ກະຊວງການເງິນ ມອບ-ໂອນ 18 ຫົວໜ່ວຍວິສາຫະກິດ ໃຫ້ແຂວງເຊກອງ ຄຸ້ມຄອງໃນປີ 2023
ວັນທີ 28 ມີນາ 2023 ນີ້, ກະຊວງການເງິນ ມອບ-ໂອນ ການທົດລອງຫັນຫົວໜ່ວຍວິສາຫະກິດ ທີ່ສູນກາງຄຸ້ມຄອງ ມອບໃຫ້ແຂວງເຊກອງຈັດຕັ້ງປະຕິບັດ ປີ 2023, ຈໍານວນ 18 ຫົວໜ່ວຍ, ໂດຍການເປັນປະທານຂອງ ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ, ມີ ທ່ານ ເຫລັກໄຫລ ສີວິໄລ ກຳມະການສູນກາງພັກ, ເຈົ້າແຂວງ ແຂວງເຊກອງ, ພ້ອມດ້ວຍຫົວໜ້າຫ້ອງການກະຊວງການເງິນ, ຄະນະກົມ, ຫົວໜ້າ-ຮອງຫົວໜ້າພະແນກການເງິນ ແຂວງເຊກອງ, ພະນັກງານຫລັກແຫລ່ງ ແລະ ພາກສ່ວນກ່ຽວຂ້ອງເຂົ້າຮ່ວມ.
ການມອບ-ໂອນ ຫົວໜ່ວຍວິສາຫະກິດໃຫ້ແຂວງຄຸ້ມຄອງ, ໂດຍປະຕິບັດຕາມມາດຕາ 3 ຂໍ້ທີ 1 ຂອງມະຕິກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ສະບັບເລກທີ 63/ສພຊ, ລົງວັນທີ 09 ທັນວາ 2022, ກະຊວງການເງິນ ແລະ ແຂວງເຊກອງ ເຫັນດີເປັນເອກະພາບ ມອບ-ຮັບ ການທົດລອງຫັນຫົວໜ່ວຍວິສາຫະກິດທີ່ສູນກາງຄຸ້ມຄອງໃນໄລຍະຜ່ານມາ ໃຫ້ແຂວງເຊກອງ, ສືບຕໍ່ຄຸ້ມຄອງ ແລະ ຈັດຕັ້ງປະຕິບັດໃນປີ 2023 ຈຳນວນ 18 ຫົວໜ່ວຍວິສາຫະກິດ ເພື່ອສ້າງຄວາມເຂັ້ມແຂງ ໃນນັ້ນປະກອບມີ: ບໍລິສັດ ພະລັງງານໄຟຟ້າ ເຊກອງ ຈຳກັດ; ບໍລິສັດ ໄຟຟ້າເຊລະໝາມ 3 ຈຳກັດ, ບໍລິສັດ ພະລັງງານ ໄຟຟ້າຄວາມຮ້ອນ ເຊກອງຈຳກັດ, ບໍລິສັດ ວິພີຈີ ລາວ-ຫວຽດ ຈີເອັສຊີ ຈຳກັດ, ບໍລິສັດ ລາວ ກະລືມ ບໍ່ແຮ່ ຈຳກັດ, ບໍລິສັດ ໄຟຟ້າຫ້ວຍລະແງ ຈຳກັດ, ບໍລິສັດກູ່ມດວງຈະເລີນພັດທະນາແຮ່ກະລືມ ຈຳກັດ, ບໍລິສັດ ດວງຈະເລີນພັດທະນາແຮ່ຄຳ ດາກຈຶງ ຈຳກັດ, ບໍລິສັດ ໄຟຟ້າ ນ້ຳອີມູນ ຈຳກັດ, ບໍລີສັດ ລາວບີເອສເອສ ມາຍນິ້ງ ຈຳກັດ, ບໍລິສັດ ນ້ຳບີ ພາວເວີ ຈຳກັດ, ບໍລິສັດ ເຊກອງ ບໍ່ແຮ່ ຈຳກັດ, ບໍລິສັດ ລາວຕົງລຽນ ບໍ່ແຮ່ ຈຳກັດ, ບໍລິສັດ ທີເອັສບີພີ ເຊກອງ ພະລັງງານໄຟຟ້າ ແລະ ແຮ່ທາດຈຳກັດ, ບໍລິສັດ ຊີນຢວນ ບໍ່ແຮ່ ຈຳກັດ, ບໍລິສັດ ຖ່ານຫີນລະມາມມາຍນິ້ງ ຈຳກັດ, ບໍລິສັດ ເຂື່ອນໄຟຟ້າ ເຊກອງຕອນລຸ່ມ ເອ ຈຳກັດ ແລະ ບໍລິສັດ ເອັນທີເອັບ ອາກຣີ ພັດທະນາ ຈຳກັດຜູ້ດຽວ.
ໂອກາດດັ່ງກ່າວ, ທ່ານ ບຸນປອນ ວັນນະຈິດ ໄດ້ໂອ້ລົມ ແລະ ໃຫ້ທິດຊີ້ນຳ ເອົາໃຈໃສ່ຈຸດພິເສດຂອງກຸ່ມວິສາຫະກິດທີ່ໄດ້ມອບ-ໂອນ ທີ່ມີການມອບພັນທະທີ່ແຕກຕ່າງກັນ ເຊັ່ນ: ກຸ່ມບໍ່ແຮ່, ໄຟຟ້າ ແລະ ກຸ່ມວິສາຫະກິດທຸລະກຳດີຈີຕອນ ຕ້ອງໄດ້ລົງເກັບກໍາຖານຂໍ້ມູນຕົວຈິງ ລະອຽດແຕ່ລະຫົວໜ່ວຍວິສາຫະກິດ ເພື່ອກວດກາຄືນ ເປັນຕົ້ນ: ສະຖານທີ່ຕັ້ງ, ສະຖານະຂອງວິສາຫະກິດ, ປະເພດແຮ່ທາດ, ຈຳນວນພະນັກງານ, ແຜນການຂຸດຄົ້ນ ແລະ ສົ່ງອອກຕົວຈິງ, ເນື້ອທີ່ສໍາປະທານ, ກຳລັງແຮງການຜະລິດໄຟຟ້າ, ລາຄາຂາຍໄຟຟ້າ, ຂໍ້ມູນຜູ້ຮັບເໝົາຊ່ວງຕໍ່ ໄລຍະການມອບອາກອນກຳໄລ, ຄ່າພາກຫຼວງຕາມສັນຍາ ແລະ ອື່ນໆອີກ.
