ກົມຕໍາຫລວດຈະລາຈອນ ມີຄະດີເກີດຂຶ້ນ 6.795 ເລື່ອງ ສາມາດແກ້ໄຂຄະດີໄດ້ 5.215 ເລື່ອງ

ວັນທີ 24 ມີນາ 2023 ຜ່ານມາ, ກົມຕໍາຫລວດຈະລາຈອນ ກົມໃຫຍ່ຕໍາຫລວດ ກະຊວງ ປກສ ຈັດກອງປະຊຸມສະຫລຸບການເຄື່ອນໄຫວວຽກງານວິຊາສະເພາະ ປະຈໍາປີ 2022 ແລະ ວາງທິດທາງແຜນການ ປະຈໍາປີ 2023 ໂດຍການເປັນປະທານຂອງທ່ານ ພັອ ກົງສີ ສຸວັນນະຕຸ້ມ ຫົວໜ້າກົມຕໍາຫລວດຈະລາຈອນ, ມີ ທ່ານ ພົຈວ ນິລະວົງ ເຈືອງຕະວະລາດ ຮອງຫົວໜ້າກົມໃຫຍ່ຕໍາຫລວດ ເຂົ້າຮ່ວມ.

ທ່ານ ພັອ ຄໍາເຫລັກ ໄຊຍະສິດ ຮອງຫົວໜ້າກົມຕໍາຫລວດຈະລາຈອນ ກ່າວວ່າ: ໃນໄລຍະຜ່ານມາ, ຄະນະພັກ-ຄະນະບັນຊາ ແຕ່ລະຂັ້ນພາຍໃນກົມໄດ້ສຸມໃສ່ຊີ້ນຳບັນຊາຕາມພາລະບົດບາດສາຍຕັ້ງວິຊາສະເພາະ ໂດຍຫັນເອົາທິດທາງແຜນການ, ເອກະສານນິຕິກຳຕ່າງໆ, ແຜນຍຸດທະສາດ ແລະ ໂຄງການສົ່ງໃຫ້ທ້ອງຖິ່ນ ເພື່ອຫັນມາເປັນແຜນການອັນລະອຽດໃນການຈັດຕັ້ງປະຕິບັດໃຫ້ປະກົດຜົນເປັນຈິງ, ເຊິ່ງສະແດງອອກຜົນງານຄື: ໄດ້ເອົາໃຈໃສ່ປ້ອງກັນເປີດທາງໃຫ້ຜູ້ນຳພັກ-ລັດ, ແຂກຕ່າງປະເທດ, ປ້ອງກັນຈັດລະບຽບກອງປະຊຸມ ແລະ ວັນບຸນສຳຄັນຕ່າງໆຂອງຊາດໃນຂອບເຂດທົ່ວປະເທດມີຄວາມປອດໄພ 100%, ເຊິ່ງສະແດງອອກ ຄື: ຈັດລະບຽບ ແລະ ປ້ອງກັນເປີດທາງ ທັງໝົດ 184 ຄັ້ງ, ມີ 1.088 ຄົນ; ໃນນັ້ນ, ເປີດທາງກົມການເມືອງ 65 ຄັ້ງ, ມີ 122 ຄົນ, ເປີດທາງແຂກພາຍໃນ 30 ຄັ້ງ, 104 ຄົນ, ເປີດທາງແຂກຕ່າງປະເທດ 34 ຄັ້ງ, ມີ 255 ຄົນ, ປ້ອງກັນ-ຈັດລະບຽບ 55 ຄັ້ງ, ມີ 607 ຄົນ, ຈຳນວນພາຫະນະຮັບໃຊ້ປ້ອງກັນມີລົດຈັກ 178 ຄັນ, ລົດສະຫລາມ 26 ຄັນ.

ນອກນັ້ນ, ກົມຕຳຫລວດຈະລາຈອນ ຍັງໄດ້ເຂົ້າຮ່ວມຈັດລະບຽບ ແລະ ປ້ອງກັນເປີດທາງໃຫ້ກອງປະຊຸມສະໄໝສາມັນຂອງສະພາແຫ່ງຊາດ  ຈຳນວນພົນ20 ຍິງ 3 ຄົນ, ນຳໃຊ້ລົດຈັກເປີດທາງ 3 ຄັນ, ແລະ ເຂົ້າຮ່ວມປ້ອງກັນຈັດລະບຽບເປີດທາງງານມະຫາກຳກິລາແຫ່ງຊາດທີ່ ແຂວງຊຽງຂວາງ ເປັນເຈົ້າພາບ ຈຳນວນ ພົນ 63 ຄົນ, ພາຫະນະ 30 ຄັນ, ລົດຈັກມ້າຂາວ 20 ຄັນ, ລົດສະຫຼາມ 10 ຄັນ.

ສໍາລັບວຽກງານອຸບັດເຫດ, ທົ່ວປະເທດ ມີອຸບັດເຫດເກີດຂື້ນທັງໝົດ: 6.440 ເລື່ອງ, ຄ້າງມາ 355 ເລື່ອງ, ຊັດມ້ຽນ 5.856 ເລື່ອງ, ສົ່ງໃຫ້ອົງການໄອຍະການປະຊາ ຊົນ 381 ເລື່ອງ, ໂຈະການດຳເນີນ 92 ເລື່ອງ, ສືບຕໍ່ດຳເນີນແກ້ໄຂ 821 ເລື່ອງ, ຄະດີເກີດຂຶ້ນບວກໃສ່ຄະດີຄ້າງເກົ່າ ລວມທັງໝົດມີ 6.795 ເລື່ອງ; ເຊິ່ງໃນນັ້ນ, ສາມາດດຳເນີນແກ້ໄຂຄະດີໄດ້ທັງໝົດ 5.215 ເລື່ອງ ເທົ່າກັບ 93.42 %.

ທິດທາງແຜນການໃນປີ 2023 ນີ້, ແມ່ນຈະສືບຕໍ່ສ້າງແຜນການລົງເຄື່ອນໄຫວຊຸກຍູ້ແນະນຳວຽກງານວິຊາສະເພາະໃຫ້ກຳລັງຕຳຫຼວດຈະລາ ຈອນນະຄອນຫຼວງວຽງຈັນ ແລະ ບັນດາແຂວງໃນຂອບເຂດທົ່ວປະເທດ, ຂຶ້ນແຜນເປີດຝຶກອົບຮົມວຽກງານວິຊາສະເພາະໃຫ້ກຳລັງຕຳຫຼວດຈະລາຈອນທົ່ວປະເທດ ໂດຍສະເພາະວຽກງານໂຄສະ ນາ, ວຽກກວດກາບັງຄັບໃຊ້ກົດໝາຍ ແລະ ວຽກງານການດຳເນີນຄະດີອຸບັດຕິເຫດ, ຄົ້ນຄວ້າ ແລະ ປັບປຸງບັນດານິຕິກຳ, ເອກະສານ, ຮ່າງເກັບກາສະຖິຕ່າງໆໃຫ້ສອດ ຄ່ອງ ແລະ ແທດເໝາະກັບສະພາບການແຕ່ລະໄລຍະ. ສ້າງແຜນການກະກຽມປ້ອງກັນ, ສະກັດກັ້ນອຸບັດຕິເຫດໃນໄລຍະການສະເຫຼີມສະຫຼອງປີໃໝ່ສາກົນ, ປີໃໝ່ລາວ, ບຸນອອກພັນສາ ແລະ ວັນສໍາຄັນຕ່າງໆ. ພ້ອມທັງສ້າງເວບໄຊສ໌ ສະເພາະຂອງກໍາລັງຕໍາຫຼວດຈະລາຈອນໃຫ້ສຳເລັດ.