ຜູ້ພິພາກສາທົ່ວປະເທດ ພິຈາລະນາຕັດສິນຄະດີ ຖືກຕ້ອງ ໂປ່ງໃສ-ວ່ອງໄວ ຮັບປະກັນໄດ້ຄວາມຍຸຕິທຳ

ທ່ານ ບຸນຂວາງ ທະວີສັກ ຮອງປະທານສານປະຊາຊົນສູງສຸດ ລາຍງານຕໍ່ກອງປະຊຸມໃຫຍ່ຜູ້ພິພາກສາທົ່ວປະເທດ ຄັ້ງທີ XI  ວັນທີ 28 ມີນາ 2023 ນີ້ວ່າ:

ຕະຫຼອດໄລຍະ 2 ປີຜ່ານມາ, ສານປະຊາຊົນແຕ່ລະຂັ້ນ ກໍຄືຜູ້ພິພາກສາແຕ່ລະທ່ານ ໃນທົ່ວປະເທດ ແມ່ນຮັກສາໄດ້ຄຸນທາດການເມືອງ, ຄຸນສົມບັດສິນທຳປະຕິວັດ, ຈັນຍາບັນ, ຈັນຍາທຳ ຕີຖອຍປະກົດການຫຍໍ້ທໍ້ຢູ່ສານປະຊາຊົນແຕ່ລະຂັ້ນຫຼຸດໜ້ອຍຖອຍລົງເທື່ອລະກ້າວ, ມີຄວາມຈົງຮັກດີຕໍ່ພັກ, ຕໍ່ປະເທດຊາດ ແລະ ຮັບໃຊ້ປະຊາຊົນ ດ້ວຍຄວາມບໍລິສຸດສັດຊື່, ທ່ຽງທຳ, ລະບົບການຈັດຕັ້ງຂອງສານໄດ້ຮັບການປັບປຸງໃຫ້ໜັກແໜ້ນເຂັ້ມແຂງ ແລະ ເຕີບໃຫຍ່ຂະຫຍາຍຕົວ, ການພິຈາລະນາຕັດສິນຄະດີມີຄວາມວ່ອງໄວ, ໂປ່ງໃສ, ຖືກຕ້ອງ ແລະ ຮັບປະກັນຄວາມຍຸຕິທໍາໃນສັງຄົມ ສະແດງອອກໃນປີ 2020-2022 ມີຄະດີເຂົ້າມາຢູ່ສານຂັ້ນຕົ້ນ, ຂັ້ນອຸທອນ ແລະ ຂັ້ນລົບລ້າງ ທັງໝົດ 21.547 ເລື່ອງ ທຽບໃສ່ຄັ້ງກ່ອນຫຼຸດລົງ 3.227 ເລື່ອງ, ຄະດີຄ້າງມາ 2.568 ເລື່ອງ, ລວມທັງໝົດ 24.115 ເລື່ອງ, ໄດ້ແກ້ໄຂແລ້ວ 20.733 ເລື່ອງ ເທົ່າກັບ 85,98% ຖ້າທຽບໃສ່ຄັ້ງກ່ອນຫຼຸດລົງ 3,25% ແລະ ຄະດີຍັງຄ້າງ 3.382 ເລື່ອງ, ຖ້າທຽບໃສ່ຄັ້ງຜ່ານມາເຫັນວ່າ ຄະດີຍັງຄ້າງສູງກວ່າຄັ້ງກ່ອນເຖິງ 477 ເລື່ອງ.

ປີ 2023-2025 ຈະສູ້ຊົນສ້າງໃຫ້ຜູ້ພິພາກສາ, ພະນັກງານຂອງສານ ມີຄຸນທາດການເມືອງ, ຄຸນສົມບັດສິນທໍາປະຕິວັດ, ຢຶດໝັ້ນອຸດົມການຂອງສານຢ່າງຖືກຕ້ອງ, ມີຈິດໃຈຮັບໃຊ້ປະຊາຊົນຢ່າງແທ້ຈິງ. ພ້ອມທັງຍົກສູງຄວາມສາມາດທາງດ້ານວິຊາສະເພາະ-ວິຊາການກົດໝາຍ ເພື່ອຮັບປະກັນໃຫ້ການເຄື່ອນໄຫວປະຕິບັດໜ້າທີ່, ຕັດສິນ, ພິພາກສາຄະດີມີຄວາມວ່ອງໄວ, ໂປ່ງໃສໃນທຸກຂັ້ນຕອນ, ຖືກຕ້ອງຕາມກົດໝາຍ, ຕິດຕາມກວດກາການປະຕິບັດໜ້າທີ່ ແລະ ການປະພຶດຂອງຜູ້ພິພາກສາ, ພະນັກງານຂອງສານແຕ່ລະຂັ້ນ ໃຫ້ປະຕິບັດຕາມກົດໝາຍຢ່າງເຂັ້ມງວດ; ສູ້ຊົນພິຈາລະນາແກ້ໄຂຄະດີ ທີ່ເຂົ້າມາສານທຸກຂັ້ນໃຫ້ມີຄວາມວ່ອງໄວ ບັນລຸ 85% ຕໍ່ປີ ແລະ ຮັບປະກັນການຕັດສິນຄະດີມີຄຸນນະພາບ, ອັດຕາການຂໍອຸທອນ ຢູ່ໃນລະດັບ 15% ແລະ ການຂໍລົບລ້າງໃຫ້ຫຼຸດລົງ.