ປະທານສະພາແຫ່ງຊາດ ເນັ້ນໃຫ້ຜູ້ພິພາກສາທົ່ວປະເທດເອົາໃຈໃສ່ 8 ບັນຫາສຳຄັນ

ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ມີຄຳເຫັນໂອ້ລົມຕໍ່ກອງປະຊຸມໃຫຍ່ຜູ້ພິພາກສາທົ່ວປະເທດ ຄັ້ງທີ XI, ໃນຫົວຂໍ້ ຍົກສູງຄວາມຮັບຜິດຊອບໃນການໂຕ້ແຍ່ງ-ໂຕ້ຖຽງໃຫ້ລະອຽດ, ຄົບຖ້ວນຮັບປະກັນໃຫ້ການຕັດສິນ, ພິພາກສາຄະດີໃຫ້ຖືກຕ້ອງ ແລະ ຍຸຕິທຳ ທີ່ຈັດຂຶ້ນວັນທີ 28-29 ມີນາ 2023 ຢູ່ນະຄອນຫລວງວຽງຈັນ, ໂດຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຕະຫລອດໄລຍະ 2 ປີທີ່ຜ່ານມາ ເຖິງວ່າຈະມີຄວາມຫຍຸ້ງຍາກ ແລະ ສິ່ງທ້າທາຍຫລາຍອັນ ເປັນຕົ້ນແມ່ນບັນຫາການແຜ່ລະບາດຂອງພະຍາດໂຄວິດ-19, ຄວາມຫຍຸ້ງຍາກທາງດ້ານເສດຖະກິດ ແລະ ປະກົດການຫຍໍ້ທໍ້ໃນສັງຄົມ ແຕ່ດ້ວຍຄວາມຮັບຜິດຊອບການເມືອງຂອງຄະນະພັກ, ຄະນະນໍາ ກໍຄືຄວາມບຸກບືນສູ້ຊົນ, ຄວາມຫ້າວຫັນຂອງບັນດາຜູ້ພິພາກສາ ໃນການຕັດສິນ ແລະ ພິພາກສາຄະດີ, ສາມາດຍາດໄດ້ຜົນສໍາເລັດທີ່ພົ້ນເດັ່ນຫລາຍດ້ານ ຊຶ່ງເປັນການປະກອບສ່ວນຢ່າງຕັ້ງໜ້າເຂົ້າໃນການສຶກສາອົບຮົມສະຕິເຄົາລົບ ແລະ ປະຕິບັດກົດໝາຍ ຢູ່ໃນສັງຄົມໃຫ້ນັບມື້ນັບສູງຂຶ້ນເທື່ອລະກ້າວ ຕາມທິດສ້າງລັດ ທີ່ປົກຄອງດ້ວຍກົດໝາຍ, ເຮັດໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ແລະ ຍຸຕິທໍາດີຂຶ້ນເປັນກ້າວໆ.

ເຖິງຢ່າງໃດກໍຕາມຖ້າທຽບໃສ່ໜ້າທີ່ການເມືອງ ກໍຄືຄວາມຮຽກຮ້ອງຕ້ອງການຂອງວຽກງານຜູ້ພິພາກສາໃນໄລຍະໃໝ່ຕາມແນວທາງນະໂຍບາຍຂອງພັກວາງອອກ, ສະນັ້ນ ທິດທາງໃນຕໍ່ໜ້າ ຮຽກຮ້ອງມາຍັງຄະນະພັກ ຄະນະນຳ ຂອງສານປະຊາຊົນສູງສຸດ ສານປະຊາຊົນທ້ອງຖິ່ນ ຈົ່ງພ້ອມກັນເປັນເອກະພາບເອົາໃຈໃສ່ຕື່ມບາງບັນຫາດັ່ງນີ້:

1. ຕ້ອງເຂົ້າໃຈ ແລະ ກໍາແໜ້ນໃນແນວທາງການສ້າງລັດທີ່ປົກຄອງດ້ວຍກົດໝາຍຢູ່ ສປປ ລາວ ໃຫ້ຖືກຕ້ອງ, ເລິກເຊິງຕາມທີ່ກອງປະຊຸມໃຫຍ່ຂອງພັກວາງອອກ.
2. ເຊີດຊູບົດບາດຂອງອົງການຕຸລາການໃຫ້ເຂັ້ມແຂງ, ໜັກແໜ້ນໃຫ້ກາຍເປັນເຄື່ອງມືຜະເດັດການທີ່ສັກສິດ ແລະ ເຂັ້ມງວດຂອງພັກໃຫ້ສົມກັບຄຳຂວັນທີ່ຕັ້ງໄວ້ວ່າ: ຍົກສູງປະສິດທິພາບໃນການເຄື່ອນໄຫວວຽກງານຂອງສານປະຊາຊົນໃນເງື່ອນໄຂໃໝ່ໃຫ້ມີຄວາມໂປ່ງໄສ, ສິ້ນສຸດຕາມກົດໝາຍ ແລະ ຮັບປະກັນຄວາມຍຸຕິທໍາ ຕາມຄໍາຂວັນ 3 ປ: ໂປ່ງໄສ, ເປັນເອກະລາດ, ເປັນທໍາ.
3. ເພີ່ມທະວີປັບປຸງການຈັດຕັ້ງຂອງສານປະຊາຊົນ ໃຫ້ມີຄວາມໜັກແໜ້ນເຂັ້ມແຂງ ໂດຍສະເພາະສານຂັ້ນຕົ້ນ ຕ້ອງມີຄວາມລະອຽດ, ຮອບຄອບໃນການດຳເນີນຄະດີ, ເກັບກຳຂໍ້ມູນຫລັກຖານ ໃຫ້ມີຄວາມຄົບຖ້ວນ, ຮອບດ້ານ, ຊັດເຈນ ແລະ ພາວະວິໄສ ເພື່ອຮັບປະກັນໃຫ້ການຕັດສິນຄະດີ ມີຄວາມຖືກຕ້ອງ ແລະ ເປັນທຳ, ເປັນທີ່ເພິ່ງ, ທີ່ໄວ້ເນື້ອເຊື່ອໃຈຂອງປະຊາຊົນ.
4. ເອົາໃຈໃສ່ບໍາລຸງ-ສ້າງຜູ້ພິພາກສາ, ພະນັກງານຂອງສານ ຖ້າຜູ້ພິພາກສາດີ-ເກັ່ງ ກໍຈະເຮັດໃຫ້ການຕັດສິນຄະດີມີຄວາມຖືກຕ້ອງ, ເປັນທໍາ.
5. ສືບຕໍ່ປັບປຸງກົນໄກ, ແບບແຜນການຄົ້ນຄວ້າ, ຕັດສິນ ແລະ ພິພາກສາຄະດີ ໃຫ້ມີຄວາມຮັດກຸມ, ໂປ່ງໄສ ແລະ ກວດກາໄດ້, ສ້າງເງື່ອນໄຂໃຫ້ທະນາຍຄວາມ, ໂຈດ ແລະ ຈໍາເລີຍ ເຂົ້າຮ່ວມໃນການດໍາເນີນຄະດີ, ເພີ່ມທະວີໃຫ້ໂຈດ-ຈໍາເລີຍ ໂຕ້ແຍ່ງ-ໂຕ້ຖຽງກ່ຽວກັບຂໍ້ມູນຫລັກຖານທີ່ແຕ່ລະຝ່າຍຍື່ນຕໍ່ສານໃຫ້ລະອຽດ, ຄົບຖ້ວນ ແລະ ສິ້ນສຸດຂະບວນການໂຕ້ແຍ່ງຕາມກົດໝາຍ, ນໍາເອົາຜົນຂອງການໂຕ້ແຍ່ງ-ໂຕ້ຖຽງດັ່ງກ່າວເປັນບ່ອນອີງ, ເຫດຜົນໃນການຕັດສິນແຕ່ລະບັນຫາ.
6. ສືບຕໍ່ຍົກສູງຄວາມຮັບຜິດຊອບຂອງຜູ້ພິພາກສາໃນການດໍາເນີນ, ຕັດສິນ ແລະ ພິພາກສາຄະດີ ເນື່ອງຈາກວ່າຜູ້ພິພາກສາ ເປັນຜູ້ບັງຄັບບັນຊາ, ຄວບຄຸມການດໍາເນີນ, ຊີ້ຂາດກ່ຽວກັບຄະດີ.
7. ເພີ່ມທະວີການຕິດຕາມກວດກາການປະຕິບັດໜ້າທີ່ຕັດສິນຄະດີຂອງຜູ້ພິພາກສາ ແລະ ພະນັກງານກົດໝາຍ ໃຫ້ເປັນປົກກະຕິ ດ້ວຍການປັບປຸງກົນໄກ ແບບແຜນວິທີ່ເຮັດວຽກ ພາຍໃນການຈັດຕັ້ງຂອງສານແຕ່ລະຂັ້ນ.
8.  ເອົາໃຈໃສ່ປະສານສົມທົບກັບອົງການປົກປ້ອງກົດໝາຍ ແກ້ໄຂຄໍາຮ້ອງຂໍຄວາມ ເປັນທໍາຂອງປະຊາຊົນ ທີ່ຍັງຄ້າງຢູ່ສະພາ, ຢູ່ປະຕິບັດຄຳຕັດສິນ ຫລື ພາກສ່ວນອື່ນໃຫ້ມີຜົນສຳເລັດ.