ຫ້ອງນໍ້າສະອາດ ກໍສາມາດ ດຶງດູດນັກທ່ອງທ່ຽວ ແລະ ລູກຄ້າໄດ້
ຫ້ອງນໍ້າບໍ່ໄດ້ແມ່ນວຽກທີ່ເປັນບຸລິມະສິດຫຍັງດອກໃນການພັດທະນາການທ່ອງທ່ຽວ ແຕ່ມັນເປັນລາຍລະອຽດໜຶ່ງທີ່ພວກເຮົາບໍ່ຄວນເບິ່ງຂ້າມເພື່ອທີ່ຈະສ້າງຄວາມປະທັບໃຈແກ່ນັກທ່ອງທ່ຽວ.
ໃນມື້້ພັກປີໃໝ່ສາກົນທີ່ຜ່ານມາ ຜູ້ຂຽນໄດ້ມີໂອກາດໄປຢ້ຽມຢາມແຫຼ່ງທ່ອງທ່ຽວແຫ່ງໜຶ່ງທີ່ມີຊື່່ສຽງຢູ່ພາກໃຕ້ຂອງລາວ ເຊິ່ງເປັນນໍ້າຕົກຕາດທີ່ເປັນຮູ້ຈັກດີພໍສົມຄວນ. ທຳມະຊາດ ຮວມທັງນໍ້າທີ່ໄຫຼລົງຈາກໜ້າຜານັ້ນເຮັດໃຫ້ຄວາມຊຸ່ມຊື່ນຈິດໃຈ, ມີຊີວິດຊີວາ ແຕ່ສິ່ງທີ່ຕິດໃນມະໂນພາບຂອງຜູ້ຂຽນພັດບໍ່ແມ່ນເລື່ອງຄວາມງາມເຫຼົ່ານັ້ນ ແຕ່ແມ່ນກິ່່ນແຮງໆ ຂອງຫ້ອງນໍ້າເຊິ່ງຜູ້ຄົນຊົມໃຊ້ຢ່າງ ຄັບຄາໜ້າແໜ້ນ ແຕ່ຫຼຽວໄປທາງໃດກໍບໍ່ມີຜູ້ຮັບຜິດຊອບມາອະນາໄມ, ເມື່ອເປັນດັ່ງນີ້ພວກເຮົາຈະເຮັດ ໃຫ້ຫ້ອງນໍ້າຕາມສະຖານທີ່ທ່ອງທ່ຽວເຮົາສະອາດໄດ້ແນວໃດ ?.
ແລະແລ້ວກໍມາຄິດພໍ້ກັບນະໂຍບາຍດີໆທີ່ຜ່ານມາຂອງ ສປ ຈີນ ໃນປີ 2015 ທີ່ເພິ່ນອະນຸມັດງົບປະມານຢ່າງມະຫາສານ ເພື່ອດຳເນີນໂຄງການ ການປະຕິວັດຫ້ອງນໍ້າຢູ່ ສປ ຈີນ ເຊິ່ງແມ່ນ ທ່ານ ສີ ຈິ້ນຜິງ ຜູ້ນໍາຂອງ ສປ ຈີນໄດ້ນຳສະເໜີ ເພື່ອແນໃສ່ການປັບປຸງຫ້ອງນໍ້າສາທາລະນະ ໂດຍສະເພາະສະຖານທີ່ທ່ອງທ່ຽວ. ລັດຖະບານໄດ້ອະນຸມັດເງິນກວ່າ 3 ຕື້ໂດລາ ເພື່ອສ້າງ ແລະປັບປຸງຫ້ອງນໍ້າກວ່າ 67.000 ແຫ່ງທົ່ວປະເທດ ແລະອົງການທ່ອງທ່ຽວແຫ່ງຊາດຈີນ (CNTA) ຍັງມີແຜນການສ້າງ ແລະປັບປຸງຫ້ອງນໍ້າ 47.000 ກວ່າແຫ່ງ ເຊິ່ງ ທ່ານ ສີ ຈິ້ນຜິງ ໄດ້ວ່າຕໍ່ສາທາລະນະວ່າ “ບັນຫາຫ້ອງນໍ້າບໍ່ແມ່ນເລື່ອງນ້ອຍ, ການສ້າງ ແລະປັບປຸງຫ້ອງນໍ້າ ແມ່ນຈະສາມາດກະຕຸ້ນການທ່ອງທ່ຽວ ແລະຍົກສູງມາດຖານການດຳລົງຊີວິດຂອງຄົນຈີນໃຫ້ດີກວ່າເກົ່າ” ເພາະສະນັ້ນ ຈຶ່ງເປັນຕາອອນຊອນນຳແນວຄິດຂອງຜູ້ນໍາທີ່ຍິ່ງໃຫຍ່ທີ່ໃຫ້ຄວາມສຳຄັນກັບເລື່ອງທີ່ ພວກເຮົາຄິດວ່າ “ເປັນເລື່ອງເລັກນ້ອຍໆ” ນີ້.
ນອກຈາກແນວຄິດຂອງທ່ານຜູ້ນຳທີ່ຍິ່ງໃຫຍ່ຂອງຈີນແລ້ວ ມາເວົ້າຢູ່ມໍ່ໆບ້ານເຮົາ ໂດຍສະເພາະທຸລະກິດໃຫຍ່ຂອງໄທທີ່ເຂົ້າມາລົງທຶນປໍ້ານໍ້າມັນຢູ່ລາວເຮົາ ເຊິ່ງທຸກຄົນຄົງຈະຮູ້ດີ ທັງສະດວກສະບາຍ, ຈັດສັນເປັນລະບຽບ ແລະ ສະອາດ ເຮົາຈະຮູ້ສຶກສະບາຍທຸກຄັ້ງທີ່ໄດ້ພົບ ແລະ ໄດ້ເຂົ້າແວ່ໃຊ້ບໍລິການຂອງເພິ່ນ.
ຖ້າແຫຼ່ງທ່ອງທ່ຽວອື່ນໆອີກຫຼາຍບ່ອນທົ່ວປະເທດ ມີສະພາບດັ່ງສະຖານທີ່ ທີ່ຜູ້ຂຽນປະສົບພົບພໍ້ມານີ້ ກໍຄົງໜ້າຄິດຫງໍາບໍ່ໜ້ອຍວ່າເຮົາຈະສາມາດສ້າງໃຫ້ປະເທດລາວເຮົາເປັນເປົ້າໝາຍປາຍທາງແຫ່ງການທ່ອງທ່ຽວຢ່າງສົມສັກສີ ມີນັກທ່ອງທ່ຽວຫຼາຍລ້ານເທື່ອຄົນ ເຊິ່ງຈະເຮັດໄດ້ຫຼບໍ່ນັນແມ່ນມີຫຼາຍປັດໄຈ.
ຜູ້ຂຽນໄດ້ມີໂອກາດລົມນໍາເຈົ້າຂອງບໍລິສັດນຳທ່ຽວແຫ່ງໜຶ່ງຢູ່ ນະຄອນຫຼວງວຽງຈັນໃນເວລາທີ່ໃຊ້ບໍລິການ ຂອງເພິ່ນໄປທ່ຽວປະເທດໃກ້ຄຽງ ເຊິ່ງເພິ່ນກໍປະກອບການດ້ານນີ້ ມາໄດ້ 5 ປີກວ່າແລ້ວ, ໜຶ່ງໃນຄຳແນະນຳຕາມປະສົບການຂອງເພິ່ນ ເພື່ອປັບປຸງວຽກງານການທ່ອງທ່ຽວໃນ ສປປ ລາວ ເຮົາ ກໍແມ່ນບັນຫາຫ້ອງນໍ້ານີ້ລະ, ເພິ່ນກ່າວວ່າ “ມີຫຼາຍເທື່ອແຂກທີ່ໃຊ້ບໍລິການຂອງ ພວກເຮົາ ກໍມັກຈົ່ມເລື້ອຍໆວ່າ ຫ້ອງນໍ້າຢູ່ຕາມສະຖານທີ່ທ່ອງທ່ຽວຢູ່ລາວ ຈັ່ງແມ່ນບໍ່ສະອາດເນາະ” ເຊິ່ງເພິ່ນໄດ້ ກືນນໍ້າລາຍຍອມຮັບແບບອາຍໆວ່າຊັ້ນ.
ເມື່ອເຮົາຮູ້ບັນຫາຄືແນວນີ້ແລ້ວ, ຫ້ອງນໍ້າກໍຄົງຮອດເວລາແລ້ວທີ່ຈະໄດ້ຮັບການບົວລະບັດຂັດສີເປັນປະຈຳ ນຳຄວາມສະອາດ ທີ່ສາມາດສ້າງຄວາມປະທັບໃຈແກ່ນັກທ່ອງທ່ຽວນັບແຕ່ ກ້າວຂາເຂົ້າສູ່ສະຖານທີ່ທ່ອງທ່ຽວນັ້ນໂລດ, ໃຫ້ເພິ່ນຮູ້ວ່າ ຄົນລາວກໍມັກຄວາມສະອາດບໍ່ຢອກເດີ!
