ເລືອກນົມຖົ່ວເຫລືອງແນວໃດໃຫ້ໄດ້ປະໂຫຍດສູງສຸດ ?

ເພື່ອຄວາມປອດໄພ ແລະ ໃຫ້ຮ່າງກາຍໄດ້ຮັບປະໂຫຍດສູງສຸດຈາກການດື່ມນົມຖົ່ວເຫລືອງ ບົດຄວາມນີ້ມີເຄັດລັບການເລືອກຊື້ ແລະ ການດື່ມນົມຖົ່ວເຫລືອງມານຳສະເໜີບັນດາທ່ານ.

1. ອ່ານສະຫລາກກ່ອນຊື້ : ເພາະແຕ່ລະຜະລິດຕະພັນແຕ່ລະຍີ່ຫໍ້ອາດມີປະລິມານ ແລະ ສານອາຫານທີ່ແຕກຕ່າງກັນ, ການອ່ານສະຫລາກຈະຊ່ວຍໃຫ້ເຮົາເລືອກຜະລິດຕະພັນທີ່ເໝາະສົມກັບຕົວເຮົາຫລາຍຂຶ້ນ ເຊັ່ນ: ຫາກຕ້ອງການເພີ່ມໂປຣຕິນກໍຄວນເລືອກນົມຖົ່ວເຫລືອງທີ່ມີໂປຣຕິນສູງ, ຫາກຢູ່ໃນໄລຍະຫລຸດນຳ້ໜັກກໍຄວນເລືອກຜະລິດຕະພັນທີ່ໃຫ້ພະລັງງານຕໍ່າ.
2. ເລືອດສູດບໍ່ຕື່ມນຳ້ຕານ : ເຖິງວ່ານົມຖົ່ວເຫລືອງຈະມີປະໂຫຍດຕໍ່ສຸຂະພາບ, ແຕ່ຜະລິດຕະພັນທີ່ວາງຈຳໜ່າຍມັກຕື່ມນຳ້ຕານເພື່ອເພີ່ມລົດຊາດຫວານແຊບ ຫາກຮ່າງກາຍໄດ້ຮັບນຳ້ຕານຫລາຍເກີນໄປ ອາດຈະສົ່ງຜົນຮ້າຍຕໍ່ສຸຂະພາບໄດ້ຫລາຍກ່ວາຜົນດີ ຈຶ່ງຄວນເລືອກສູດບໍ່ຕື່ມນຳ້ຕານເພື່ອໃຫ້ຮ່າງກາຍໄດ້ປະໂຫຍດຢ່າງເຕັມທີ່.
3. ເລືອກນົມຖົ່ວເຫລືອງທີ່ມີທັນຍາພືດຫລາກຫລາຍຊະນິດ : ເພາະເຖິງວ່າຄົນລາວຈະລຶ້ງເຄີຍກັບນົມຖົ່ວເຫລືອງກັນເປັນຢ່າງດີ, ແຕ່ຄົນທີ່ບໍ່ມັກກິ່ນຂອງນົມຖົ່ວເຫລືອງອາດລອງເລືອກດື່ມຜະລິດຕະພັນທີ່ປະສົມທັນຍາພືດຊະນິດອື່ນ ເຊັ່ນ: ງາດຳ, ງາຂາວ, ທັນຍາພືດ, ມັອລສະກັດ ຫລື ມັລຕິເກຣນ ກໍອາດຊ່ວຍຫລຸດກິ່ນນົມຖົ່ວເຫລືອງລົງໄດ້ ເຮັດໃຫ້ດື່ມງ່າຍຂຶ້ນ ທັງອາດໄດ້ຮັບສານອາຫານທີ່ຫລາກຫລາຍຂຶ້ນຕື່ມ.
4. ເລືອກສູດທີ່ຕື່ມສານອາຫານ : ເນື່ອງຈາກນົມຖົ່ວເຫລືອງມີທາດການຊຽມຕາມທຳມະຊາດໜ້ອຍ ເພື່ອຊົດເຊີຍໃນພາກສ່ວນນີ້ຈຶ່ງຄວນເລືອກນົມຖົ່ວເຫລືອງທີ່ຕື່ມທາດການຊຽມ ແລະ ສານອາຫານອື່ນໆ ເຊັ່ນ: ວິຕາມິນ D, ວິຕາມິນ A, ກົດໄຂມັນໂອເມກ້າ – 3 ເພື່ອຮັບປະໂຫຍດຈາກການດື່ມນົມຖົ່ວເຫລືອງໃຫ້ຫລາຍຂຶ້ນ.
5. ຫລີກເວັ້ນການດື່ມນົມຖົ່ວເຫລືອງ ຫາກມີປະຫວັດການແພ້ນົມຖົ່ວເຫລືອງ ຫລື ຜະລິດຕະພັນຈາກຖົ່ວເຫລືອງ.
6. ຜູ້ທີ່ມີພະຍາດປະຈຳຕົວ ແລະ ແມ່ມານ ສາມາດດື່ມນົມຖົ່ວເຫລືອງໄດ້ປົກກະຕິໃນປະລິມານທີ່ເໝາະສົມ ຫາກຮູ້ສຶກກັງວົນສາມາດປຶກສາທ່ານໝໍກ່ຽວກັບຄວາມປອດໄພໃນການດື່ມໄດ້.
7. ຫາກລູກແພ້ນົມແມ່, ນົມຝຸ່ນ ຫລື ນົມງົວ ຄວນປຶກສາທ່ານໝໍກ່ອນການໃຫ້ນົມຖົ່ວເຫລືອງ ຫລື ນົມຊະນິດອື່ນແກ່ລູກນ້ອຍ ເພາະເດັກນ້ອຍໃນໄວນີ້ຈຳເປັນຕ້ອງໄດ້ຮັບສານອາຫານບາງຊະນິດທີ່ມີຢູ່ໃນນຳ້ນົມແມ່, ນົມງົວ ແລະ ນົມຝຸ່ນສຳຫລັບເດັກເພື່ອເສີມພັດທະນາການຕາມອາຍຸ.

• ເຖິງວ່ານົມຖົ່ວເຫລືອງຈະມີຄຸນຄ່າທາງສານອາຫານສູງ ແລະ ມີຂໍ້ມູນທາງວິທະຍາສາດຮອງຮັບ, ແຕ່ຄວນດື່ມໃນປະລິມານທີ່ເໝາະສົມ, ກິນອາຫານທີ່ມີປະໂຫຍກຊະນິດອື່ນໆນຳ, ອອກກຳລັງກາຍຢ່າງເໝາະສົມ ແລະ ພັກຜ່ອນໃຫ້ພຽງພໍຢູ່ສະເໝີ. ນົມຖົ່ວເຫລືອງເປັນທາງເລືອກທີ່ດີທີ່ຊ່ວຍໃຫ້ຮ່າງກາຍໄດ້ຮັບສານອາຫານຢ່າງຄົບຖ້ວນ ເຊິ່ງການໄດ້ຮັບສານອາຫານຢ່າງຄົບຖ້ວນເປັນປະຈຳຍ່ອມສົ່ງຜົນໃຫ້ສຸຂະພາບແຂງແຮງ ແລະ ບໍ່ເຈັບປ່ວຍງ່າຍ ໂດຍສະເພາະການດູແລຕົນເອງຕັ້ງແຕ່ຫົວທີ ທີ່ຈະຊ່ວຍໃຫ້ໃຊ້ຊີວິດຢ່າງເຕັມທີ່ ແລະ ດຸ່ນດ່ຽງໃນທຸກໆດ້ານ ບໍ່ວ່າຈະເປັນການຮຽນ, ການເຮັດວຽກ ຫລື ການເຮັດກິດຈະກຳຕ່າງໆທີ່ທ່ານມັກ.