ເລີກິ໊ບ ຕີຂ່າວ ເປແອສເຊ ເມີນເສີຍຕໍ່ສັນຍາ ເມສຊີ່ ພ້ອມປ່ອຍໂຕຟຣີເພື່ອຫລຸດຄ່າໃຊ້ຈ່າຍ ຫລັງຖຶກ ປັບເງິນປີກ່ອນເນື່ອງຈາກຜິດກົດເລື່ອງການໃຊ້ຈ່າຍ

ເລີກິ໊ບ ສື່​ໃຫຍ່​ຂອງ​ເມືອງ​ຝຣັ່ງ ເຜີຍ​ຂ່າວ​ວ່າ ປາຣີ ແຊັງ-​ແຊກ​ແມ໊ງ ທີມ​ເງິນ​ຖັງຂອງ​ປະ​ເທດ​ມີແວວບໍ່​ຄິດ​ທີ່​ຈະ​ຕໍ່​ສັນຍາ​ກັບ ລີ​ໂອ​ເນ​ລ ເມ​ສຊີ່ ດາວ​ຍິງທີມຊາດ​ອາ​ເຈນ​ຕິ​ນາ ເພາະ​ຢ້ານ​ຈະ​ເຂົ້າຂ່າຍ​ຜິດ​ກົດ​ລະບຽບ​ການ​ໃຊ້​ຈ່າຍ ( Financial Fair Play)

ສັນຍາຂອງ ເມສຊີ່ ກັບ ເປແອສເຊ ຈະໝົດລົງໃນທ້າຍລະດູການນີ້ ແລະ ເທົ່າທີ່ຜ່ານມາມີຂ່າວວ່າພວກເຂົາກະຕືລືລົ້ນຕໍ່ສັນຍາກັບອະດີດດາວເຕະຂອງ ບາເຊໂລນາ, ແຕ່ຍັງບໍ່ສາມາດຕົກລົງກັນໄດ້.

ຢ່າງໃດກໍ່ຕາມ, ຫລ້າສຸດ ເມື່ອວັນທີ 30 ມີນາ ທີ່ຜ່ານມາ ເລີກິ໊ບ ລະບຸວ່າ ຜູ້ບໍລິຫານຂອງ ປາກ ເດສ ແພຣັງ ບໍ່ໄດ້ຄິດທີ່ຈະຕໍ່ສັນຍາກັບ ເມສຊີ່ ທີ່ໄດ້ຮັບຄ່າຈ້າງສູງເຖິງ 740,000 ປອນຕໍ່ອາທິດ ແລະ ພ້ອມປ່ອຍເຂົາໄປແບບຟຣີໆເພື່ອຫລຸດຜ່ອນພາລະຄ່າໃຊ້ຈ່າຍ. ລວມທັງບໍ່ໃຫ້ສະໂມສອນໃຊ້ເງິນຫລາຍເກີນໄປຈົນມີຄວາມສ່ຽງຕໍ່ການລະເມີດຊໍ້າຄືນອີກ.