ປະເທດລາວ ມີຄວາມອຸດົມສົມບູນທາງທຳມະຊາດ ຢ່າເສຍໂອກາດໄປລ້າໆ ຍ້ອນບໍ່ກ້າລົງທຶນ

ໂດຍ: ທິດກໍ່າ

ທິດກໍ່າໄດ້ອ່ານຄໍາເຫັນຂອງທ່ານ ອິນທີ ເດືອນສະຫວັນ ນັກປະພັນຜູ້ມີຊື່ສຽງໃນລາວເຮົາທີ່ໄດ້ເຜີຍແຜ່ຜ່ານສື່ແຕ່ວັນທີ 14 ຕຸລາ 2022 ກ່ຽວກັບບັນຫາການທ່ອງທ່ຽວຢູ່ປະເທດລາວເຮົາວ່າ: ຢາກໃຫ້ເອົາບົດຮຽນຈາກເພື່ອນບ້ານຫວຽດນາມ ເພາະອຸດສາຫະກຳການທ່ອງທ່ຽວຂອງເພິ່ນໄປໄກເຕີບໂຕແຂງແຮງຈົນສາມາດສ້າງລາຍຮັບເປັນອັນດັບສອງຂອງປະເທດ,ຍ້ອນວ່າ: ມີຄວາມເປັນມືອາຊີບສູງຫລາຍ ບໍ່ແປກທີ່ລາຍຮັບການທ່ອງທ່ຽວທະລຸ 20 ກວ່າຕື້ໂດລາສະຫະລັດ ໃນປີ 2019 ເປັນອັນດັບສອງຂອງລາຍຮັບແຫ່ງຊາດ. ບົດຮຽນຂອງຫວຽດນາມກ່ອນຈະມາຮອດຈຸດນີ້ ແມ່ນຕ້ອງເວົ້າເຖິງຄວາມເຂົ້າໃຈ, ການເຮັດວຽກຮ່ວມກັນຂອງທຸກພາກສ່ວນ, ການຍອມທຸ້ມເທງົບປະມານ, ຮູ້ວາງແຜນທີ່ດີ, ມີການຄຸ້ມຄອງທີ່ເຂັ້ມງວດ ແລະ ຮູ້ ສົ່ງເສີມຜູ້ປະກອບການ, ການສື່ສານທີ່ມີປະສິດທິພາບ. ສະຫລຸບແລ້ວດ້ານພື້ນຖານຂອງການພັດທະນາການທ່ອງທ່ຽວຕ້ອງໄດ້ຄໍານຶງເຖິງການຈັດສັນ, ການສ້າງຄວາມເຂັ້ມແຂງດ້ານບຸກຄະລາກອນ, ການປະຊາສໍາພັນ, ການປົກປັກຮັກສາຈຸດຂາຍ, ການຄຸ້ມຄອງ ແລະ ການພັດທະນາພື້ນຖານໂຄງລ່າງທີ່ດີ.

ໃນຄວາມເປັນຈິງແລ້ວ, ທິດກໍ່າເຄີຍໄດ້ໄປສຶກສາຮໍ່າຮຽນຢູ່ປະເທດຫວຽດນາມຫລາຍປີ ເຫັນຄົນຫວຽດນາມເປັນຄົນຂະຫຍັນດຸໝັ່ນອີ່ຫລີ ຖ້າເວົ້າອັນໃດອອກມາເຂົາຕ້ອງເຮັດໃຫ້ໄດ້. ສິ່ງທີ່ໂດດເດັ່ນອີກປະການໜຶ່ງເຂົາມີຄວາມຈົງຮັກພັກດີຕໍ່ປະເທດຊາດບ້ານເມືອງນັບແຕ່ອະດີດຈົນເຖິງປັດຈຸບັນ. ສະນັ້ນ ກ່ຽວກັບການສ້າງສາພັດທະນາໃນຍຸກນີ້ ຫວຽດນາມໄດ້ກ້າວໄປໄກຢ່າງຂາດຂັ້ນ ບໍ່ວ່າແຕ່ໃນເລື່ອງການທ່ອງທ່ຽວ, ດ້ານການຜະລິດສິນຄ້າເພື່ອສົ່ງອອກກໍຢືນຢູ່ອັນດັບຕົ້ນໆຂອງອາຊຽນໄປແລ້ວ. ສິ່ງທີ່ຫວຽດນາມລື່ນເຮົາໃນສະຖານທີ່ທ່ອງທ່ຽວນັ້ນ ຍ້ອນພວກເພິ່ນມີທະເລ. ສ່ວນໃນເລື່ອງວັດທະນະທໍາກັບທໍາມະຊາດນັ້ນ ລາວເຮົາກໍບໍ່ໜ້ອຍໜ້າ ຂໍພຽງແຕວ່າເວົ້າແລ້ວຕ້ອງເຮັດ ແລະ ກ້າລົງທຶນ ເພາະຍຸກນີ້ບໍ່ວ່າປະເທດໃດເຂົາກໍຖືເອົາອຸດສາຫະກໍາການທ່ອງທ່ຽວເປັນແຫລ່ງລາຍຮັບອັນມະຫາສານຂອງປະເທດ.

ສໍາລັບປະເທດລາວເຮົາແລ້ວ, ຕາມທິດກໍ່າວ່າ ສິ່ງທີ່ຄວນປັບປຸງແກ້ໄຂໃຫ້ໄວໆນັ້ນແມ່ນຕ້ອງເລັ່ງສ້າງຖະໜົນຫົນທາງໃຫ້ໄປມາສະດວກໃນທົ່ວປະເທດ, ຍາມແລ້ງບໍ່ໃຫ້ມີຂີ້ຝຸ່ນໄງ່ກຸ້ມ, ຍາມຝົນບໍ່ໃຫ້ມີຂີ້ຕົມເລະແທະ ໂດຍສະເພາະແມ່ນເສັ້ນທາງເຂົ້າຫາແຫລ່ງທ່ອງທ່ຽວໃຫ້ໄປມາສະດວກສະບາຍ. ສ່ວນວຽກອັນທີສອງຄືຕ້ອງສ້າງບຸກຄະລາກອນໃນຂະແໜງການທ່ອງທ່ຽວໃຫ້ມີທັກສະ ທັງໄດ້ມາດຕະຖານສາກົນ ສາມາດທຽບກັບໝູ່ໄດ້ໃນອາຊຽນ. ອັນທີສາມ ຂ້ຽວປັບປຸງແຫລ່ງທ່ອງທ່ຽວທີ່ມີໃນທົ່ວປະເທດ ທັງແບ່ງຂັ້ນຄຸ້ມຄອງຢ່າງຄັກແນ່ ນັບແຕ່ຂັ້ນບ້ານ, ຂັ້ນເມືອງ, ຂັ້ນນະຄອນ, ຂັ້ນແຂວງ ແລະ ຂັ້ນສູນກາງ. ຕົວຢ່າງໃນປັດຈຸບັນບ່ອນທີ່ເຮັດໄດ້ດີ ສາມາດເປັນຕົວແບບໃຫ້ໝູ່ຄືແຫລ່ງທ່ອງທ່ຽວທໍາມະຊາດຖໍ້າກອງລໍ-ນາຕານ. ສ່ວນອັນທີ່ສີ່ກໍແມ່ນພາກສ່ວນໂຮງແຮມ, ຮ້ານອາຫານ, ຮ້ານກິນດື່ມ ຕ້ອງບໍລິການເປັນເລີດ, ແບບມີນໍ້າໃຈ, ໄດ້ມາດຕະຖານ, ບໍ່ຄວນໃຫ້ປາກໃຫຍ່ກວ່າທ້ອງ. ສ່ວນອັນສຸດທ້າຍ ໂຕຈະໄດ້ກິນໄດ້ຫຍໍ້າຍ້ອນກໍແມ່ນການໂຄສະນາອັນນີ້ແມ່ນສໍາຄັນຫລາຍ. ສະຫລຸບແລ້ວທັງໝົດທີ່ເວົ້າມານີ້ ຖ້າຢາກທະລຸເປົ້າໝາຍກໍລ້ວນແລ້ວແຕ່ມີການລົງທຶນທັງພາກລັດ ແລະ ເອກະຊົນຈະຕ້ອງໄດ້ພະນຶກກໍາລັງພ້ອມກັນເຮັດ ພ້ອມກັນຮັ່ງ ພ້ອມກັນມີ ມັນຈຶ່ງເກີດຄືບ້ານເຂົາ.

ຢ່າງໃດກໍດີ, ຕາມທີ່ເຫັນນັບແຕ່ເປີດປະເທດຫລັງໂຄວິດ-19 ມານີ້ ເຫັນວ່າບັນຍາກາດການທ່ອງທ່ຽວຢູ່ບ້ານເຮົາກໍເລີ່ມຄຶກຄັກ ຍ້ອນມີລົດໄຟລາວ-ຈີນ, ແຕ່ຖ້າລາວເຮົາມີເສັ້ນທາງໄປມາ ນັບທັງທາງລົດໄຟຄວາມໄວສູງ, ສາຍທາງດ່ວນ, ສາຍທາງແຫ່ງຊາດ ແລະ ຂອງທ້ອງຖິ່ນຢັ່ງຢາຍຢູ່ໃນທົ່ວປະເທດປານເສັ້ນເລືອດ ການເດີນທາງໄປມາທ່ອງທ່ຽວບໍ່ມີຂີ້ຝຸ່ນໃຫງ່ກຸ່ມ, ຫົວສັ່ນຫົວຄອນໃນເວລາລົດແລ່ນ ທັງບໍ່ປະປ່ອຍໂອກາດໃຫ້ເສຍໄປຕາມມີຕາມເກີດ ແນ່ນອນການທ່ອງທ່ຽວຢູ່ລາວເຮົາຕ້ອງເຕີບໃຫຍ່ແຂງແຮງ, ປະເທດ ແລະ ຜູ້ປະກອບການຕ້ອງພາກັນຖົ່ງຕຶ່ງແນ່ນອນ.