ຄະນະກຳມະການຄຸ້ມຄອງໄພພິບັດຂັ້ນສູນກາງ ເນັ້ນ ກຽມຄວາມພ້ອມຮັບ ແລະ ແກ້ໄຂບັນຫາໄຟໄໝ້ປ່າ

ວັນທີ 28 ມີນາ 2023 ນີ້  ຄະນະກຳມະການຄຸ້ມຄອງໄພພິບັດຂັ້ນສູນກາງ ອອກແຈ້ງການ ໃຫ້ທຸກຂັ້ນເອົາໃຈໃສ່ເພີ່ມທະວີຄວາມເອົາໃຈໃສ່ໃນການກຽມຄວາມພ້ອມຮັບມື ກັບອັກຄີໄພ ແລະ ໄຟໄໝ້ລາມປ່າ ໃນໄລຍະລະດູແລ້ງ.

ເນື່ອງຈາກສະພາບອາກາດທີ່ຮ້ອນອົບເອົ້າ ຊຶ່ງອາດເຮັດໃຫ້ເກີດມີອັກຄີໄພ ຫຼື ໄຟໄໝ້ລາມປ່າເປັນວົງກວ້າງຢູ່ໃນຂອບເຂດທົ່ວ ປະເທດ. ສະນັ້ນ, ເພື່ອກຽມພ້ອມຮັບມືກັບສະພາບການດັ່ງກ່າວ ຄະນະກຳມະການຄຸ້ມຄອງໄພພິບັດຂັ້ນສູນກາງ ຈຶ່ງແຈ້ງມາຍັງບັນດາທ່ານຄະນະກຳມະການຄຸ້ມຄອງໄພພິບັດແຕ່ລະຂັ້ນດັ່ງນີ້:

1. ເພີ່ມທະວີຄວາມເອົາໃຈໃສ່ຕິດຕາມ ສະພາບໃນເຂດພື້ນທີ່ສ່ຽງທີ່ອາດເກີດອັກຄີໄພ ຫຼື ໄຟໄໝ້ລາມປ່າຢ່າງໃກ້ຊິດ;
2. ກຽມຄວາມພ້ອມດ້ານຕ່າງໆ ເປັນຕົ້ນ: ກຳລັງພົນ, ພາຫະນະ, ວັດຖຸ, ອຸປະກອນ, ງົບປະມານ, ເຄື່ອງອຸປະໂພກ-ບໍລິໂພກ ເຂົ້າໃນການແກ້ໄຂເຫດການອັກຄີໄພ ຫຼື ໄຟໄໝ້ລາມປ່າໃຫ້ທັນສະພາບການ;
3. ແຈ້ງການເຕືອນເຖິງ ອຳນາດການປົກຄອງທ້ອງຖິ່ນທຸກຂັ້ນ ແລະ ປະຊາຊົນ ໃຫ້ມີສະຕິເຝົ້າລະວັງ ເພື່ອຮັບມືກັບເຫດການອັກຄີໄພ ຫຼື ໄຟໄໝ້ລາມປ່າ ທີ່ອາດຈະເກີດຂຶ້ນ;
4. ຫາກເຫດການອັກຄີໄພ ຫຼື ໄຟໄໝ້ລາມປ່າ ຢູ່ທ້ອງຖິ່ນໃດ ແມ່ນມອບໃຫ້ທ້ອງຖິ່ນນັ້ນຮັບຜິດຊອບໃນການແກ້ໄຂຢ່າງຮີບດ່ວນ ແລະ ລາຍງານໃຫ້ຄະນະກຳມະການຄຸ້ມຄອງໄພພິບັດຕາມແຕ່ລະຂັ້ນຊາຍໂດຍໄວ.