ລັດຖະສະພາຮົງກາລີມີມະຕິຮັບຮອງການສະໝັກເຂົ້າເປັນ ສະມາຊິກໃໝ່ NATO ຂອງຟິນແລນ
ລັດຖະສະພາຮົງກາລີມີມະຕິຮັບຮອງການສະໝັກເຂົ້າເປັນສະມາຊິກໃໝ່ອົງການ NATO ຂອງຟິນແລນແລ້ວໃນວັນທີ 27 ມີນາ ດ້ວຍມະຕິເຫັນພ້ອມ 182 ສຽງຕໍ່ສຽງຄັດຄ້ານ 6 ສຽງ ໂດຍສະມາຊິກໃໝ່ທີ່ຕ້ອງການສະໝັກເຂົ້າ NATO ຈໍາເປັນຕ້ອງໄດ້ຮັບມະຕິເຫັນພ້ອມຈາກສະມາຊິກເກົ່າທັງ 30 ປະເທດ ເຊິ່ງປັດຈຸບັນຕວກກີເປັນພຽງປະເທດດຽວທີ່ຍັງບໍ່ໄດ້ຮັບຮອງຟິນແລນ.
ສ່ວນປະທານາທິບໍດີ ເຣເຈບ ໄຕຢິບ ແອໂດອັນ ຂອງຕວກກີ ກ່າວໃນຕົ້ນເດືອນມີນາຜ່ານມາວ່າ: ທາງການຕວກກີກຽມເລີ່ມຂະບວນການຮັບຮອງການສະໝັກເຂົ້າເປັນສະມາຊິກໃໝ່ NATO ຂອງຟິນແລນໃນມໍ່ໆນີ້ ຫລັງຈາກເບິ່ງວ່າຟິນແລນມີຄວາມພະຍາຍາມຈະປະຕິບັດຕາມຄໍາຮ້ອງຂໍຂອງຕວກກີໃນບັນຫາກ່ຽວຂ້ອງການຈໍາກັດສິດ ແລະ ພື້ນທີ່ຂອງກຸ່ມກະບົດຊາວເຄີດພາຍໃນຟິນແລນ ເຊິ່ງມີການກ່ຽວຂ້ອງຕໍ່ເຫດການຄວາມບໍ່ສະຫງົບໃນຕວກກີມາຫລາຍທົດສະວັດ.
ເຖິງຢ່າງໃດກໍຕາມ, ຫລັງຈາກຟິນແລນໄດ້ຮັບມະຕິຮັບຮອງຈາກຕວກກີແລ້ວໃນອະນາຄົດ ຍັງມີຂັ້ນຕອນສໍາຄັນກ່ອນຟິນແລນຈະເຂົ້າເປັນສະມາຊິກລໍາດັບທີ 31 ຂອງ NATO ຢ່າງເປັນທາງການ ໂດຍລັດຖະບານຮົງກາລີ ແລະ ຕວກກີຈະສົ່ງຈົດໝາຍຕອບຮັບໄປຫາອາເມລິກາ ພ້ອມຊີ້ແຈງໃຫ້ທ່ານ ເຢນ ສໂຕລເທນເບິກ ເລຂາທິການ NATO ຮັບຮູ້ເຖິງມະຕິຮັບຮອງດັ່ງກ່າວ ກ່ອນທ່ານ ສໂຕລເທນເບິກ ຈະສົ່ງໜັງສືເຊີນໄປຫາລັດຖະບານຟິນແລນໃຫ້ຜູ້ແທນລະດັບສູງລົງນາມ ແລ້ວສົ່ງຈົດໝາຍຕອບຮັບດັ່ງກ່າວໄປຫາກະຊວງການຕ່າງປະເທດອາເມລິກາ ຈະເຮັດໃຫ້ຟິນແລນກາຍເປັນປະເທດສະມາຊິກ NATO ໂດຍສົມບູນ.
ອ້າງອີງ:
https://www.dw.com/…/hungary-approves…/a-65142432
https://apnews.com/…/finland-nato-hungary-turkey…
https://www.euronews.com/…/nato-hungarian-parliament…
