ພະແນກສາທາລະນະສຸກ ແຂວງຫລວງພະບາງ ອອກແຈ້ງເຕືອນປະຊາຊົນປ້ອງກັນຝຸ່ນ PM 2,5 ເຖິງຂັ້ນອັນຕະລາຍຕໍ່ສຸຂະພາບ
ວັນທີ 27 ມີນາ 2023 ນີ້, ພະແນກສາທາລະນະສຸກແຂວງຫລວງພະບາງ ໄດ້ແຈ້ງການເລກທີ 232/ສທຂ ກ່ຽວກັບສະພາບອາກາດຝຸ່ນລະອອງ ທີ່ມີຂະໜາດນ້ອຍກ່ວາ 2.5 ໄມຄອນ (PM2.5) ເຊິ່ງປັດຈຸບັນນີ້ທາງແຂວງ ຫລວງພະບາງ ແມ່ນໄດ້ມີການປົກຄຸມໂດຍໝອກຄວັນດັ່ງກ່າວ, ເຊິ່ງມີຄວາມອັນຕະລາຍຕໍ່ສຸຂະພາບຂອງປະຊາຊົນບັນດາເຜົ່າ ໂດຍເຂດມາດຕະຖານທີ່ກໍານົດຂອງຝຸ່ນລະອອງ 2.5 PM ຕໍ່າກ່ວາ (50 Mg/m)/24h) ປັດຈຸບັນແຂວງຫລວງພະບາງ ວັດແທກໄດ້ PM(Mg/m/24h) 413.1 ດັດສະນີຄຸນນະພາບ ອາກາດ (AQI) ແມ່ນ ສູງກ່ວາ 300 ການຈັດລະດັບ AQI ແມ່ນມີຜົນກະທົບຕໍ່ສຸຂະພາບສູງເຊັ່ນ: ຕໍ່ຮ່າງກາຍຈະມີ ອາການຕາແດງ, ເລືອດດັງອອກ, ປອດອັກເສບ, ໄອ, ເຈັບຄໍ, ເສັ້ນເລືອດຫົວໃຈຕີບ, ຜິວໜັງເປັນຜື່ນຄັນ, ເສັ້ນເລືອດ ສະໜອງຕີບ ແລະ ເຂົ້າສູ່ກະແສເລືອດ. ບັນຫາດັ່ງກ່າວເຫັນວ່າມີຜົນກະທົບອັນຕະລາຍຕໍ່ສຸຂະພາບຫລາຍ. ສະນັ້ນ, ທາງພະແນກສາທາລະນະສຸກແຂວງ ຈຶ່ງໄດ້ແຈ້ງມາຍັງທ່ານຫົວໜ້າຫ້ອງການສາທາລະນະສຸກເມືອງ, ນະຄອນ ຈົ່ງເອົາໃຈໃສ່ຜັນຂະຫຍາຍແຈ້ງເຕືອນປະຊາຊົນໃຫ້ເອົາໃຈໃສ່ການປ້ອງກັນຕາມວິທີດັ່ງນີ້:
- ໃຫ້ໃສ່ຜ້າອັດປາກ-ດັງ N95;
- ພັກຜ່ອນ (ນອນຫລັບໃຫ້ພຽງພໍ);
- ຫລີກລ່ຽງກິດຈະກໍາກາງແຈ້ງ;
- ກວດຄວາມຫນາແຫນ້ນຂອງຝຸ່ນລະອອງ;
- ຫາກເກີດຄວາມຜິດປົກກະຕິທາງຮ່າງກາຍ ແມ່ນຮີບຮ້ອນໄປພົບແພດໝໍທັນທີ.
ເຊິ່ງໝອກຄວັນດັ່ງກ່າວນັ້ນມີຜົນອັນຕະລາຍຕໍ່ສຸຂະພາບຂອງປະຊາຊົນ ເພື່ອຫລີກລ່ຽງຝຸ່ນລະອອງດັ່ງກ່າວ ແມ່ນໃຫ້ຢູ່ໃນເຮືອນໂດຍປາສະຈາກ ແລະ ຫລີກລ່ຽງ, ຖ້າຈະອອກນອກເຮືອນ ຫລື ເດີນທາງໄປ-ມາ ແມ່ນໃຫ້ໃສ່ຜ້າປິດປາກ- ດັງ N95.
ດັ່ງນັ້ນ, ຈຶ່ງແຈ້ງມາຍັງທ່ານເພື່ອຮັບຊາບ ແລະ ໃຫ້ຄວາມຮ່ວມມືໃນການຜັນຂະຫຍາຍແຈ້ງການສະບັບນີ້ ລົງສູ່ທ້ອງຖິ່ນ (ຂັ້ນບ້ານ) ໃຫ້ທົ່ວເຖິງ.
