້າ ຈຶ່ງເຮັດໃຫ້ລາຄາຄຸ້ມຄອງສິນຄ້າພົບຄວາມຫຍຸ້ງຍາກ ເຊິ່ງລາຄາສິນຄ້າທຸກລາຍການໄດ້ມີການເໜັງຕີງເພີ່ມຂຶ້ນຕໍ່ເນື່ອງ ຄຽງຄູ່ກັບສະພາບການເພີ່ມຂຶ້ນຂອງລາຄາສິນຄ້ານັ້ນເຫັນວ່າການສະໜອງສິນຄ້າ ຍັງພຽງພໍກັບການຊົມໃຊ້ໃນນະຄອນຫລວງວຽງຈັນໂດຍພື້ນຖານ ຍົກເວັ້ນ ນ້ຳມັນທີ່ມີການຂາດຕະຫລາດໃນໄລຍະວັນທີ 15 ພຶດສະພາ- 24 ມິຖຸນາ 2022 ແລະ ໄລຍະຕໍ່ມາກໍສາມາດປັບສູ່ສະພາບປົກກະຕິ.
ສຳລັບທິດທາງແຜນການປີ 2023 ສືບຕໍ່ການຄຸ້ມຄອງລາຄາສິນຄ້າ ແລະ ຄ່າບໍລິການຕາມທີ່ໄດ້ກຳນົດໄວ້ໃນດຳລັດ 474/ນຍ ໂດຍສະເພາະສິນຄ້າທີ່ລັດຄວບຄຸມບັນຊີ ກ ແລະ ສິນຄ້າທີ່ຕ້ອງໄດ້ຕິດຕາມການເໜັງຕີງຂອງລາຄາໃນບັນຊີ ຂ ສືບຕໍ່ກຳນົດລາຍການສິນຄ້າ ແລະ ຄ່າບໍລິການຕາມພາລະບົດບາດຂອງຂະແໜງການທີ່ຍັງບໍ່ທັນໄດ້ກຳນົດລາຍການຄວບຄຸມລາຄາໃຫ້ສຳເລັດ, ເຜີຍແຜ່ແຈ້ງການການຄວບຄຸມລາຄາສິນຄ້າໃຫ້ສື່ມວນຊົນຮັບຊາບ, ເຜີຍແຜ່ໃຫ້ຈັດສັນຕະຫລາດເພື່ອໃຫ້ຊາວຄ້າຂາຍເຂົ້າໃຈ, ຈັດຕັ້ງຈຸດຮັບແຈ້ງກໍລະນີມີການຂາຍເກີນລາຄາ ໂດຍສະເພາະຈັດສັນຕະຫລາດຈະເປັນຈຸດຮັບແຈ້ງ ແລະ ຈະເປັນຜູ້ປະສານງານກັບພາກລັດໂດຍກຳນົດເອົາເບີໂທແຈ້ງ 1510 ແລະ ເບີໂທເຈົ້າໜ້າທີ່ຂອງແຕ່ລະເມືອງ, ສືບຕໍ່ສຶກສາອົບຮົມຜູ້ປະກອບການຊາວຄ້າຂາຍທີ່ສວຍໃຊ້ຂຶ້ນລາຄາສິນຄ້າຕາມລຳພັງໃຈ.
ສຳລັບ ພະແນກສຶກສາ ແລະ ກິລາ ນະຄອນຫລວງວຽງຈັນສືບຕໍ່ຄຸ້ມຄອງລາຄາສິນຄ້າ ແລະ ການຈຳໜ່າຍປື້ມຕ່າງໆຂອງຂະແໜງການສຶກສາ ແລະ ຄາດວ່າໃນ 6 ເດືອນ ທ້າຍປີ ປື້ມແບບຮຽນຈະມີການປັບລາຄາເພີ່ມຂຶ້ນ ເນື່ອງຈາກລາຄາຕົ້ນທຶນມີການເໜັງຕີງ ແຕ່ທາງຂະແໜງການສຶກສາຈະຄວບຄຸມໃຫ້ມີຜົນກະທົບຕໍ່ນັກຮຽນ ແລະ ຜູ້ປົກຄອງໜ້ອຍທີ່ສຸດ.
ທີ່ມາ: ໂທລະພາບນະຄອນຫລວງວຽງຈັນ
