ຕວກກີມີມະຕິຮັບຮອງການສະໝັກເຂົ້າເປັນສະມາຊິກໃໝ່ NATO ຂອງຟິນແລນແລ້ວ
ລັດຖະສະພາຕວກກີມີມະຕິຮັບຮອງການສະໝັກເຂົ້າເປັນສະມາຊິກໃໝ່ອົງການ NATO ຂອງຟິນແລນແລ້ວໃນວັນທີ 30 ມີນາ ຫລັງຈາກຟິນແລນປະຖິ້ມແນວທາງຄວາມເປັນກາງ, ບໍ່ຝັກໄຝ່ຝ່າຍໃດ ແລະ ເລີ່ມຕົ້ນຂະບວນການຍື່ນໃບສະໝັກສະແດງເຈດຈໍານົງນັບແຕ່ເດືອນພຶດສະພາ 2022 ໂດຍມີແຮງຂັບເຄື່ອນທີ່ສໍາຄັນຈາກສົງຄາມຣັດເຊຍ-ອູແກຣນ ສົ່ງຜົນໃຫ້ຟິນແລນກຽມເປັນປະເທດສະມາຊິກ NATO ລໍາລັບທີ 31 ຢ່າງເປັນທາງການໃນມໍ່ໆນີ້.
ໂດຍຕວກກີພາຍໃຕ້ການນໍາຂອງປະທານາທິບໍດີ ເຣເຈບ ໄຕຢິບ ແອຣໂດອັນ ເລື່ອນການລົງມະຕິຮັບຮອງຟິນແລນ ລວມທັງສະວີເດັນມາເປັນໄລຍະເວລາຫລາຍເດືອນແລ້ວ ຫລັງຕວກກີຮຽກຮ້ອງໃຫ້ລັດຖະບານທັງສອງປະເທດປະຕິບັດຕາມຄໍາຮຽກຮ້ອງຂອງຕວກກີ ໂດຍສະເພາະບັນຫາກ່ຽວກັບການຢຸດສະໜັບສະໜູນ ແລະ ໃຫ້ພື້ນທີ່ຕໍ່ກຸ່ມຊາວເຄີດທີ່ກ່ຽວຂ້ອງກັບການກໍ່ເຫດຄວາມບໍ່ສະຫງົບໃນຕວກກີມາຫລາຍທົດສະວັດ ເຊິ່ງຟິນແລນໄດ້ສະແດງຄວາມພະຍາຍາມຈະປະຕິບັດຕາມຄໍາຮ້ອງຂໍດັ່ງກ່າວ ຈົນຕວກກີປ່ຽນແປງທ່າທີ ແລະ ລົງມະຕິຮັບຮອງໃຫ້ໃນທີ່ສຸດ.
ຜູ້ນໍາຕວກກີກ່າວຍ້ອງຍໍຟິນແລນເຖິງຄວາມມຸ້ງໝັ້ນຕັ້ງໃຈ ແລະ ວິທີການທີ່ເປັນຮູບປະທໍາຕໍ່ບັນຫາດ້ານຄວາມໝັ້ນຄົງຂອງຕວກກີ.
ການລົງມະຕິຮັບຮອງດັ່ງກ່າວ ສົ່ງຜົນໃຫ້ແຮງສະໜັບສະໜູນຂອງພົນລະເມືອງຟິນແລນທີ່ມີຕໍ່ບັນຫາການສະໝັກເຂົ້າເປັນສະມາຊິກໃໝ່ NATO ເພີ່ມຂຶ້ນຈາກປະມານ 30% ເປັນເກືອບ 80% ພຽງຂ້າມຄືນ.
ຫລັງຈາກຟິນແລນໄດ້ຮັບມະຕິຮັບຮອງຈາກຕວກກີແລ້ວ ຍັງມີຂັ້ນຕອນສໍາຄັນກ່ອນຟິນແລນຈະເຂົ້າເປັນສະມາຊິກ NATO ຢ່າງເປັນທາງການ ໂດຍລັດຖະບານຮົງກາລີ ແລະ ຕວກກີຈະສົ່ງຈົດໝາຍຕອບຮັບໄປຫາອາເມລິກາ ພ້ອມແຈ້ງໃຫ້ທ່ານ ເຢນ ສໂຕລເຕນເບິກ ເລຂາທິການ NATO ຮັບຮູ້ເຖິງມະຕິດັ່ງກ່າວ ກ່ອນທ່ານ ສໂຕນລເຕນເບິກ ຈະສົ່ງໜັງສືເຊີນໄປຫາລັດຖະບານຟິນແລນ ໃຫ້ຜູ້ແທນລະດັບສູງລົງນາມ ແລ້ວສົ່ງຈົດໝາຍຕອບຮັບດັ່ງກ່າວໄປຫາກະຊວງການຕ່າງປະເທດອາເມລິກາ ຈະເຮັດໃຫ້ຟິນແລນກາຍເປັນປະເທດສະມາຊິກ NATO ໂດຍສົມບູນ.
ຄາດວ່າຟິນແລນຈະໄດ້ຮັບເຊີນໃຫ້ເຂົ້າຮ່ວມກອງປະຊຸມສຸດຍອດຜູ້ນໍາ NATO ຢ່າງເປັນທາງການໃນກອງປະຊຸມຄັ້ງໜ້າທີ່ຈະຈັດຂຶ້ນຢູ່ລິທົວເນຍ ໃນເດືອນກໍລະກົດຈະເຖິງນີ້.
ອ້າງອີງ:
https://www.cnbc.com/…/turkey-formally-approves…
https://www.reuters.com/…/turkish-parliament-approves…/
https://www.bbc.com/news/world-europe-65132527
