ເມືອງໄຊທານີ ກວດພົບຮ້ານຊື້-ຂາຍເຫລັກເສດ ລະເມີດກົດໝາຍ 26 ຮ້ານ ພ້ອມນຳມາເຮັດບົດບັນທຶກ ແລະ ປັບໃໝ
ອີງຕາມຄວາມສະຫງົບລາຍງານວ່າ: ເຈົ້າໜ້າທີ່ກອງບັນຊາການ ປກສ ເມືອງໄຊທານີ ກວດພົບຮ້ານຮັບຊື້-ຂາຍເຫລັກເສດທີ່ມີການລະເມີດຕໍ່ລະບຽບກົດໝາຍ ທັງໝົດ 26 ຮ້ານ, ໃນນັ້ນເປັນຄົນຕ່າງປະເທດ 38 ຄົນ ພາຍຫລັງທີ່ສ້າງແຜນລົງທົດລອງກວດກາ ຢູ່ບັນດາບ້ານທີ່ຂຶ້ນກັບ ກຸ່ມບ້ານໄຊ ແລະ ກຸ່ມທ່າງ່ອນ.
ທ່ານ ພັທ ບຸນຍົງ ສີບຸນເຮືອງ ຮອງຫົວໜ້າຫ້ອງສັນຕິບານ ປກສ ນວ ລາຍງານໃນກອງປະຊຸມສະຫລຸບຖອດຖອນບົດຮຽນ ການເຄື່ອນໄຫວກວດກາແກ້ໄຂຮ້ານຮັບຊື້-ຂາຍເຫລັກເສດ ຢູ່ເມືອງໄຊທານີ ໃນວັນທີ 30 ມີນາ 2023 ນີ້ວ່າ: ແຜນການເຮັດທົດລອງການແກ້ໄຂຮ້ານຮັບຊື້-ຂາຍເຫລັກເສດຂອງຄົນຕ່າງປະເທດ ທີ່ລະເມີດກົດໝາຍ-ລະບຽບການຂອງ ສປປ ລາວ ຢູ່ນະຄອນຫລວງວຽງຈັນ. ແມ່ນໄດ້ກຳນົດເອົາ ເມືອງໄຊທານີ ກຸ່ມບ້ານໄຊ ເປັນຈຸດໃນການເຮັດທົດລອງ ເຊິ່ງມີທັງໝົດ 8 ບ້ານ ໂດຍຜ່ານການລົງກວດກາຕົວຈິງ ພົບເຫັນວ່າຮ້ານຮັບຊື້-ຂາຍເຫລັກເສດ ຈຳນວນ 16 ຮ້ານ ທີ່ກຳລັງເປີດຢູ່ມີຄົນຕ່າງປະເທດສັນຊາດຫວຽດນາມ ຈໍານວນ 25 ຄົນ ຍິງ 6 ຄົນ.ສ່ວນກຸ່ມທ່າງ່ອນ ແມ່ນມີ 9 ບ້ານ ກວດກາພົບເຫັນຮ້ານຮັບຊື້-ຂາຍເຫລັກເສດ ຈຳນວນ 10 ຮ້ານ ທີ່ກໍາລັງເປີດຢູ່ ມີຄົນຕ່າງປະເທດສັນຊາດຫວຽດນາມ ຈໍານວນ 13 ຄົນ ຍິງ 5 ຄົນ.
ສັງລວມທັງສອງກຸ່ມ ມີທັງໝົດ 26 ຮ້ານ ແລະ ຄົນຕ່າງປະເທດສັນຊາດຫວຽດນາມ ຈໍານວນ 38 ຄົນ ຍິງ 11 ຄົນ ທີ່ມີການລະເມີດຕໍ່ກົດໝາຍ. ຈາກການກວດກາດັ່ງກ່າວ ສາມາດແຍກເປັນລາຍຄະດີ ຄື: ເຂົ້າມາດຳເນີນທຸລະກິດ ໂດຍບໍ່ໄດ້ຮັບອະນຸຍາດ ແລະ ເຮັດວຽກບໍ່ຖືກເປົ້າໝາຍ 6 ຄົນ; ເຂົ້າມາປະກອບອາຊີບ ໂດຍບໍ່ໄດ້ຮັບອະນຸຍາດ ແລະ ພັກເຊົາເກີນກໍານົດ 12 ຄົນ ຍິງ 6 ຄົນ; ເຮັດວຽກບໍ່ຖືກເປົ້າໝາຍທີ່ທາງການກໍານົດ ແລະ ພັກເຊົາເກີນກໍານົດທີ່ທາງການອະນຸຍາດ 1 ຄົນ; ເຂົ້າມາດຳເນີນທຸລະກິດ ໂດຍບໍ່ໄດ້ຮັບອະນຸຍາດ ແລະ ພັກເຊົາເກີນກຳນົດທີ່ທາງການອະນຸຍາດ 3 ຄົນ ຍິງ 1 ຄົນ; ເຮັດວຽກບໍ່ຖືກເປົ້າໝາຍທີ່ທາງການກໍານົດ 4 ຄົນ ຍິງ 2 ຄົນ; ເຂົ້າມາດຳເນີນທຸລະກິດ ໂດຍບໍ່ໄດ້ຮັບອະນຸຍາດ 11 ຄົນ ຍິງ 2 ຄົນ; ເຂົ້າມາດຳເນີນທຸລະກິດ ໂດຍບໍ່ໄດ້ຮັບອະນຸຍາດ ແລະ ເຈດຕະນາລີ້ຊ້ອນຢູ່ ສປປ ລາວ 1 ຄົນ.
ສະນັ້ນ, ຄະນະສະເພາະກິດແກ້ໄຂຄົນຕ່າງປະເທດ ປກສ ນະຄອນຫລວງວຽງຈັນ ແລະ ພາກສ່ວນທີ່ກ່ຽວຂ້ອງກວດພົບຈຶ່ງໄດ້ກັກໜັງສືຜ່ານແດນໄວ້ ພ້ອມທັງເຮັດບົດລາຍງານ ເພື່ອນຳໃຊ້ມາດຕະການຕໍ່ກັບຜູ້ທີ່ລະເມີດກົດໝາຍ ສະບັບເລກທີ 59/ສພຊ ໂດຍການເຊີນເອົາຄົນຕ່າງປະເທດທີ່ລະເມີດກົດໝາຍ ຂຶ້ນມາເຮັດບົດບັນທຶກສຶກສາອົບຮົມ ແລະ ປັບໃໝຕາມແຕ່ລະກໍລະນີທີ່ລະເມີດ.ສໍາລັບຜູ້ປະກອບການຮ້ານຮັບຊື້-ຂາຍເຫລັກເສດ ແມ່ນໄດ້ເຮັດບົດບັນທຶກໃຫ້ຢຸດເຊົາການຮັບຊື້ເຫລັກເສດທຸກປະເພດ ພ້ອມທັງໃຫ້ຊຳລະສະສາງເຄື່ອງຂອງທີ່ຢູ່ໃນຮ້ານອອກໃຫ້ໝົດ ພາຍໃນກຳນົດເວລາ 15 ວັນ ນັບແຕ່ມື້ທີ່ເຮັດບົດບັນທຶກເປັນຕົ້ນໄປ.
ປັດຈຸບັນ, ຄະນະສະເພາະກິດ ໄດ້ແກ້ໄຂແລ້ວຈຳນວນ 5 ຮ້ານ ມີ 7 ຄົນ ຍິງ 1 ຄົນ ຄື: ກໍລະນີເຂົ້າມາປະກອບອາຊີບ ໂດຍບໍ່ໄດ້ຮັບອະນຸຍາດ 3 ຄົນ, ພັກເຊົາເກີນກໍານົດທີ່ທາງການອະນຸຍາດ 1 ຄົນ, ເຂົ້າມາດຳເນີນທຸລະກິດ ໂດຍບໍ່ໄດ້ຮັບອະນຸຍາດ ແລະ ພັກເຊົາເກີນກຳນົດທີ່ທາງການອະນຸຍາດ 1 ຄົນ ແລະ ເຂົ້າມາດຳເນີນທຸລະກິດ ໂດຍບໍ່ໄດ້ຮັບອະນຸຍາດ 2 ຄົນ.
