ເມືອງໜອງບົກ ທຳລາຍສິນຄ້າເສຍຄຸນໝົດອາຍຸ ລວມມູນຄ່າ 12 ລ້ານກວ່າກີບ
ແຫລ່ງຂ່າວເມືອງໜອງບົກ ແຂວງຄຳມ່ວນ ລາຍງານວ່າ: ວັນທີ 29 ມີນາ 2023 ຫ້ອງການອຸດສະຫະກຳ ແລະ ການຄ້າເມືອງໜອງບົກ ຈັດພິທີທຳລາຍສິນຄ້າອຸປະໂພກ-ບໍລິໂພກ, ເສຍຄຸນໝົດອາຍຸ ປະກອບມີ: ເຂົ້າໜົມລວມຖົງໃຫຍ່ຈຳນວນ 67 ຖົງ, ນົມດີນາ 1 ແກັດ, ນ້ຳແຈ່ວສຸກກີ້ 10 ແກັດ, ນ້ຳວິຕາມິນຊີ 16 ແກັດ, ສີຍ້ອມຜົມ 56 ກ່ອງ, ຊາຊົງ 10 ກ່ອງ, ນ້ຳອັດລົມ 17 ຕຸກ, ປາກະປ໋ອງ 10 ປ໋ອງ ແລະ ນົມຊິງໆ 9 ແພັກ ລວມມູນຄ່າທັງໝົດ 12 ລ້ານກວ່າກີບ ຈາກນັ້ນຈຶ່ງພ້ອມພາກັນທຳລາຍສິນຄ້າດັ່ງກ່າວຖິ້ມ.
ໂດຍການເຂົ້າຮ່ວມ ຂອງ ທ່ານ ຄຳມອນ ພົມພິພັກ ຮອງເຈົ້າເມືອງໆໜອງບົກ ທັງເປັນຜູ້ຊີ້ນຳຂົງເຂດເສດຖະກິດຂອງເມືອງ ເຂົ້າຮ່ວມມີ ທ່ານ ທອງດຳ ລັດຕະນະໄຊ ຫົວໜ້າຫ້ອງການ ການຄ້າເມືອງ.
ທ່ານ ສຸວັນນະລາດ ກົງຄໍາໃສ ຮອງຫົວໜ້າຫ້ອງການອຸດສະຫະກໍາ ແລະ ການຄ້າເມືອງ ຜ່ານຂໍ້ຕົກລົງຂອງທ່ານເຈົ້າເມືອງໜອງບົກ ສະບັບເລກທີ 895/ຈມ ລົງວັນທີ 15 ພະຈິກ 2022 ວ່າດ້ວຍໃນການຈັດຕັ້ງເຄື່ອນໄຫວຂອງວຽກງານອຸດສະຫະກຳ ແລະ ການຄ້າ, ຜ່ານບົດບັນທຶກໃນການທຳລາຍສິນຄ້າເສຍຄຸນໝົດອາຍຸ ເຊິ່ງຜ່ານມາທາງຫ້ອງການໄດ້ມີການລົງກວດການຳບັນດາຮ້ານຄ້າພາຍໃນເມືອງ ໄດ້ພົບເຫັນສິນຄ້າຈຳນວນໜຶ່ງເສຍຄຸນໝົດອາຍຸຕໍ່ການບໍລິໂພກພ້ອມຢຶດມາທຳລາຍຖິ້ມ.
