ເຈົ້າຄອງນະຄອນຫລວງ ເຄື່ອນໄຫວຕິດຕາມ ແລະ ເນັ້ນໃຫ້ເມືອງປາກງື່ມຂຶ້ນແຜນຢ່າງຮອບດ້ານ ເພື່ອດັບມອດໄຟລາມປ່າຢູ່ເຂດພູເຂົາຄວາຍ

ວັນທີ 27 ມີນາ 2023, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ (ນວ) ເຄື່ອນໄຫວຕິດຕາມ ແລະ ໃຫ້ທິດຊີ້ນຳການແກ້ໄຂສະພາບໄຟໄໝ້ລາມປ່າ ເຂດພູເຂົາຄວາຍ ເມືອງປາກງື່ມ ນວ, ເຊິ່ງທ່ານໄດ້ເນັ້ນໃຫ້ອົງການປົກຄອງເມືອງຂຶ້ນແຜນຢ່າງຮອບດ້ານ ເພື່ອຕະລຸມບອນໃນການດັບມອດໄຟລາມປ່າຢູ່ເຂດດັ່ງກ່າວບໍ່ໃຫ້ລຸກລາມໄປເປັນບໍລິເວນກວ້າງ.

ທ່ານ ກອງມີ ສີສະໝຸດ ຮອງເຈົ້າເມືອງປາກງື່ມ ລາຍງານກ່ຽວກັບສະພາບການແກ້ໄຂເບື້ອງຕົ້ນໃນການສະກັດກັ້ນເຫດການໄຟໄໝ້ລາມປ່າ ວ່າ: ຕອນເຊົ້າຂອງວັນທີ 24 ມີນາ 2023 ເກີດມີໄຟໄໝ້ຢູ່ເຂດນໍ້າປ່ຽນບ້ານຊຽງແລທ່າ ກໍາລັງຂອງບ້ານດັ່ງກ່າວສາມາດມອດໄດ້ ໃນເວລາ 12:00 ໂມງ ຂອງວັນດຽວກັນເກີດມີໄຟໄໝ້ມາທຸກທິດເຊັ່ນ: ທິດຕາເວັນອອກຕິດກັບເຂດແດນເມືອງ ທ່າພະບາດ ແຂວງ ບໍລິຄໍາໄຊ ທິດເໜືອຕິດກັບເຂດແດນເມືອງທຸລະຄົມ ແຂວງວຽງຈັນ ທາງເມືອງໄດ້ໃຊ້ກໍາລັງຂອງບ້ານ ແລະ ກໍາລັງພະນັກງານນໍ້າປ່ຽນຂຶ້ນສະກັດແຕ່ບໍ່ສາມາດມອດບໍ່ໄດ້, ຍ້ອນມີລົມພັດແຮງ ວັນທີ 25 ມີນາ ໄດ້ຂໍກໍາລັງທະຫານຈາກກອງພັນ 512 ປະຊາຊົນ ແລະ ພະນັກງານນໍ້າປ່ຽນ ລວມປະມານ 60 ຄົນ ຂຶ້ນຕັດແລ້ວປັດກວດໃບໄມ້ ເພື່ອຕັດເສັ້ນທາງໄຟບໍ່ໃຫ້ໄຟສາມາດຂ້າມໄດ້ ວັນທີ 26 ມີນາ ໄດ້ນໍາໃຊ້ກໍາລັງ ທະຫານເມືອງ ກໍາລັງ 512 ກໍາລັງ ບ້ານ ແລະ ພະນັກງານນໍ້າປຽນຂື້ນສະກັດ ເຊິ່ງຄາດຄະເນໄຟໄໝ້ໃນຄັ້ງນີ້ປະມານ 250 ເຮັກຕາ. ຮອດວັນທີ 27 ມີນາ ໄດ້ນໍາໃຊ້ກໍາລັງຂຶ້ນສະກັດມອດໄຟຢູ່ 4 ຈຸດຄື: ເຂດບ້ານເວີນກະເບົາ ໃຊ້ກໍາລັງ ປກສ ພະນັກງານຈາກບັນດາຫ້ອງການຕ່າງ ແລະ ປະຊາຊົນພາຍໃນບ້ານ 100 ຄົນ ເຂດບ້ານຊຽງແລນາ ນໍາໃຊ້ກໍາລັງປະຊາຊາຊົນພາຍໃນບ້ານ 60 ຄົນ ເຂດບ້ານຊຽງແລທ່າ ເຂດນໍ້າປ່ຽນນໍາໃຊ້ກໍາລັງກອງພັນ 512 ທະຫານເມືອງ ບ້ານ ແລະ ພະນັກງານນໍ້າປຽນ 150 ຄົນເຂດບ້ານໂນນ ນໍາໃຊ້ກໍາລັງປະຊາຊົນພາຍໃນບ້ານ 50 ຄົນ, ເຊິ່ງວິທີການແກ້ໄຂນໍາໃຊ້ກໍາລັງຕັດແລ້ວປັດກວດໃບໄມ້, ຕັດຂອນໄມ້, ໃຊ້ໄຟຈູດລັດກັບກັນ, ນອກນັ້ນອໍານາດການປົກຄອງບ້ານໄດ້ສະເໜີຂໍບັ້ງສົດນໍ້າ 15 ເຄື່ອງ ເພື່ອນໍາໃຊ້ເຂົ້າໃນການມອດໄຟ.

ໂອກາດດັ່ງນີ້, ທ່ານເຈົ້າຄອງນະຄອນ ນວ ໄດ້ເນັ້ນໃຫ້ເອົາໃຈໃສ່ເປັນຕົ້ນເຊັ່ນ: ກໍາລັງຄົນ, ງົບປະມານ, ອຸປະກອນຮັບໃຊ້ ແລະ ວິທີການຈັດຕັ້ງປະຕິບັດ ໂດຍໃຫ້ແຕ່ງຕັ້ງທີມງານຢ່າງລະອຽດຮອບຄອບ ພ້ອມທັງແຕ່ງຕັ້ງໜ່ວຍປະຈານບານ ເພື່ອຕະລຸມບອນໃນການດັບມອດໄຟບໍ່ໃຫ້ລຸກລາມໄປຕື່ມ, ທັງຕ້ອງມີການປະສານສົມທົບກັບທຸກພາກສ່ວນ ໂດຍສະເພາະຂໍກໍາລັງ ປກຊ-ປກສ ແລະ ລະດົມປະຊາຊົນເຂົ້າຊ່ວຍ ເຊິ່ງຕ້ອງມີການແນະນໍາວິທີໃນການສະກັດຢ່າງຖືກຕ້ອງ. ນອກນັ້ນຕ້ອງໄດ້ເອົາໃຈໃສ່ຕິດຕາມສະພາບການ ເພື່ອແກ້ໄຂໃຫ້ຖືກກັບເປົ້າໝາຍລົງເກັບກໍາຂໍ້ມູນສາເຫດ ແລະ ປະຕິບັດໃຫ້ຖືກຕ້ອງຕາມລະບຽບຫລັກການ ແລະ ດໍາເນີນມາດຕະການຢ່າງເຂັ້ມງວດ ພ້ອມຫາວິທີປ້ອງກັນບໍ່ໃຫ້ສົ່ງຜົນກະທົບຕໍ່ຜົນລະປູກ, ຊີວິດ ແລະ ຊັບສິນຂອງປະຊາຊົນ ທັງຫາວິທີທາງແກ້ໄຂແຕ່ຫົວທີ ເພື່ອປ້ອງກັນບໍ່ໃຫ້ເກີດມີກໍລະນີແບບນີ້ອີກ. ນອກນີ້, ຕ້ອງໄດ້ເອົາໃຈໃສໂຄສະນາໃຫ້ປະຊາຊົນ ພ້ອມກັນຊ່ວຍເປັນເຈົ້າການໃນການສະກັດກັ້ນບໍ່ໃຫ້ມີການຈູດປ່າຖາງໄຮ່ ທີ່ຈະກໍ່ໃຫ້ເກີດມີຄວາມສ່ຽງໄຟໄໝ້ລາມປ່າ ທັງຮູ້ຈັກວິທີປ້ອງກັນ ເພື່ອຮັກສາສຸຂະພາບອານາໄມຈາກຄັວນທີ່ເກີດຈາກໄຟໄໝ້ ແລະ ລະດົມ ທຸກພາກສ່ວນຊ່ວຍກັນດັບມອດໄຟໃຫ້ສໍາເລັດໂດຍໄວ.

ຂໍ້ມູນ: Vientiane Mai